Josh 3 - ÎVUKU RÎA ÛVORO MWARO

Andû a Isiraeli nîmaaringire rûnjî rwa Jorodani

¹ Mûthenya ûcio warûmîrîrîte kîraûko tene, Joshua na andû onthe a Isiraeli nîmaaumire Shitimu na makîthiî rûnjîrî rwa Jorodani. Vau nîvo maambire magema mao na makîrara ûtukû wa mûthenya ûcio.

² Vuva wa mîthenya îthatû anene a andû a Isiraeli nîmaathiîre kûndû kuonthe kûrîa andû maambîte magema

³ makîmeeraga atîrî, “Vîndî îrîa mûkoona athînjîri-Ngai Alawi makuuîte îthandûkû rîa kîrîkanîro Kîam Ngai-Mûnene Ngai wenyu, mûgaaûkîra muume kûu mwambîte magema mûrîrûmîrîre.

⁴ Nao nîmakaamwonia kûrîa mûkaathiî, nîûndû mue mûtianakinya gûkû rîngî. Nwatî mûtikathiî vakuvî na îthandûkû rîa Kîrîkanîro. Gatagatî kenyu na îthandûkû rîu vethîrwe na ûtiganu ta wa kilomita îmwe.”

⁵ Joshua nîwacokire akîra andû atîrî, “Îîtherieni nîûndû rûyû Ngai-Mûnene nîageka maûndû ma magegania gatagatîrî kenyu.”

⁶ Joshua nîwacokire akîîra athînjîri-Ngai makuue îthandûkû rîa kîrîkanîro na mathiî marî mbere ya andû. Nao nîmeekire wata ûguo aameerire.

⁷ Nake Ngai-Mûnene nîwerire Joshua atîrî, “Ûmûnthî ûndû ûrîa ngwîka nî wa gûtûma ûneneve methorî ma andû onthe a Isiraeli, nîguo mamenye atî ngethagîrwa nîrî nawe ta ûrîa nethagîrwa nîrî na Musa.

⁸ Atha athînjîri-Ngai arîa makuuîte îthandûkû rîa kîrîkanîro mathiî nginya rûnjîrî rwa Jorodani. Na maakinya matonye manjîrî vanini na marûngame vakuvî na nguva ya rûnjî.”

⁹ Joshua nîwacokire akîra andû atîrî, “Ûkani ava mwîgue ûrîa Ngai-Mûnene, Ngai wenyu akuga,

¹⁰ na nîmûkûmenya atî Ngai ûrîa ûtûûraga mwoyo arî vamwe namue nîûndû vîndî îrîa mûkaambîrîria gûtonya vûrûrirî ûcio nîakeengata andû a Kanaani, Ahiti, Ahivi, Aperizi, na Agirigashi, na avinyûrie Amori, na Ajebusi.

¹¹ Taroriani, îthandûkû rîa kîrîkanîro Kîam Mwathani wa nthî yonthe rîkaaringa rûnjî rwa Jorodani,

¹² mîvîrîga îrîa îkûmi na îrî ya andû a Isiraeli îkathuura andû. Wa mûvîrîga ûthuure mûndû mûrûme ûmwe.

¹³ Athînjîri-Ngai arîa makuuîte îthandûkû rîa Kîrîkanîro Kîam Ngai-Mûnene wa nthî makaathiî marî mbere yenyu. Rîrîa magûrû mao magaakinya manjî, rûnjî rwa Jorodani nîrûgaatiga kûthiî. Manjî marîa maranyûrûrûka makeyûmbanîrîra vandû vamwe.”

¹⁴ Rîrîa andû a Isiraeli maaumire varîa maambîte magema mao, athînjîri-Ngai arîa maakuuîte îthandûkû rîa kîrîkanîro maarî mbere yao.

¹⁵ Rîrîa makinyo ma athînjîri-Ngai acio maakuuîte îthandûkû rîa kîrîkanîro maakinyire manjî rûtererî rwa rûnjî rwa Jorodani, (vîndî ya maketha, rûnjî rwa Jorodani nîrwecûraga na rûkauna),

¹⁶ manjî marîa maanyûrûrûkaga nîmaarûngamire na makîyûmba vamwe. Maarûngamire varaca vandû vetagwa Adamu, îtûûra rîrîa rîrî vakuvî na Zarethani. Manjî nî maatigire kûnyûrûrûka îriarî rîa Cumbî, nao andû makîringîra nthî nyûmû vakuvî na Jeriko.

¹⁷ Nao athînjîri-Ngai arîa maakuuîte îthandûkû rîa kîrîkanîro Kîam Ngai-Mûnene nîmeekarire marûngamîte gatagatî ka rûnjî rwa Jorodani kûrîa manjî maavûîte nginya rîrîa andû onthe a Isiraeli maaringire.