Josh 8 - ÎVUKU RÎA ÛVORO MWARO

Ai nîyanyitirwe na îkîomomorwa

¹ Ngai-Mûnene nîwerire Joshua atîrî, “Oca athigari onthe unûkie ûthiî Ai. Ndûkamake kana wîtigîre. Nîngûtûma ûvoote mûthamaki wa Ai na andû ake, îtûûra na vûrûri wake ûtuîke waku.

² Mûgeeka îtûûra rîa Ai vamwe na mûthamaki warîo wata ûrîa mwekire îtûûra rîa Jeriko na mûthamaki warîo. Nwatî vîndî îno nwa mwîigîre indo irîa mûgaatava kuo na nyamû cia kûrîthia. Îîvarîrie kûtharîkîra îtûûra rîu wa rîmwe kuuma na mwena wa vuva.”

³ Kwoguo Joshua nîwaûkîrire na akîîvarîria kûthiî Ai na athigari ake onthe. Nîwathuurire athigari arîa maarî njamba ngiri mîrongo îthatû (30,000) na nîwamatûmire mathiî ûtukû

⁴ na akîmera atîrî, “Îîthitheni mwena ûrîa wîngî wa îtûûra rîa Ai na mûtikathiî kûraca narîo na mwîthîrwe mwîvarîrîtie kûrîtharîkîra.

⁵ Nie na athigari arîa tûrî nao tûgaakuvîvîria îtûûra. Na rîrîa andû a Ai magaaûka kûrûa natue, tûkaaûra wata ûrîa twekire mbere.

⁶ Nao nîmagaatûvinyûria natue tûre tûthiîte werûrî tûmarute îtûûrarî. Nîmageciria nîkûra tûraûra nîo ta ûrîa twaûrire mbere.

⁷ Namue nîmûkaauma kûrîa mûkethîrwa mwîthithîte, mûtharîkîre îtûûra na mûrînyite. Ngai-Mûnene, Ngai wenyu nîakaarîvecana kûrî mue.

⁸ Mwarîkia kûnyita îtûûra rîu, nîmûkaarîmundia mwaki wata ûrîa Ngai-Mûnene amwathîte. Ûguo nîguo namwatha”

⁹ Kwoguo Joshua nîwamatûmire, nao nîmaathiîre makîîthitha. Na nîmeekarire vo metererete marî gatagatî ka Ai na Betheli, Ai îrî mwena wa îthûîro. Nwatî Joshua aararire ûtukû ûcio kûrîa maambîte magema marî na andû acio engî.

¹⁰ Mûthenya ûcio wîngî kîraûko tene Joshua nîwaûkîrire na agîîta athigari vamwe. Ke na atongoria a andû a Isiraeli nîmaamatongorerie mathiîte Ai.

¹¹ Nao athigari onthe arîa maarî na Joshua nîmaaunûkirie magîkuvîvîria îtûûra rîa Ai na makîamba magema mao mwena wa rûgûrû wa îtûûra rîu. Gatagatî kao na Ai vaarî na Kîamnda.

¹² Ke nîwocire andû ta ngiri ithano na nîwamaigire methithîte vandû gatagatî ka Ai na Betheli, mwena wa îthûîro wa îtûûra rîa Ai.

¹³ Athigari onthe nîmaaigîtwe mevarîrîtie kûrûa, gîkundi kîrîa kînene kîrî mwena wa rûgûrû wa îtûûra rîa Ai, nao acio engî marî mwena wa îthûîro. Ûtukû ûcio Joshua aararire Kîamndarî.

¹⁴ Rîrîa mûthamaki wa Ai oonire athigari a Joshua, nîwaûkîrire na îvenya kîraûko tene arî na athigari ake nîguo makarûe na athigari a Joshua. Mûthamaki wa Ai na andû ake nîmaathiîre merekerete Kîamndarî Kîam Jorodani nîguo makarûe na andû a Isiraeli wa varîa maarûîrîte mbere. Nwatî matiamenyaga atî kwarî na athigari engî a Isiraeli meethithîte vuva wa îtûûra.

¹⁵ Joshua na andû ake nîmaamaveneererie atî nîmavootwa na makîambîrîria gûcoka na vuva na makîûra merekerete werûrî.

¹⁶ Kwoguo andû onthe arîa maarî îtûûrarî nîmeetirwe vamwe nîguo mavinyûrie andû a Isiraeli. Na wa ûrîa maavinyûranagia na Joshua nwaguo maaracavagîrîria îtûûra rîa Ai.

¹⁷ Gûtirî mûndû mûrûme wana ûmwe watigîtwe Ai kana Betheli. Onthe nîmaathiîte gûkinyîra andû a Isiraeli na nîmaatigire ivingo cia îtûûra îrî mvingûre.

¹⁸ Ngai-Mûnene nîwacokire akîra Joshua atîrî, “Orotithia îtumû rîaku rîu ûnyitîte îtûûrarî rîa Ai, nîûndû nîngûtûma ûrîvoote.” Joshua nîworotithirie îtumû rîake na kûu Ai wata ûrîa eerirwe.

¹⁹ Vîndî îrîa aaûkîrîrie njara yake, athigari arîa meethithîte nîmaaumbuthûkire na îvenya na magîtonya îtûûrarî na makîrînyita, na warîo makîrîmundia mwaki.

²⁰ Vîndî îrîa andû a Ai maaroririe na vuva, nîmoonire îtûûra rîao rîkiuma ndogo yunûkîtie na îgûrû matuurî. Nao athigari a Isiraeli arîa maaûrîte mathiîte werûrî, nîmaamavûgûkîre na makîtharîkîra andû a Ai na matingîavotire kûûra.

²¹ Joshua na andû ake onthe mona atî athigari arîa marethithîte nîmanyita îtûûra na atî ndogo kuuma mwakirî ûrîa warîvîvagia îraunûkia îthiîte matuurî nîmaagarûrûkire na makîûraga andû a Ai.

²² Nao Aisiraeli arîa maarî îtûûrarî nîmaanyûrûrûkire nîguo magatethanie na arîa engî. Kwoguo andû a Ai nîmaathiûrûrûkîrue nî andû a Isiraeli na onthe makîûragwa. Gûtirî mûndû watigarire onthe nîmaaûragirwe,

²³ tiga mûthamaki wa Ai. Anyitwa nîwavirirwe arî mwoyo kûrî Joshua.

²⁴ Andû a Isiraeli nîmaaûragire nthû ciao cionthe irîa ciamarûmîrîrîtie nginya werûrî. Marîkia kûûraga acio, nîmaacokire makîthiî îtûûrarî rîa Ai na makîûraga andû onthe arîa maatigarîte kuo.

²⁵ Andû onthe a Ai arîa maaûragirwe mûthenya ûcio arûme na aka maarî andû ngiri îkûmi na igîrî (12,000).

²⁶ Joshua aigire njara ciake ciûkîrîrîtie îtumû rîake rîroretie Ai nginya rîrîa andû onthe maakuire.

²⁷ Andû a Isiraeli nîmaaigire indo irîa maatavire wana nyamû cia kûrîthia kuuma îtûûrarî rîa Ai wata ûrîa Ngai-Mûnene amaathîte.

²⁸ Joshua nîwavîvirie îtûûra rîa Ai na rîgîtigwa rîrî rîomomoku, na nwaguo rîtûûraga nginya ûmûnthî.

²⁹ Nîwacokire agîcuria mûthamaki wa Ai mûtî îgûrû na mûthamaki agîkara vo nginya kîvwaî. Na riûa rîkîthûa Joshua nîwathanire mwîrî wa mûthamaki ûcurûrue kuuma mûtî îgûrû. Naguo nîwaikirue kîvingorî gîa îtûûra. Nîmaacokire magîûkunîkîra na mathiga mengî mûno. Mathiga mau marî vo nginya ûmûnthî.

Joshua nîwathomere andû mawatho kîrîmarî kîa Ebali

³⁰ Joshua nîwacokire agîtumîre Ngai-Mûnene Ngai wa andû a Isiraeli metha ya kîgongoona kîrîmarî Kîam Ebali îgûrû.

³¹ Aamîtumire kûringana na ûrîa Musa ndungata ya Ngai-Mûnene aataarîte andû a Isiraeli wata ûrîa kwandîkîtwe wathorî wa Musa atîrî: “Tuma metha ya kîgongoona na mathiga matarî maumie na ngeca ya cuuma.” Nao nîmaarutîre Ngai-Mûnene îgongoona rîa kûvîvua vo na magongoona mengî ma thayû.

³² Andû a Isiraeli marî vo Joshua nîwandîkire mawatho mathigarî marîa maatumire metha ya kîgongoona. Mawatho mau nî ta marîa Musa aandîkîte.

³³ Andû a Isiraeli marî vamwe na athuuri, anene na atongoria ao na ageni arîa maarî nao nîmaarûngamire mîenarî yoîrî ya îthandûkû rîa kîrîkanîro mbere ya athînjîri-Ngai a Alawi arîa maarîkuîte. Nuthu yao maarûngamîte mbere ya kîrîma Kîam Gerizimu na nuthu îngî îkarûngama mbere ya kîrîma Kîam Ebali. Ûguo nîguo Musa ndungata ya Ngai-Mûnene amaathire mageeka rîrîa kavinda gagaakinya ga kwamûkîra kîrathimo.

³⁴ Joshua nîwacokire akîthomera andû watho wonthe wa vamwe na irathimo na irumi augîrîrîtie wata ûrîa kwandîkîtwe îvukuurî rîa watho.

³⁵ Andû onthe a Isiraeli, aka na ciana na ageni arîa maatûûranagia nao nîmaathomerwe mawatho monthe marîa Musa aandîkire. Gûtirî wana rîmwe rîamo rîatigîrîrwe.