Josh 5 - ÎVUKU RÎA ÛVORO MWARO

¹ Athamaki onthe a Amori arîa maatûûraga mwena wa îthûîro wa Jorodani na athamaki onthe a Akanaani arîa maatûûraga rûtererî rwa îria rîa Mediterania nîmaamakire mûno megua atî Ngai-Mûnene nîwatûmîte rûnjî rwa Jorodani rûnyare nginya rîrîa andû a Isiraeli maaringire. Nao nîmeguire guoya na magîtigîra nîûndû wa andû a Isiraeli.

Aisiraeli nîmaaruîre Giligali

² Ngai-Mûnene nîwacokire akîra Joshua atîrî, “Thondeka tûviû twa mathiga marîa maûmû mûno na ûruithie andû a Isiraeli.”

³ Kwoguo Joshua nîwekire ûrîa Ngai-Mûnene aamwathire, na nîwaruithirie andû a Isiraeli marî vandû vetagwa Gibeathi-haralothu.

⁴ Andû a Isiraeli maaruithirue nîûndû arûme onthe arîa maaumire Misiri na maarî akûrû a kûrûa mbaara, nîmaakuîrîre werûrî mauma Misiri.

⁵ Andû acio onthe maaumîte Misiri nîmaaruithîtue, nwatî arîa maaciarîrwe werûrî andû mauma Misiri matiarî aruithie.

⁶ Andû a Isiraeli nîmaathiîre îvinda rîa mîaka mîrongo îna marî werûrî na arûme arîa maarî na ûkûrû wa kûthiî mbaararî nîmaakuîrîre werûrî marega kwathîkîra Ngai-Mûnene. Nake Ngai-Mûnene nîwevîtîte nîûndû wao akiuga ndageetîkîra makinya vûrûri ûrîa eerîre methe mao atî nî akaamava vûrûri mûnoru ûrî îria na ûûkî.

⁷ Ciana cia andû arîa maakuîte nîcio Joshua aaruithirie nîûndû itiaruithîtue na nîcio ciacokire vandû va acio maakuîte.

⁸ Marîkia kûruithua onthe nîmeekarire kûu maambîte magema nginya rîrîa maavonire.

⁹ Ngai-Mûnene nîwerire Joshua atîrî, “Ûmûnthî nînamûthengutîria gîconoko gîa kwîthîrwa mûrî ngombo vûrûrirî wa Misiri.” Kwoguo Joshua agîtuîrîra vandû vau rîîtwa Giligali na nwaguo vetagwa wana ûmûnthî.

¹⁰ Andû a Isiraeli nîmeekarire Giligali werûrî vandû varaganu vakuvî na Jeriko varîa maambîte magema. Na kîvwaî Kîam mûthenya wa îkûmi na kana wa mweri ûcio nîmaagîre na kîrugo gîa gûkûngûîra pasaka.

¹¹ Mûthenya ûcio warûmîrîrîte nîguo maambîrîrie kûrîa irio kuuma mîgûndarî ya Kanaani. Nîmaarîre mîgate îtarî mîkîre ndawa ya kwimbia na irio irî mbokie.

¹² Kuuma mûthenya ûcio maana nîmaatigire kûgwa na Aisiraeli matiacoka kûmarîa rîngî. Nwatî maacokire kûrîcaga irio ikûrîte mîgûndarî ya Kanaani.

Joshua na mûndû warî na rûviû

¹³ Joshua arî vakuvî Jeriko, nîwonire mûndû arûngamîte mbere yake anyitîte rûviû. Joshua nîwathiîre varî ke na akîmûria atîrî, “We wî wetû kana ûrî wa nthû cietû?”

¹⁴ Mûndû ûcio nîwamûcokerie atîrî, “Naarî, nie nîrî mûnene wa athigari a mbaara a Ngai-Mûnene.” Joshua nîwegwîthirie agîturumithia ûthiû nthî amûgooce na akîmwîra atîrî, “Mwathi wakwa, nie nîrî ndungata yaku mbîra ûrîa ûkwenda mbîke.”

¹⁵ Mûnene ûcio wa athigari a mbaara a Ngai-Mûnene nîwerire Joshua atîrî, “Ruta iratû ciaku, ûrûngamîte vandû vatheru.” Nake Joshua nîwekire ûguo eerirwe.