Kîam 1 - ÎVUKU RÎA ÛVORO MWARO

Kûmbwa kwa indo cionthe

¹ Kîambîrîriarî Ngai nîwaûmbire îgûrû na nthî.

² Nayo nthî ndîarî ûrîa yekariî, na ndîarî na kîndû. Manjî meengî maakunîkîrîte kûndû kuonthe, nayo nduma yarî kûndû kuonthe. Vinya wa Ngai nîguo warî îgûrû rîa manjî mau.

³ Nake Ngai nîwaugire atîrî, “Nî kûgîe ûtheri;” nakuo nîkwagîre na ûtheri.

⁴ Ngai nîwonire atî ûtheri nî mwaro; na akîgaania ûtheri na nduma.

⁵ Ngai nîwetire ûtheri “Mûthenya” nayo nduma akîmîta “Ûtukû.” Nakuo nîgwatukire na gûgîcoka gûgîkîa. Ûcio nîguo warî mûthenya wa mbere.

⁶ Ngai nîwacokire akiuga atîrî, “Nî kûgîe mwanya gatagatîrî ka manjî, nîguo wamûranie manjî maita maîrî.”

⁷ Nake Ngai nîwekîrire mwanya naguo ûkîamûrania manjî marîa maarî îgûrû rîaguo na marîa maarî rungu rwaguo. Na gûgîtuîka guo.

⁸ Ngai nîwetire mwanya ûcio “Îgûrû.” Nakuo gûgîtuka na gûgîcoka gûgîkîa. Ûcio nîguo warî mûthenya wa kaîrî.

⁹ Nake Ngai nîwaugire atîrî, “Manjî marîa marî rungu rwa matu nîmacokanîrîre vamwe nîguo nthî nyûmû yumîre.” Na gûgîtuîka guo.

¹⁰ Ngai nîwetire nthî nyûmû “Nthî” namo manjî mau maacokanîrîrîte vamwe akîmeta “Îria.” Nake Ngai nîwonire ûndû ûcio ûrî mwaro.

¹¹ Ngai nîwacokire akiuga atîrî, “Nthî nîîrute mîmera ya mîthemba yonthe; mîmera îrîa îciaraga mvîndî na mîmera îrîa îciaraga matunda marî na mvîndî, na mîthemba yonthe ya mîmera.” Na gûgîtuîka wa guo.

¹² Nthî nîyarutire mîmera ya mîthemba yonthe. Nake Ngai nîwonire ûcio ûrî ûndû mwaro.

¹³ Nakuo nîgwatukire na gûgîcoka gûgîkîa. Ûcio nîguo warî mûthenya wa kathatû.

¹⁴ Ngai nîwacokire akiuga atîrî, “Nîkûgîe motheri matuurî îgûrû ma kwamûranagia mûthenya na ûtukû na monanagie mavinda, mîthenya, na mîaka.

¹⁵ Motheri mau magaakengaga marî matuurî îgûrû, na magaatûmaga nthî kûgîe na ûtheri.” Na gûgîtuîka guo.

¹⁶ Kwoguo Ngai nîwathondekire motheri maîrî manene. Riûa rîathage mûthenya na mweri wathage ûtukû. Nîwacokire akîthondeka njata.

¹⁷ Ngai nîwaigire motheri mau kûu îgûrû nîguo matûmage nthî kûgîe na ûtheri,

¹⁸ mathage mûthenya na ûtukû na mamûranie ûtheri na nduma. Nake Ngai nîwonire atî ûndû ûcio warî mwaro.

¹⁹ Nakuo nîgwatukire na gûgîkîa. Ûcio nîguo warî mûthenya wa kana.

²⁰ Nake Ngai nîwaugire atîrî, “Manjîrî nî gwîcûre ciûmbe irîa irî mwoyo cia mîthemba mîîngî, nakuo rîerarî gwîcûre iconi.”

²¹ Kwoguo Ngai nîwaûmbire nyamû irîa nene mûno cia îriarî, nyamû cionthe irîa ciîkaraga manjîrî, na mîthemba yonthe ya iconi. Nake Ngai nîwonire atî ûndû ûcio warî mwaro.

²² Ngai nîwarathimire ciûmbe icio na agîciîra atîrî, “Ciaranani na mwîngîve na mwîcûre îriarî, nacio iconi ciîngîve gûkû nthî.”

²³ Nakuo nîgwatukire na gûgîcoka gûgîkîa. Ûcio nîguo warî mûthenya wa gatano.

²⁴ Ngai nîwacokire akiuga atîrî, “Nthî nîkûgîe ciûmbe cia mîthemba yonthe; nîkûgîe nyamû irîa tûrîthagia mîciî; na nyamû cia kîthaka nene na nini. Na gûgîtuîka guo.”

²⁵ Kwoguo Ngai nîwaûmbire indo icio cionthe na agîkenua nî ûguo.

²⁶ Ngai nîwacokire akiuga atîrî, “Nîtûmbeni mûndû ûvanene natue na wîkariî tatue. Nake akaathaga nthamaki, iconi, na nyamû cionthe irîa ciîkaraga mîciî na cia kîthaka nini na nene.”

²⁷ Kwoguo Ngai nîwaûmbire andû mavana take. Aamaûmbire marî mûndû mûrûme na mûndû mûka.

²⁸ Ngai nîwamarathimire na akîmera atîrî, “Ciaranani mwîcûre nthî nthî yonthe na mûmîtoorie; mwathage nthamaki, iconi na nyamû cionthe.

²⁹ Nînamûva mîtî ya mîthemba yonthe îrîa îciaraga mvîndî, na matunda ma mîthemba yonthe irî irio cienyu cia kûrîa.

³⁰ Nwatî nînava nyamû cionthe cia kîthaka, na iconi cionthe nyaki na mîtî îrîa îrî mathangû irîcage.” Na gûgîtuîka guo.

³¹ Ngai nîwaroririe indo cionthe irîa aaûmbire na akîona irî mbaro. Nakuo nîgwatukire na gûgîcoka gûgîkîa. Ûcio nîguo warî mûthenya wa gatandatû.