Josh 7 - ÎVUKU RÎA ÛVORO MWARO

Wîvia wa Akani

¹ Ngai-Mûnene nîwathîte andû a Isiraeli matigakuue kuuma Jeriko kîndû wanarî kîmwe Kîam irîa ciarî icûkangue. Nwatî nîmaaregire kwathîka nîûndû Akani mûvîcî wa Karîmi nîwakuuire indo imwe irîa ciarî nyamûre. Nîûndû wa ûguo Ngai-Mûnene nîwarakarirue nî andû a Isiraeli. Karîmi îthe wa Akani aarî mûvîcî wa Zabidi, Zabidi aarî mûvîcî wa Zera wa mûvîrîga wa Juda.

² Joshua nîwatûmire andû amwe makiuma Jeriko makîthiî Ai îtûûra rîrîa rîarî vakuvî na Bethiaveni mwena wa îrathîro wa Betheli. Joshua ameerire mathiî magatuîrie vûrûri ûcio. Na rîrîa andû acio maatuîririe vûrûri wa Ai,

³ nîmacokerie Joshua ûvoro na makîmwîra atîrî: “Gûtirî na vata wa athigari onthe a mbaara mathiî makarûe na andû a Ai. Tûma athigari ngiri igîrî kana ithatû nîûndû tî îtûûra înene.”

⁴ Kwoguo athigari ngiri ithatû nîmaatharîkîre îtûûra rîa Ai. Nwatî andû a Ai nîmaarûire na athigari a Isiraeli na nîmaamakîririe vinya na athigari a Isiraeli makîûra.

⁵ Andû a Ai nîmaavinyûririe athigari a Isiraeli kuuma mîvîrîgarî ya îtûûra na nîmaamaunûkithirie karîma nginya kûrîa kwenjagwa mathiga na nîmaaûragire athigari a Isiraeli mîrongo îthatû na atandatû. Andû a Isiraeli nîmaagwatirwe nî guoya na magîtigîra.

⁶ Joshua na atongoria a Isiraeli nîmaatembûrangire nguo ciao marî na kîeva na nîmegwîthirie nthî mbere ya îthandûkû rîa kîrîkanîro Kîam Ngai-Mûnene. Nao nîmeeminjîrie rûkûngû na nîmeekarire vo nginya kîvwaî.

⁷ Joshua nîwaûririe atîrî, “Ûûi, Mwathani Ngai-Mûnene! Watûringirie rûnjî rwa Jorodani nîkî? Watûretire tuonthe nîguo ûtûnenganîre kûrî Aamori matûthirie? Nî kava tûngîekarire mûringo ûrîa wîngî wa rûnjî rwa Jorodani.

⁸ Ûûi Mwathani, nîmbuga atîa na Aisiraeli nîmaûra nî nthû ciao?

⁹ Andû a Kanaani na andû arîa engî onthe matûûraga gûkû makegua ûvoro ûcio. Nao mawîgua magatûthiûrûrûkîria na maûrage andû onthe etû natue nîtûkûriganîra gûkû nthî. Ngai-Mûnene ûgeka atîa nîguo ûgitîre ûnene wa rîîtwa rîaku?”

¹⁰ Ngai-Mûnene nîwacokire akîra Joshua atîrî, “Ûkîra, ûmamîte vau nthî nîkî?

¹¹ Aisiraeli nîmevîtie! Nîmaregete kwathîkîra kîrîkanîro gîakwa kîrîa namaathire mavingie. Nîmocete indo imwe cia irîa nameerire macûkangie magaciîa, makaveenania na magîciiga vamwe na indo ciao.

¹² Kwoguo andû a Isiraeli matingîvota gweterera nditi ya nthû ciao, nwa maûrire nîûndû o nîmetuîte a gûcûkangua. Nie ndingîmûtethia rîngî, nwamwambire gûcûkangia indo icio mûrî nacio irîa mwerirwe mûtigaikuue.

¹³ Ûkîra ûtherie andû aku na ûmere metherie nîûndû rûyû nie Ngai-Mûnene, Ngai wa Isiraeli nîngwenda gûkameera atî, ‘Gatagatîrî kenyu kûrî na indo imwe irîa naamwîrire mûgacûkangie. Mûtingîîtirîria kûrî nthû cienyu nginya rîrîa mûkaaruta indo icio gatagatî kenyu.’

¹⁴ Kwoguo thiî ûmere rûyû kîraûko magaaûka mbere ya Ngai-Mûnene marûmanîrîrîte wa mûvîrîga wa mûvîrîga. Na mûvîrîga ûrîa Ngai-Mûnene akaathuura, nîmagaaûka mbere ya Ngai-Mûnene na mbarî ciao irûmanîrîrîte. Nayo mbarî îrîa îkaathuurwa nîgaaûka mbere ya Ngai-Mûnene na andû a nyomba ciao marûmanîrîrîte. Na nyomba îrîa Ngai-Mûnene akaathuura nîgaaûka mbere yake wa mûndû wa mûndû.

¹⁵ Na mûndû ûrîa nake ûgaatuîka nîke wîvîtie, nîakaavîvua na mwaki vamwe na andû ake onthe, wana indo ciake cionthe. Akaavîvua nîûndû ke nîaunîte kîrîkanîro Kîam Ngai-Mûnene na nîatûmîte Isiraeli magîa na gîconoko kînene.”

¹⁶ Mûthenya ûcio warûmîrîrîte kîraûko tene, Joshua nîwaûkîrire na akîvira andû a Isiraeli wa mûvîrîga wa mûvîrîga. Na mûvîrîga wa Juda nîwathuurirwe nî Ngai-Mûnene.

¹⁷ Joshua nîwavirire mûvîrîga ûcio mbere ya Ngai-Mûnene marûmanîrîrîte mbarî wa mbarî. Nayo mbarî ya Zera nîyathuurirwe. Na avira mbarî ya Zera mbere ya Ngai-Mûnene nyomba wa nyomba, nyomba ya Zabidi nîyathuurirwe.

¹⁸ Joshua nîwacokire akîvira nyomba ya Zabidi mbere ya Ngai-Mûnene, wa mûndû wa mûndû na Akani mûvîcî wa Karimi, ûrîa warî mûcûkûrûwe wa Zabidi wa mûvîrîga wa Juda nîwathuurirwe.

¹⁹ Joshua nîwacokire akîra Akani atîrî, “Mûvîcîwa, aria ûma mbere ya Ngai-Mûnene, Ngai wa Isiraeli na ûmûve riiri. Mbîra ûrîa wîkîte ûtakûnthitha.”

²⁰ Akani nîwacokerie Joshua atîrî, “Nî ma nînjîvîtie Ngai-Mûnene, Ngai wa Isiraeli. Nie nekire atîrî,

²¹ indo imwe cia irîa twacûkangagia nînonire nguo mbaro yarî ya kuuma Babuloni, kilo igîrî cia sîlûva na thaavu yarî na ûrito wa nuthu kilo. Nonire irî mbaro na ngîciîrirîria na ngîcioca. Indo icio nîithithîte îrimarî nenjire îgemarî rîakwa. Mûgaaciona irî vamwe na sîlûva îrî rungu rwa cio.”

²² Kwoguo Joshua nîwatûmire anjaama na makîthiî îgemarî rîa Akani. Nao nîmeethîre indo icio ithithîtwe îgemarî na sîlûva îrî rungu rwa cio.

²³ Nao nîmaairutire îgemarî, makîivira kûrî Joshua na andû a Isiraeli onthe marî vo na magîciga nthî mbere ya Ngai-Mûnene.

²⁴ Joshua marî vamwe na andû onthe a Isiraeli nîmaanyitire Akani mûvîcî wa Zera na magîoca nguo, sîlûva na thaavu. Nîmaacokire makînyita avîcî na aarî ake, ng'ombe, mvunda, ng'ondu, îgema rîake na indo cionthe irîa aarî nacio. Nîmaavirire Akani vamwe na indo icio cionthe Kîamndarî Kîam Akori.

²⁵ Nake Joshua nîwamûririe atîrî, “Akani watûretere thîna wîgana ûû nîkî? Ngai-Mûnene nîagûkûretera thîna ûmûnthî.” Nao andû onthe a Isiraeli nîmaarivire Akani na mathiga na agîkua na makîriva ciana ciake na mathiga igîkua na makîmavîvia vamwe na indo ciake.

²⁶ Nîmaacokire makîmwigîrîra mathiga mengî mûno na nîmatûûraga vo wana ûmûnthî. Kîu nîkîo gîatûmire vandû vau vetagwe Kîamnda Kîam Akori nginya ûmûnthî. Nake Ngai-Mûnene nîwathirirwe nî marakara.