Josh 6 - ÎVUKU RÎA ÛVORO MWARO

Jeriko nîyomomokire

¹ Ivingo cia Jeriko cionthe nîciavingîtwe na îgekarua nî arangîri nîguo andû a Isiraeli matigatonye. Gûtirî mûndû ûngîaumire nja kana atonya îtûûrarî rîu.

² Nake Ngai-Mûnene nîwerire Joshua atîrî, “Rîu, Jeriko nîngûmîvecana kûrî mue, wana mûthamaki wakuo na athigari onthe arîa marî vinya a mbaara.

³ We na athigari aku mûkathiûrûrûkaga îtûûra rîîrî rita rîmwe wa mûthenya. Îkani ûguo îvinda rîa mîthenya îtandatû.

⁴ Athînjîri-Ngai mûgwanja wa mûthînjîri-Ngai akuuîte karumbeta ka rûvîa rwa ndûrûme nîmakaathiîcaga matongoreretie îthandûkû rîa kîrîkanîro. Naguo mûthenya wa mûgwanja nîmûkathiûrûrûka îtûûra rîa Jeriko maita mûgwanja nao athînjîri-Ngai makîvuvaga tûrumbeta.

⁵ Athînjîri-Ngai nîmakaavuva tûrumbeta twao na mûgambo mûnene. Rîrîa mûkaawîgua andû onthe nîmakaaugîrîria na mûgambo mûnene. Nacio nthingo cia îtûûra rîa Jeriko nîikomomoka na andû nîmagaatonya îtûûrarî kuuma mîena yonthe.”

⁶ Kwoguo Joshua nîwetire athînjîri-Ngai na nîwamerire atîrî, “Kuuani îthandûkû rîa kîrîkanîro na engî mûgwanja mathiî marî mbere ya îthandûkû rîa kîrîkanîro makuuîte tûrumbeta twa mvîa cia ndûrûme.”

⁷ Joshua wa Nuni nîwathire andû na akîmera mambîrîrie kûthiûrûrûka îtûûra, na andû marî na indo cia mbaara nîmaathiîre marî mbere ya îthandûkû rîa kîrîkanîro Kîam Ngai-Mûnene.

⁸ Wata ûrîa Joshua aathîte andû, athînjîri-Ngai marî na tûrumbeta twa mvîa cia ndûrûme nîmaatongoririe makîvuvaga tûrumbeta, makîrûmîrîrwa nî athînjîri-Ngai Mûnene arîa maakuuîte îthandûkû rîa kîrîkanîro.

⁹ Nao andû arîa maarî na indo cia mbaara nîmaathiîre mbere ya athînjîri-Ngai arîa maavuvaga tûrumbeta. Na engî nîmaarûmîrîre îthandûkû rîa kîrîkanîro na vîndî îo tûrumbeta nwa twavuvagwa.

¹⁰ Nwatî Joshua nîwathîte andû a Isiraeli na akîmera matikaarie kana maugîrîrie nginyagia rîrîa akaamera.

¹¹ Kwoguo Joshua nîwerire andû mathiûrûrûke îtûûra rîa Jeriko rita rîmwe matakûnegena makuuîte îthandûkû rîa kîrîkanîro. Na marîkia nîmaacokire varîa maambîte magema na makîmama vo.

¹² Mûthenya ûcio wîngî Joshua nîwaûkîrire kîraûko tene. Nao athînjîri-Ngai nîmoocire îthandûkû rîa kîrîkanîro Kîam Ngai-Mûnene.

¹³ Nao athînjîri-Ngai mûgwanja nîmoocire tûrumbeta mûgwanja twa mvîa cia ndûrûme na nîmaathiîre marî mbere ya îthandûkû rîa kîrîkanîro Kîam Ngai-Mûnene magîtûvuvaga. Andû marî indo cia mbaara nîmaathiîre mbere ya athînjîri-Ngai arîa maarî na tûrumbeta. Na vuva wa îthandûkû kwarî na engî marî na indo cia mbaara. Nao onthe nîmaathiûrûrûkire Jeriko tûrumbeta tûkîvuvagwa.

¹⁴ Mûthenya ûcio wa kaîrî nîmaathiûrûrûkire îtûûra rîu rita rîmwe wata ûrîa mekîîte mûthenya wa mbere na magîcoka kûrîa maambîte magema. Nao nîmeekire ûguo îvinda rîa mîthenya îtandatû.

¹⁵ Mûthenya wa mûgwanja maaûkîrire kîraûko gûkîthamburukana na nîmaathiûrûrûkire îtûûra rîa Jeriko maita mûgwanja wata ûrîa mekîte mbere. Mûthenya ûyû nwa guo maarîthiûrûrûkire maita mûgwanja.

¹⁶ Mathiûrûrûka rita rîa mûgwanja, athînjîri-Ngai nîmaavuvire tûrumbeta. Nake Joshua nîwathire andû na akîmera maugîrîrie. Nîwacokire akiuga atîrî, “Ngai-Mûnene nî atûvete îtûûra rîîrî!

¹⁷ Îtûûra wa vamwe na indo cionthe irîa irî kuo nîicûkangue ta irutîrîtwe Ngai-Mûnene matega. Nwatî Rahabu mûndûmûka ûrîa mûmaraa na andû a mûciî wao marekwe matûûre, nîûndû nîke wathithire athigani etû.

¹⁸ Mûtigakuue indo irîa ciagîrîrwe gûcûkangua, nîûndû mwaikuua nîmûkûrete thîna kûrîa andû a Isiraeli mambîte magema na mûtûme gûcûkangue.

¹⁹ Kîndû kîonthe kîthondeketwe na sîlûva, thaavu, gîcango na cuuma nîkîamûrîre Ngai-Mûnene. Icio cionthe nîikaaigwa kîgînarî Kîam Ngai-Mûnene.”

²⁰ Nao athînjîri-Ngai nîmaavuvire tûrumbeta twao. Na rîrîa andû meegwire mûgambo wa tûrumbeta nîmaaugîrîrie na mûgambo mûnene. Nacio nthingo cia Jeriko nîciagwîre. Andû a Isiraeli nîmaaunûkirie kîrîma na magîtonya îtûûrarî rîa Jeriko makîrînyita.

²¹ Andû a Isiraeli nîmaaûragire andû onthe arîa maarî îtûûrarî arûme na aka, andû ethî wana arîa akûrû, ng'ombe, ng'ondu na mvunda. Maaûragire andû na nyamû icio na mviû.

²² Joshua nîwacokire akîra andû aîrî arîa maathiîte kûthigana vûrûri ûcio atîrî, “Thiîni nyombarî ya Rahabu ûrîa mûmaraa, mûmûrute kuo wa vamwe na andû a nyomba yake wata ûrîa mwarîkanîre nake.”

²³ Kwoguo nî maathiîre na makîruta Rahabu nja, vamwe na îthe na ng'ina wana aa mûrwang'ina na andû onthe a mûciî wake. Andû a mûciî wake onthe na ngombo nîmaavirirwe vakuvî na varîa andû a Isiraeli maambîte magema na vataarî na thîna.

²⁴ Nîmaacokire makîvîvia îtûûra wana indo cionthe irîa ciarî kuo. Nwatî matiavîvia indo irîa ciarûthîtwe na sîlûva, thaavu, gîcango na cuuma. Indo icio ciaigirwe kîgînarî Kîam Ngai-Mûnene.

²⁵ Nwatî Joshua nîwavonokirie Rahabu ûrîa mûmaraa, îthe na nyomba yake na arîa onthe metanîtue nake, nîûndû nîwathithire andû arîa maatûmîtwe nî Joshua makathigane îtûûra rîu. Rahabu na andû a nyomba yao nwa matûîre Isiraeli nginya ûmûnthî.

²⁶ Vuva wa ûguo Joshua nîwakaanirie andû na akîmera atîrî, “Mûndû ûrîa ûkaageria gûtuma rîngî îtûûra rîa Jeriko, nûkagwatwa nî kîrumi. Mûndû wa wonthe ûgaatuma mûcingi wa îtûûra rîa Jeriko, mwanake wake wa îrikithathi nî agaakua. Mûndû wa wonthe ûgaatuma mîvîrîga ya gûtonya kuo, nîkaaûrwa nî mwana wake wa kîvinga nda.”

²⁷ Kwoguo Ngai-Mûnene nîwethagîrwa arî vamwe na Joshua na ngumo ya Joshua nîyatambire kûndû kuonthe vûrûrirî.