Kîam 18 - ÎVUKU RÎA ÛVORO MWARO

Iburahimu nîwerîrwe mwana wa kavîcî

¹ Iburahimu arî mîtîrî mîamûre ya Mamure nîwaumîrîrwe nî Ngai-Mûnene. Iburahimu ekarîte mûromorî wa îgema rîake. Îthaarî rîu riûa rîarîte mûno.

² Iburahimu nîwaroririe, na wa rîmwe nîwonire arûme athatû marûngamîte mbere yake. Rîrîa aamoonire nîwavinyûrire kûmatûnga, na akînamîrîria agîturumithia ûthiû wake nthî vau mbere yao,

³ na akiuga atîrî, “Athi akwa nîramûthaitha mûtikathiî mûtavîtûkîrîrîte gwakwa nie ndungata yenyu.

⁴ Tigani nîmûretere manjî mwîthambie magûrû na mûvurûke rungu rwa mûtî ûyû.

⁵ Wana nîngûmûretere tûirio tûnini, nîguo mwarîa mûgîe na vinya wa kûthiî na mbere na rûgendo rwenyu nîûndû nî mwamva gîtîîo mwaûka gwakwa mûciî, kwoguo tigani nîmûtungatîre.” Nao nî maamûcokerie atîrî, “Nîwaro nî twetîkîra.”

⁶ Iburahimu nîwavinyûrire îgemarî na akîra Sara atîrî, “Oca narua mûtu waku ûrîa mwaro mûno wa ngano ûûkande ûmarugîre mîgate.”

⁷ Iburahimu nîwavinyûrire ndîthiarî yake na agîoca njaû îrîa yarî na nyama ndotu na yarî noru, na akîmînenganîra kûrî ndungata ciake ikamîthînje.

⁸ Iburahimu nîwocire maguta ma îriia, na îriia, na nyama, akîvirîra andû acio marîe. Nake nîwarûngamire varî o, nao nî maarîre marî vau rungu rwa mûtî.

⁹ Nao andû acio nîmaaûririe Iburahimu atîrî, “Mûkaguo Sara arî kû?” Nake nîwamacokerie atîrî, “Arî kûrîa îgemarî.”

¹⁰ Ngai-Mûnene nîwaugire atîrî, “Vuva wa mîeri kenda kuuma rîu, nîngaacoka, na mûkaguo Sara nîakaagîa na mwana wa kavîcî.” Sara aarûngamîte mûrangorî wa îgema arî vuva wa Iburahimu athikîrîrîtie.

¹¹ Iburahimu na Sara maarî akûrû, na Sara nîwavîtûkîtie mavinda make ma mweri.

¹² Kwoguo Sara nîwathekire ke mwene na akiuga atîrî, “Rîu nîrî mûkûrû na mûthuuriwa nî mûkûrû, nwa ngenerere kûmenyana nake kîîmwîrî?”

¹³ Nake Ngai-Mûnene nîwaûririe Iburahimu atîrî, “Nîndûî gîtûmire Sara atheka na auga, ‘Nwa kûvoteke nie ngîe kaana nîrî mûkûrû ûguo?’

¹⁴ Kûrî ûndû Ngai-Mûnene atangîvota gwîka? Wata ûrîa nauga, nî ngaacoka vuva wa mîeri kenda kuuma rîu, na Sara nîakaagîa na kamwana.”

¹⁵ Sara nîwetigîre, kwoguo nîwakaanire na akiuga atîrî, “Nie ndinatheka.” Nwatî Ngai-Mûnene nîwamwîrire atîrî, “Naarî we nîûthekire.”

Iburahimu nîwathaithire Ngai ndakathirie Sodomu

¹⁶ Arûme acio athatû nîmaaumire kûu, na makîthiî merekerete Sodomu, nake Iburahimu nîwamaumagaririe.

¹⁷ Marî wa vau Ngai-Mûnene nîweîrire atîrî, “Ndingîthitha Iburahimu ûrîa nîrenda gwîka,

¹⁸ nîûndû njiarwa ciake nîigaatuîka rûrîrî rûnene na rwa vinya. Nîngaarathima ndûrîrî cionthe cia nthî na njîra yake.

¹⁹ Nie nîmûthuurîte nîguo athe ciana ciake na njiarwa ciake imbathîkagîre, na ciîkage maûndû ma ûthingu na ma kîvooto. Ethîrwa nîmagwîka ûguo nîngaavingia maûndû monthe marîa nerîre Iburahimu.”

²⁰ Ngai-Mûnene nîwacokire akîra Iburahimu atîrî, “Nîmbîguîte maûndû macûku megiî andû a Sodomu na Gomora na wîvia wao nî mûnene mûno.

²¹ Nîngûnyûrûrûka kuo nîguo ngamenye kana maûndû mau mbîguîte atî nîmekîte nî ma ma.”

²² Vuva wa ûguo arûme acio aîrî nîmaathiîre na mbere na rûgendo merekerete Sodomu. Nwatî Ngai-Mûnene nîwatigirwe marî na Iburahimu.

²³ Iburahimu nîwathiîre kûrî Ngai-Mûnene na akîmûria atîrî, “Ûgacûkangia andû arîa acûku wa vamwe na arîa aro?

²⁴ Ethîrwa kûrî na andû mîrongo îtano aro gûkû îtûûrarî, nîûgûcûkangia îtûûra rîonthe na ûrege kûrîvonokia nîûndû wa andû mîrongo îtano arîa athingu marî kuo?

²⁵ Nama ndûngîka ûguo. Ndûngîcûkangia andû arîa athingu vamwe na arîa matarî athingu. Ûngîka ûguo, andû arîa aro makaaverithagua vamwe na arîa acûku. We ndûngîka ûguo. Mûndû ûrîa ûtucagîra nthî yonthe ciira nwanginya eke guo na kîvooto.”

²⁶ Ngai-Mûnene nîwacokirie atîrî, “Ethîrwa nîngoona andû mîrongo îtano athingu îtûûrarî rîa Sodomu, nîngaavonokia îtûûra rîonthe nîûndû wao.”

²⁷ Nake Iburahimu nîwaririe rîngî akiuga atîrî, “Ngai-Mûnene njovera nîûndû wa kûmîrîria kûthiî na mbere na gûkwarîria. Nie nîrî mûndû tu na ndiagîrîrwe nî gûkwîra wanarî ûndû.

²⁸ Nwatî ethîrwa kûrî na andû mîrongo îna na atano athingu, nwa ûcûkangie îtûûra rîonthe nîûndû wa andû acio engî atano matarî vo?” Ngai-Mûnene nîwacokirie atîrî, “Ndigaacûkangia îtûûra rîu ethîrwa kûrî na andû mîrongo îna na atano athingu.”

²⁹ Iburahimu nîwaûririe rîngî atîrî, “Narîo ethîrwa kûrî na andû mîrongo îna tu athingu?” Ngai-Mûnene nîwamûcokerie atîrî, “Ethîrwa kûrî na andû mîrongo îna athingu ndikaarîcûkangia.”

³⁰ Iburahimu nîwathiîre na mbere kuga atîrî, “Nakûthaitha Ngai-Mûnene ndûkarakare nîûndû nwanginya mbarie rîngî. Narîo ethîrwa kûrî na andû mîrongo îthatû tu aro?” Nake Ngai-Mûnene nîwaugire atîrî, “Ethîrwa nwa mone andû mîrongo îthatû athingu, ndikaarîcûkangia.”

³¹ Iburahimu nîwaugire atîrî, “Nakûthaitha Ngai-Mûnene ûnjovere nîûndû wa kûmîrîria kûthiî na mbere gûkwarîria. Narîo ethîrwa kûrî na andû mîrongo îîrî tu athingu?” Nake Ngai-Mûnene nîwaugire atîrî, “Nîngîona andû mîrongo îîrî tu aro, ndikaarîcûkangia.”

³² Iburahimu nîwaugire rîngî atîrî, “Nakûthaitha Ngai-Mûnene ndûkarakare, tiga mbarie riita rîmwe tu. Narîo ethîrwa nî andû îkûmi aro atigaru?” Nake Ngai-Mûnene nîwaugire atîrî, “Nîngîona andû îkûmi athingu ndikaarîcûkangia.”

³³ Rîrîa Ngai-Mûnene aarîkirie kwaria na Iburahimu nîwathiîre, nake Iburahimu akînûka.