Kîam 2 - ÎVUKU RÎA ÛVORO MWARO

¹ Ngai nîwarîkirie kûmba nthî na indo cionthe irîa irî kuo.

² Naguo mûthenya wa mûgwanja Ngai aarî mûrîkiu wîra ûrîa aarutaga, na akînogoka.

³ Ngai nîwarathimire mûthenya ûcio wa mûgwanja na akîwamûra, nîûndû mûthenya ûcio nîguo aanogokire arîkia wîra wake wa ûmbi.

⁴ Ûguo nîguo îgûrû na nthî ciaûmbirwe. Vîndî îrîa Ngai-Mûnene, Ngai aûmbire nthî na îgûrû,

Mûgûnda wa Edeni

⁵ gûtiarî mûmera na gûtiarî mvîndî ciamerete nthî nîûndû Ngai-Mûnene, Ngai ndaarî murithiu mbura, na gûtiarî mûndû wa kûrîma.

⁶ Nwatî manjî nîmaaumaga nthî na magatûma îgîe na wigû.

⁷ Nake Ngai-Mûnene, Ngai nîwocire mûthetu na akîûmba mûndû naguo. Nîwacokire akîmûveverera mîruke ya mwoyo maniûrûrî, na mûndû ûcio agîtuîka kîûmbe kîrî mwoyo.

⁸ Ngai-Mûnene, Ngai nîwavandire mûgûnda Edeni, mwena wa îrathîro. Kûu nîkuo aaigire mûndû ûcio aaûmbire.

⁹ Ngai-Mûnene, Ngai nîwatûmire mîtî mîaro na ya mîthemba yonthe îkûre, na îciarage matunda maro. Naguo mûtî wa mwoyo warî gatagatî ka mûgûnda ûcio na mûtî wa gûtûma mûndû amenya ûndû mwaro na mûcûku.

¹⁰ Kûu Edeni kwarî na rûnjî rwavîtûkagîrîra mûgûndarî ûcio, na rwauma nja ya Edeni nîrwamûkanaga rûgatuîka nyûnjî inya.

¹¹ Rûnjî rwa mbere rwîtagwa Pishoni; na rwavîtûkagîrîra vûrûrirî wa Havila.

¹² (Kûu vûrûrirî ûcio kûrî thaavu mbaro mûno, maguta manungaga waro na matonekaga narua, na tûthiga twa goro.)

¹³ Rûnjî rwa kaîrî rwîtagwa Gihoni na rûnyûrûrûkaga rûthiûrûrûkîrîtie Ethiopia.

¹⁴ Naruo rûnjî rwa kathatû rwîtagwa Tigiri na rûnyûrûrûkaga rûthiîte mwena wa îrathîro wa Asîria. Rûnjî rwa kana rwîtagwa Farati.

¹⁵ Ngai-Mûnene, Ngai nîwaigire mûndû ûcio mûgûndarî wa Edeni nîguo aûrîmage na aûmenyagîrîre.

¹⁶ Ngai-Mûnene, Ngai nîwerire mûndû atîrî, “Nwa ûrîe matunda ma mîtî yonthe îrîa îrî mûgûndarî ûyû,

¹⁷ tiga matunda ma mûtî ûrîa ûmenyithanagia maûndû maro na macûku. Ndûkanarîe matunda ma mûtî ûcio nîûndû vîndî îrîa ûkaamarîa, nwanginya ûgaakua.”

¹⁸ Nake Ngai-Mûnene, Ngai nîwaugire atîrî, “Tî waro mûndû ûyû ekare arî wenga. Nîngûmûmbîra mûmûtethia ûrîa maganîrîrue nake.”

¹⁹ Kwoguo nîwocire mûthetu kuuma nthî na akîûmba nyamû cionthe na iconi cionthe. Nîwacokire akîivira kûrî mûndû nîguo mûndû oone ûrîa agûituîra marîîtwa. Na wa ûrîa mûndû eetaga kîûmbe wa kîonthe kîrî mwoyo, rîu nîrîo rîatuîkaga rîîtwa rîakîo.

²⁰ Kwoguo mûndû nîwatuîrîre nyamû cia mîthemba yonthe na iconi cia rîerarî marîîtwa. Nwatî mûndû ûcio ndona mûndû maganîrîrwe nake wa kûmûtethia.

²¹ Ngai-Mûnene, Ngai nîwatûmire mûndû mûrûme ûcio amame toro nene mûno, na wa amamiî Ngai-Mûnene, Ngai nîwarutire rûvaru rûmwe kuuma kûrî mûndû ûcio na agîtumania nyama ciake.

²² Ngai-Mûnene, Ngai nîwaûmbire mûndûmûka kuuma rûvarurî rûu na akîmûvira kûrî mûndû mûrûme.

²³ Nake mûndû mûrûme ûcio nîwaugire atîrî, “Rîu rîîrî nî îvîndî riumîte mavîndîrî makwa na nyama ciumîte nyamarî ciakwa. Agetagwa mûndûmûka nîûndû arutîtwe kûrî mûndûmûrûme.”

²⁴ Kwoguo mûndûmûrûme agaatigaga îthe na ng'ina, akanyitana na mûka na oîrî magatuîka ûmwe.

²⁵ Mûndûmûrûme ûcio na mûka maarî njaga nwatî matiegucaga nthoni.