Josh 9 - ÎVUKU RÎA ÛVORO MWARO

Andû a Gibeoni nîmaavenirie Joshua

¹ Ûvootani wa andû a Isiraeli nîwamenyirwe nî athamaki onthe arîa maarî mwena wa îthûîro wa Jorodani, mavûrûri marîa maarî irîmarî, ciandarî na arîa maarî rûtererî rwa îria rîa Mediterania nginya mwena wa rûgûrû wa Lebanoni. Acio onthe maarî: mûthamaki wa Ahiti, Amori, Akanaani, Aperizi, Ahivi na wa Jebusi.

² Onthe nîmeeturanîre vamwe nîguo marûe na Joshua na andû a Isiraeli.

³ Andû a Gibeoni nîmeguire ûrîa Joshua eekîte matûûra ma Jeriko na Ai

⁴ na nîmaavangire mamûveenie. Nîmaathiîre na magîoca irio na magîciîkîra makuniarî matuîkangu na nîmeekîrire ndivei mboororî ino ngûrû na irî na iraka. Nîmaacokire magîkuuithia mvunda ciao mîrigo îo.

⁵ Nao nîmeekîrire nguo ciarî ndembûkangu na iratû ciarî nthiru na irî na iraka. Nayo mîgate îrîa maakuuire yarî mîûmû na yarî mîgundu.

⁶ Andû a Gibeoni nîmaathiîre Giligali kûrîa Joshua na andû a Isiraeli maambîte magema mao na makîmeera atîrî, “Tue tumîte vûrûri wa kûraca na tûrenda mûrûthe kîrîkanîro natue.”

⁷ Nwatî andû a Isiraeli nîmeerire Aahivi acio atîrî, “Tûngîrûtha kîrîkanîro namue atîa na nwa kwîthîrwa mûtûûraga gûkû tûrî?”

⁸ Nao andû acio nîmeerire Joshua atîrî, “Tue tûrî ndungata ciaku.” Nake Joshua nîwacokire akîmaûria atîrî, “Mue mûrî a na muumîte kû?”

⁹ Nao nîmaacokerie Joshua atîrî, “Mwathi wetû tue tumîte vûrûri wa kûraca mûno. Tûkîte nîûndû nîtwîguîte ngumo ya Ngai-Mûnene, Ngai wenyu. Nîtwîguîte ûvoro wa maûndû marîa monthe eekire vûrûrirî wa Misiri.

¹⁰ Wana nîtwîguîte ûvoro wa maûndû marîa monthe eekire athamaki arîa aîrî a Amori arîa maarî mûringo wa Jorodani. Athamaki acio maarî: Sihoni mûthamaki wa Heshiboni na Ogu mûthamaki wa Bashani ûrîa watûûraga Ashitarothu.”

¹¹ Agibeoni acio nîmeerire Joshua atîrî, “Atongoria etû na andû arîa matûûraga vûrûrirî wetû nîmatwîrire tûkuue irio nîûndû wa rûgendo nîguo tûke tûcemanie namue. Matwîrire twaûka tûmûrie mwîtîkîre tûtuîke ndungata cienyu na mûthondeke kîrîkanîro natue.

¹² Taroria mîgate yetû. Tûkiuma mûciî nîguo tûke tûcemanie namue yarî na ûrugarî. Nwatî rîu nîno mîûmû na nîmîgundu.

¹³ Rîrîa twekîrire ndivei mboororî, mbooro ciarî ino njerû na rîu nîndembûkangu. Nguo cietû na iratû wana cio itembûkangîte nîûndû nîtûthiîte rûgendo rûraca.”

¹⁴ Nao atongoria a Isiraeli nîmaamûkîre irio imwe kuuma kûrî andû a Gibeoni. Andû a Isiraeli nîmeetîkîre kûrûtha kîrîkanîro mbere ya gûtuîria ûvoro wakîo kuuma kûrî Ngai-Mûnene.

¹⁵ Joshua nîwarûthire kîrîkanîro Kîam thayû na andû a Gibeoni na akîreka matûûre mwoyo. Nao atongoria a andû a Isiraeli nîmeevîtire na makîranîra atî nîmakûmenyerera kîrîkanîro kîu maarûthire.

¹⁶ Mîthenya îthatû nîyavîtûkire andû a Isiraeli na andû a Gibeoni marîkia kûrûtha kîrîkanîro. Nao andû a Isiraeli nîmaamenyire atî andû acio matûûraga gûkuvî nao.

¹⁷ Kwoguo andû a Isiraeli nîmaambîrîrie rûgendo na vuva wa mîthenya îthatû nîmaakinyire matûûrarî marîa andû acio. Matûûra mau metagwa Gibeoni, Kefira, Beerothi na Kiriathu-jearimu.

¹⁸ Nwatî andû a Isiraeli matiaûraga andû a Gibeoni nîûndû wa kîrîkanîro kîrîa atongoria ao maathondekete nao makîgwetaga rîîtwa rîa Ngai-Mûnene, Ngai wa Isiraeli. Andû onthe a Isiraeli nîmaanegenirie atongoria ao nîûndû wa ûndû ûcio.

¹⁹ Nwatî atongoria a Isiraeli nîmaamacokerie atîrî, “Tue nîtwarûthire kîrîkanîro na andû a Gibeoni rîîtwarî rîa Ngai-Mûnene, Ngai wa Isiraeli. Kwoguo tûtingîmeka ûndû mûcûku.

²⁰ Nwanginya tûreke matûûre mwoyo nîûndû wa kîrîkanîro gîetû, na ethîrwa tîtwîka guo Ngai nîagûtûverithia.

²¹ Tigana nao matûûre mwoyo, nwatî nwanginya matuunagîre ngû na matûtavagîre manjî.” Ûguo nîguo atongoria a Isiraeli maaugire.

²² Joshua nîwatûmanîre andû a Gibeoni na nîwaugire mavirwe kûrî ke. Nake nîwamaûririe atîrî, “Mwatûvenirie nîkî na mûgîtwîra atî muumîte kûndû kûraca wa rîrîa mûtûûraga gûkû?

²³ Nîûndû wa ûguo mwekire, nîmwagwatwa nî kîrumi. Andû enyu magatûûraga marî ngombo, maunage ngû na matavage manjî ma nyomba ya Ngai wakwa.”

²⁴ Nao nîmaacokerie Joshua atîrî, “Twekire ûguo nîûndû nîtwamenyete nama atî Ngai-Mûnene, Ngai wenyu nîwathîte ndungata yake Musa atî aûrage andû onthe arîa matûûraga vûrûrirî ûyû na atî nîakaamûva guo ûtuîke wenyu. Kwoguo nîtwetigîre na nîkîo gîatûmire twîka ûguo.

²⁵ Tue rîu tûrî njararî cienyu. Twîke ûrîa mûkwona kwagîrîrîte.”

²⁶ Kwoguo Joshua nîwamagitîre na ndeetîkîra andû a Isiraeli mamaûraga.

²⁷ Nwatî mûthenya ûcio Joshua nîwatuire andû a Gibeoni ngombo na nîmaatuîkire a kunagîra andû a Isiraeli ngû na kûmatavîra manjî na gûtavîra metha ya kîgongoona ya Ngai-Mûnene manjî. Nginya ûmûnthî ûcio nîguo wîra ûrîa matûûraga marutagîra vandû varîa vamûre va kûgoocera Ngai.