Kîam 19 - ÎVUKU RÎA ÛVORO MWARO

Wîvia wa Sodomu

¹ Araika acio aîrî nîmaathiîre Sodomu kîvwaî, nake Loti eekarîte kîvingorî gîa Sodomu. Rîrîa Loti oonire araika acio, nîwaûkîrire akîthiî kûmatûnga. Nîwenamîrîrie ûthiû wake mbere yao,

² na akiuga atîrî, “Athi akwa, nie nîrî ava nîguo nîmûtungatîre. Nîramûthaitha mûtonye gwakwa nyomba, mwîthambie magûrû na mûrarîrîre. Kîraûko gwakîa nîmûkaaramûka mûthiî.” Nwatî nîmaacokerie Loti atîrî, “Naarî, tue nîtûrara gûkû nja kîvarorî.”

³ Loti nîwathiîre na mbere kûmaringîrîria na mûthiiarî nîmaathiîre nake gwake mûciî. Loti nîwathire ndungata ciake iruge mîgate îno îtarî mîkîre ndawa ya kwimbia. Mîgate yarîkia kûvîa, ageni nîmaarîre.

⁴ Mbere ya ageni mathiî kûmama, arûme onthe a Sodomu kuuma ûrîa mûkûrû nginya ûrîa mûnini, nîmaathiûrûrûkîrie nyomba ya Loti.

⁵ Nao nîmeetire Loti na makîmûria atîrî, “Arûme arîa maûkire gwîkara nawe ûmûnthî ûtukû marî kû? Marute na gûkû nja nîguo tûmenyane nao kîîmwîrî!”

⁶ Nake Loti nîwaumire nja na akîvinga mûrango.

⁷ Nîwacokire akîmeera atîrî, “Arata akwa, nîramûthaitha mûtige gwîka ûndû mûcûku ûguo na wa nthoni!

⁸ Taroriani, nîrî na erîtu akwa aîrî matarî maamenyana kîîmwîrî na mûndû mûrûme. Tiga nîmûretere o na mwîke nao wa ûrîa mûkwenda. Nwatî mûtigeke arûme aya marî gwakwa mûciî wa naarî ûndû. Nî ageni akwa na nwanginya nîmagitîre.”

⁹ Nwatî arûme acio nîmaaugire atîrî, “Twererekere, we ûrî mûgeni gûkû! We ûrî û wa gûtwîra ûrîa tûgwîka? Twererekere kana tûgwîke naaî kûmakîra.” Nao nîmaatindîkire Loti na vuva na makîîvarîria gûtua mûrango.

¹⁰ Nwatî arûme acio aîrî arîa maarî kûu nyomba nîmaaûkire na makîgucia Loti makîmûcokia nyomba na makîvinga mûrango.

¹¹ Nîmaacokire magîtûma arûme onthe arîa maarî nja, mûnene na mûnini matuîke ndumumu nîguo matikavote kwona mûrango.

Loti nîwaumire Sodomu

¹² Andû acio aîrî nî meerire Loti atîrî, “Ethîrwa ûrî na andû engî gûkû, ciana ciaku cia erîtu na anake, andû arîa magûranîte gwaku, kana mûndû wa wonthe wîtanîtue nawe na wîkaraga îtûûrarî rîîrî, mathengutie gûkû,

¹³ nîûndû nîtûgûcûkangia îtûûra rîîrî. Ngai-Mûnene nîwîguîte maûndû macûku marîa andû marîtie megiî andû a îtûûra rîîrî rîa Sodomu na nîatûtûmîte tûrîcûkangie.”

¹⁴ Loti nîwacokire akîthiî kûrî arûme arîa maarî mavikie erîtu ake na akîmeera atîrî, “Îîvarîrieni narua muume îtûûrarî rîîrî, nîûndû Ngai-Mûnene nîwîvarîrîtie kûrîcûkangia.” Nwatî meeciragia nî îtherû aarî narîo.

¹⁵ Kîraûko tene araika acio nîmeerire Loti atîrî, “Ûkîra narua woce mûka waku na erîtu aku aîrî mûre, nîguo mûtikathiranîrue vamwe na îtûûra rîîrî.”

¹⁶ Loti ndeka ûndû ûcio na îvenya. Nwatî Ngai-Mûnene nîwamwîguîrîre ntha. Kwoguo arûme acio aîrî nîmaanyitire Loti, mûka, na erîtu ake aîrî njara na makîmaruta nja ya îtûûra rîu.

¹⁷ Nîmaacokire makîmeera atîrî, “Vinyûrani mwîvonokie! Mûtikarorie vuva kana mûrûngama wanarî vandû Kîamndarî. Vinyûrani na kûu irîmarî nîguo mûtikaûragwe.”

¹⁸ Nwatî Loti nîwerire araika acio atîrî, “Naarî athi akwa, mûtigatûme twîka ûguo.

¹⁹ Mue nîmûmonetie ntha nyîngî na mwavonokia mwoyo wakwa. Nwatî irîma irî kûraca mûno na navota gûkuîra njîrarî ndarî mûkinyu kuo.

²⁰ Taroria gatûûra kaarîa karî vakuvî mûno. Kwoguo tiga nthiî kuo nîûndû wana ethîrwa nî kanini nîngûvonokia mwoyo wakwa.”

²¹ Mûraika nîwacokerie Loti atîrî, “Îka guo nînetîkîra. Tînjûkangia gatûûra kau.

²² Îka narua! Wîthare ûthiî kuo; nîûndû gûtirî wa naarî ûndû nîngîka ûtakinyîte kuo.” Gatûûra kau geetirwe Zoari, nîûndû Loti aaugire nî kanini.

Ngai nîwacûkangirie Sodomu na Gomora

²³ Loti aakinyire Zoari riûa rîkîratha.

²⁴ Na wa rîmwe Ngai-Mûnene nîwaurithirie mwaki wa ûviriti ta mbura kuuma îgûrû, matûûrarî ma Sodomu na Gomora.

²⁵ Matûûra mau, Kîamnda kîonthe, andû arîa maatûûraga kuo vamwe na indo cionthe irîa ciamerete kuo nîciacûkangirue.

²⁶ Nwatî mûka wa Loti, arî vuva wake nîwaroririe vuva na agîtuîka gîtugî gîa cumbî.

²⁷ Mûthenya ûcio warûmîrîrîte kîraûko tene, Iburahimu nîwathiîre varîa maarûngamîte na Ngai-Mûnene.

²⁸ Nîwaroririe nthî matûûrarî ma Sodomu na Gomora wana Kîamnda kîonthe, na akîona ndogo îkîthiî na îgûrû yumîte nthî. Yekariî ta ndogo îrîa yumaga mwakirî mûnene mûno.

²⁹ Kwoguo rîrîa Ngai aacûkangagia matûûra marîa maarî Kîamnda kîu kûrîa Loti aatûûraga, nîwaririkanire Iburahimu na agîtûma Loti ethare nîguo ndakaûragwe.

Kiumo kîa Amoabu na Aamoni

³⁰ Loti nîwetigîre gûtûûra Zoari. Kwoguo nîwocire erîtu ake aîrî, makiunûkia irîmarî na magîtûûra ngurungarî.

³¹ Mwîrîtu wake ûrîa mûkûrû nîwerire ûrîa warî mûnini atîrî, “Vava nî mûkûrû na gûkû nthî kuonthe gûtirî na arûme a gûtûvikia nîguo tûgîe na ciana.

³² Tiga tûve vava ndivei arîwe nîguo tûmame nake tûgîe na ciana.”

³³ Ûtukû ûcio nîmaavere îthe ndivei. Mwîrîtu ûrîa mûkûrû nîwamenyanire kîîmwîrî na îthe. Nwatî îthe aarî mûrîe mûno nî ndivei na ndaamenya ûrîa gwekîkire.

³⁴ Mûthenya ûcio wîngî mwîrîtu ûcio mûkûrû nîwerire ûrîa mûnini atîrî, “Vwaî nînie nîramenyanire kîîmwîrî na vava. Tiga tûmûve ndivei rîngî ûmûnthî nîguo arîwa nawe ûmenyane nake kîîmwîrî, na tuoîrî nîtûkûgîa ciana na vava.”

³⁵ Kwoguo ûtukû ûcio erîtu acio nîmaavere îthe ndivei na mwarî ûcio mûnini nîwamenyanire kîîmwîrî na îthe. Wanarîo vîndî îo îthe aarî mûrîe mûno nî ndivei na ndaamenya ûrîa gwekîkire.

³⁶ Nao erîtu acio oîrî a Loti nîmaagîre mavu na îthe wao.

³⁷ Mwîrîtu ûcio mûkûrû nîwaciarire kavîcî na agîgeta Moabu. Ûcio nîke îthe wa Amoabu nginya ûmûnthî.

³⁸ Nake mwîrîtu ûcio mûnini nîwaciarire kaana ga kavîcî na agîgeta Benami. Ûcio nîke îthe wa Aamoni nginya ûmûnthî.