Kîam 21 - ÎVUKU RÎA ÛVORO MWARO

Gûciarwa kwa Isaka

¹ Ngai-Mûnene nîwarathimire Sara wata ûrîa aamwîrîrîte.

² Iburahimu aarî mûthuuri mûkûrû vîndî îrîa Sara aagîre îvu na agîciara kavîcî. Kavîcî kau gaaciarirwe kavinda wa karîa Ngai-Mûnene aaugîte nîgagaaciarwa.

³ Iburahimu nîwatuîrîre mwana ûcio rîîtwa Isaka.

⁴ Vîndî îrîa Isaka aakinyirie mîthenya înana, Iburahimu nîwamûruithirie, wata ûrîa Ngai aathanîte.

⁵ Iburahimu aarî wa mîaka îgana rîmwe rîrîa Isaka aaciarirwe.

⁶ Nake Sara nîwaugire atîrî, “Ngai nîatûmîte ntheke na mûndû wa wonthe ûkeegucaga ûvoro ûyû wa nake akaathekaga.”

⁷ Sara nîwacokire akiuga atîrî, “Nî kûrî mûndû ûngîerire Iburahimu atî Sara nwa ongie mwana. Rîu nîrîmûmûciarîru kavîcî arî mûkûrû.”

⁸ Kaana kau nîgaakûrire, na mûthenya ûrîa gatigithirue kwonga, Iburahimu nîwagîre na kîrugo kînene.

Iburahimu nîwengatire Hagari na Ishumaeli

⁹ Mûthenya ûmwe Isaka mûvîcî wa Sara nîmaathakanagia na Ishumaeli, mwana ûrîa Iburahimu maagîte na Hagari. Hagari aarî wa kuuma Misiri.

¹⁰ Rîrîa Sara oonire ûguo nîwerire Iburahimu atîrî, “Mûvîcî wa Hagari ndungata yaku, ndakagaa indo ciaku vamwe na Mûvîcîwa. Kwoguo îngata Hagari wana mûvîcî.”

¹¹ Ûvoro ûcio nîwathînirie Iburahimu mûno, nîûndû wa nake Ishumaeli aarî mûvîcî.

¹² Nwatî Ngai nîwerire Iburahimu atîrî, “Ndûkathînîke nîûndû wa kavîcî kau na ng'ina Hagari ndungata yaku ya mûndûmûka. Îka ûrîa Sara akwîra, nîûndû njiarwa irîa nie naakwîrîre ikaaumana na Isaka.

¹³ Wana nîngaava mwana wa mûndûmûka ûrîa ndungata rûrîrî, nîûndû wa nake nî mûvîcîguo.”

¹⁴ Mûthenya ûcio warûmîrîrîte kîraûko tene mûno, Iburahimu nîwavere Hagari irio, na mbooro îcûrîte manjî. Nîwacokire agîkuithia Hagari mwana na akîmwîngata. Hagari nîwathiîre akîûrûraga werûrî wa Beerisheba.

¹⁵ Rîrîa manjî marîa aakuîte maathirire, nîwatigire mwana rungu rwa mîtî.

¹⁶ Nîwacokire akîthiî vandû ta va mita îgana rîmwe agîkara nthî. Hagari nîweîrire atîrî, “Nie ndingîûmîrîria kwona mwana wakwa agîkua.” Ekarîte wa vau, kaana nîkaambîrîrie kûrîra kaugîrîrîtie.

¹⁷ Ngai nîwegwire kamwana kau gakîrîra. Nake mûraika wa Ngai kuuma îgûrû, nîwaririe na Hagari akîmûria atîrî, “Nîndûî kîrakûthînia Hagari? Tiga kûmaka nîûndû Ngai nîwegua kavîcî gaku gakîrîra karî varîa karî.

¹⁸ Ûkîra ûthiî ûnyite kavîcî kau ûkaûmîrîrie, nîûndû nîngaagatua rûrîrî rûnene.”

¹⁹ Ngai nîwamûvingûrire metho na akîona kîthima Kîam manjî. Hagari nîwathiîre agîtavîrîra mbooro yake manjî magîcûra na agîkundia kamwana.

²⁰ Nako kamwana kau nîgaakûrire gakîmenyagîrîrwa nî Ngai-Mûnene. Nîgaatûûrire werûrî wa Parani na gagîtuîka mûguîmi njamba.

²¹ Ng'ina nîwamûcarîrie mûndûmûka kuuma vûrûrirî wa Misiri.

Kîrîkanîro gatagatî ka Iburahimu na Abimeleki

²² Vîndî wa îo Abimeleki na Fikoli mûnene wa athigari nîmaathiîre kûrî Iburahimu na makîmwîra atîrî, “Ngai ethagîrwa arî vamwe nawe maûndûrî monthe marîa wîkaga.

²³ Kwoguo îîvîte ûrî ava mbere ya Ngai atî ndûkaamveenia, kana ûveenie ciana ciakwa kana njiarwa ciakwa. Mbîthîrîtwe nîrî mwîvokeku kûrî we, kwoguo mbîra atî wanawe ûkethagîrwa ûrî mwîvokeku kûrî nie na kûrî vûrûri ûyû wathamîre.”

²⁴ Nake Iburahimu nîwaugire atîrî, “Nîneranîra guo.”

²⁵ Iburahimu nîwavirire mateta kûrî Abimeleki nîûndû wa kîthima kîrîa gîatavîtwe nî ndungata cia Abimeleki.

²⁶ Abimeleki nîwerire Iburahimu atîrî, “Nie ndiîcî nîûrîkû wekire ûguo; we ndwanambîra, na îno nî vîndî ya mbere kwîgua ûvoro ûyû.”

²⁷ Iburahimu nîwavirîre Abimeleki ng'ondu na ng'ombe, na marî oîrî, nîmaarûthire kîrîkanîro.

²⁸ Iburahimu nîwamûrire tûmîatî mûgwanja kuuma ndîthiarî yake.

²⁹ Nake Abimeleki nîwamûririe atîrî, “Wamûrire tûmîatî tûtû mûgwanja nîkî?”

³⁰ Iburahimu nîwerire Abimeleki atîrî, “Amûkîra tûmîatî tûtû mûgwanja nîguo ûtuîke mûira wakwa atî nî nie nenjire kîthima gîkî.”

³¹ Kwoguo vandû vau nîveetirwe Beerisheba, nîûndû nîvo Abimeleki na Iburahimu maarûthîre kîrîkanîro.

³² Nao marîkia kûrûtha kîrîkanîro, Abimeleki na Fikoli nîmaacokire vûrûrirî wa Afilisiti.

³³ Iburahimu nîwavandire mûtî ûrîa wîtagwa mûkarakaba vau Beerisheba na akîgooca Ngai-Mûnene, Ngai ûrîa ûtûûraga mwoyo arî vo.

³⁴ Iburahimu nîwatûûrire vûrûrirî wa Afilisiti arî mûgeni îvinda îraca.