Josh 4 - ÎVUKU RÎA ÛVORO MWARO

Mathiga ma kîririkano nîmaathondekirwe

¹ Rîrîa andû onthe a Isiraeli maaringire rûnjî rwa Jorodani, Ngai-Mûnene nîwerire Joshua atîrî,

² “Thuura arûme îkûmi na aîrî. Wa mûvîrîga kuume mûndû ûmwe,

³ na ûmeere moce mathiga îkûmi na maîrî kuuma rûnjîrî rwa Jorodani gatagatî. Mathiga mau marutwe varîa athînjîri-Ngai maarûngamîte na mûthiî namo na mûmaige varîa mûkaarara ûtukû wa ûmûnthî.”

⁴ Joshua nîwacokire agîîta arûme arîa îkûmi na aîrî aathuurîte,

⁵ na akîmeera atîrî, “Thiîni rûnjîrî rwa Jorodani varîa îthandûkû rîa Kîrîkanîro Kîam Ngai-Mûnene, Ngai wenyu rîrî. Ocani wa mûndû îthiga na mûkuue na Kîamnde. Îthiga rîmwe rîkethagîrwa rîrî rîa mûvîrîga ûmwe wa mîvîrîga ya Isiraeli.

⁶ Mathiga mama nîmagaatuîka kîririkania kîenyu vîndî îrîa îgaaûka, rîrîa ciana cienyu ciamûria gîtûmi Kîammo.

⁷ Namue nîmûkaamera atî manjî ma rûnjî rwa Jorodani nîmaagaûkanire magîtiga kûvîta rîrîa îthandûkû rîa Kîrîkanîro Kîam Ngai-Mûnene rîaringire rûnjî rwa Jorodani. Mathiga mama makethagîrwa marî kîririkano tene na tene Kîam ûrîa gwekîkire kûrî andû a Isiraeli.”

⁸ Nao andû arîa maathuurirwe nî Joshua nîmeekire ûrîa Joshua aameerire meke ta ûrîa Ngai-Mûnene aamwîrîte. Nîmoocire mathiga manene îkûmi na maîrî kuuma gatagatî ka rûnjî. Îthiga rîmwe rîarûngamagîrîra mûvîrîga ûmwe wa andû a Isiraeli. Nîmaakuuire mathiga mau na makîthiî makîmaiga nthî varîa maambire magema mao.

⁹ Nake Joshua nîwaigire mathiga mengî îkûmi na maîrî gatagatî ka rûnjî rwa Jorodani varîa athînjîri-Ngai arîa maakuuîte îthandûkû rîa kîrîkanîro maakinyîte. (Mathiga mau marî vo nginya ûmûnthî.)

¹⁰ Athînjîri-Ngai arîa maakuuîte îthandûkû rîa kîrîkanîro nîmeekarire marûngamîte gatagatî ka rûnjî nginya rîrîa andû meekire maûndû monthe kûringana na ûrîa Joshua aathîtwe nî Ngai-Mûnene ameere. Ûguo nîguo Joshua aathîtwe nî Musa. Andû nîmaaringire rûnjî rwa Jorodani na îvenya.

¹¹ Vîndî îrîa andû onthe maaringire rûnjî rwa Jorodani, athînjîri-Ngai nao makuuîte îthandûkû rîa kîrîkanîro nîmaathiîre matongoreretie andû.

¹² Nao arûme a mûvîrîga wa Reubeni na mûvîrîga wa Gadi na arûme a nuthu ya mûvîrîga wa Manase marî na indo cia mbaara, nîmaaringire mbere ya andû acio engî wata ûrîa Musa aamaathîte.

¹³ Andû ta ngiri mîrongo îna (40,000) mevarîrîtie nîûndû wa mbaara nîmaavîtûkîre methorî ma Ngai-Mûnene na makîthiî vandû varaganu vakuvî na Jeriko.

¹⁴ Mûthenya ûcio Ngai-Mûnene nîwekire ûndû wa gûtûma Joshua aneneve methorî ma andû onthe a Isiraeli. Nao nîmeekarire makîmûvecaga gîtîîo ûtûûrorî wake wonthe wata ûrîa mavecaga Musa.

¹⁵ Ngai-Mûnene nîwacokire akîra Joshua atîrî,

¹⁶ Athana wîre athînjîri-Ngai arîa makuuîte îthandûkû rîa kîrîkanîro maume rûnjîrî rwa Jorodani.

¹⁷ Na Joshua nîwamaathire maume rûnjîrî rwa Jorodani.

¹⁸ Nao athînjîri-Ngai makuuîte îthandûkû rîa kîrîkanîro Kîam Ngai-Mûnene nîmaaumire rûnjîrî gatagatî. Na rîrîa maakinyire nguvarî ya rûnjî, manjî nîmaambîrîrie kûnyûrûrûka rîngî. Naruo rûnjî nîrwecûrire na rûkiuna rîngî wata ûrîa rwekariî mbere ya maringa.

¹⁹ Andû a Isiraeli maaringire Jorodani mûthenya wa îkûmi wa mweri wa mbere. Nao nîmaambire magema mao Giligali mûvakarî wa Jeriko mwena wa îrathîro.

²⁰ Na kûu Giligali nîkuo Joshua aaigire mathiga marîa maakuuire kuuma gatagatî ka rûnjî rwa Jorodani.

²¹ Nîwacokire akîra andû a Isiraeli atîrî, “Ciana cienyu ingîkaaûria gîtûmi Kîam mathiga mama,

²² nîmûkaamera ûrîa rûnjî rwa Jorodani rwatigire kûvîta na andû a Isiraeli makîringîra nthî nyûmû.

²³ Nîûndû Ngai-Mûnene, Ngai wenyu nîwatûmire manjî ma rûnjî rwa Jorodani matiga kûnyûrûrûka nginya rîrîa mwaringire. Ûguo nwaguo Ngai-Mûnene, Ngai wenyu eekire rîrîa aatûmire manjî ma Îria Îtune mamûkane na tûkîringîra nthî nyûmû.

²⁴ Kwoguo andû onthe a nthî nwa mamenye ûrîa Ngai-Mûnene arî vinya mûnene, na andû nîmagîrîrwe nî kûmûvecaga gîtîîo vîndî cionthe.”