Kîam 10 - ÎVUKU RÎA ÛVORO MWARO

Njiarwa cia anake a Nuhu

¹ Ino nîcio njiarwa cia anake a Nuhu: Shemu, Hamu na Jafethi. Maagîre na anake ao vuva wa manjî gwîcûra nthî.

² Ariû a Jafethi maarî: Gomeri, Magogu, Madai, Javani, Tubali, Mîsheki na Tirasi.

³ Nao anake a Gomeri maarî: Ashikenazi, Rifathu, na Togarima.

⁴ Nao anake a Javani maarî: Elisha, Sipania, Kuporo, na Rodo.

⁵ Anake acio a Javani nîo methe ma andû arîa maatûûraga ndeererî cia îria na icîgîrîrarî. Icio nîcio njiarwa cia Jafethi irîa itûûraga wa andû vûrûrirî wao kûringana na mûvîrîga wao wana mwarîrie wao.

⁶ Anake a Hamu maarî: Kushi, Misiri, Lîbia na Kanaani.

⁷ Anake a Kushi maarî: Seba Havila, Sabuta, Raama na Sabuteka. Njiarwa cia Raama marî andû a Sheba na Dedani.

⁸ Kushi nîwagîre na kaana getagwa Nimurodi. Nimurodi nîke warî mûndû wa mbere kwîthîrwa arî njamba gûkû nthî.

⁹ Nimurodi nîwatethirue nî Ngai-Mûnene kwîthîrwa arî mûguîmi mûnene gûkû nthî. Kwoguo nîkwîragwa atîrî, “Ngai-Mûnene arogûtua mûguîmi mûnene ta Nimurodi!”

¹⁰ Ûthamaki wake wambîrîrîtie Babuloni, Ereki, Akadi. Matûûra mau monthe maarî vûrûrirî wa Babuloni.

¹¹ Kuuma kûu Nimurodi nîwathiîre vûrûrirî wa Asîria agîtuma matûûra ma Nineve, Rehobothi, Iri na Kala.

¹² Nîwacokire agîtuma îtûûra rîa Reseni, rîrîa rîrî gatagatî ka Nineve na îtûûra înene rîa Kala.

¹³ Misiri nîke watuîkire îthe wa andû a Ludi, Anamimu na Lehabi, Nafutuhi,

¹⁴ Pathirusi, Kasuluhi, na Kirete. Afilisiti nî njiarwa cia andû a Kirete.

¹⁵ Ariû a Kanaani maarî Sidoni, ûrîa warî mûkûrû, Hethi,

¹⁶ Jebusi, Aamori Agirigashi,

¹⁷ Ahivi, Arakiti na Asinita.

¹⁸ Arivadi, Azemari, na Ahamathi. Mîvîrîga mîthemba na mîthemba ya Akanaani nîyatambire îgîkinya kûndû kwîngî.

¹⁹ Wana nginya mîvaka yao nîyakinyire Sidoni, mwena wa îveti wa Gerari, nginya îgîkinya Gaza, na mwena wa îrathîro ûthiîte Sodomu, Gomora, Adima na Zeboimu vakuvî na Lasha.

²⁰ Ino nîcio njiarwa cia Hamu, na meekaraga wa mûndû vûrûrirî wao, kûringana na mûvîrîga wao na mwarîrie wao.

²¹ Shemu, aarî mûrwang'ina ûrîa mûkûrû wa Jafethi. Shemu nîke îthe wa njiarwa cionthe cia Eberi.

²² Ariû a Shemu maarî; Elamu, Ashuri, Aripakishadi, Ludi na Aramu.

²³ Ariû a Aramu maarî; Uzi, Huli, Getheri na Mesheki.

²⁴ Nake Aripakishadi aarî îthe wa Shela nake Shela aarî îthe wa Eberi.

²⁵ Eberi nîwagîre na anake aîrî nao maarî: Pelegi, nîûndû aatûûraga vîndî îrîa andû a nthî maarî agaûkanu. Ûcio wîngî eetagwa Jokitani.

²⁶ Jokitani aarî îthe wa: Alimodadi na Shelevu na Hazarimavethi Jera,

²⁷ Hadoramu, Uzali, na Dikila.

²⁸ Obali Abimaeli na Sheba,

²⁹ Ofiri, Havila na Jobabu. Acio onthe maarî njiarwa cia Jokitani.

³⁰ Vûrûri ûrîa maatûûraga waumîte Mesha nginya Sefara mwena wa îrathîro ûrîa ûrî irîma.

³¹ Acio nîo maarî anake a Shemu kûringana na mîvîrîga yao, nthiomi ciao na mavûrûri mao.

³² Andû acio onthe nî njiarwa cia Nuhu, wa rûrîrî kûringana na njiarwa ciaruo. Vuva wa manjî meengî marîa meecûrîte nthî, ndûrîrî cionthe cia nthî ciaumire kûrî Ariû a Nuhu.