Josh 24 - ÎVUKU RÎA ÛVORO MWARO

Joshua nîwarîrie andû arî Shekemu

¹ Joshua nîwacokire agîta andû a mîvîrîga yonthe ya Isiraeli. Nao nîmaagomanire vamwe Shekemu. Nîwetire athuuri, atongoria, atirîrîri vûrûri na anene a andû a Isiraeli mathiî vakuvî na îgema rîrîa rîamûre.

² Nake Joshua nîwamerire atîrî, “Ngai-Mûnene, Ngai wa Isiraeli augîte atîrî, ‘Methe menyu ma tene maatûûraga mwena ûrîa wîngî wa rûnjî rwa Farati na nîmaagoocaga ngai ciîngî. Ûmwe wa methe mau ma tene aarî Tera îthe wa Iburahimu na Nahoru.

³ Nînaacokire ngîruta Iburahimu îthe wenyu wa tene mûringo wa rûnjî rwa Farati ngîmûvîtûkîrîria vûrûrirî wa Kanaani na nînaamûvere njiarwa nyîngî. Nînaamûvere Isaka,

⁴ nake Isaka ngîmûva Jakovu na Esaû. Nînaagaîre Esaû vûrûri ûrîa ûrî irîma wa Edomu ûtuîke wake, nwatî îthe wenyu wa tene Jakovu na njiarwa ciake nîmaathiîre Misiri.

⁵ Vuvarî nînatûmire Musa na Aroni Misiri. Nînaaretithîrie andû a Misiri mathîna na njîra ya maûndû marîa nekire gatagatîrî kenyu. Nwatî nînaamarutire kuo.

⁶ Nînarutire methe menyu ma tene Misiri, nao athigari a Misiri nîmaamarûmîrîre marî na ikaari cia mbarathi na engî matûîte mbarathi. Nwatî rîrîa methe menyu ma tene maakinyire îriarî Îtune nîmaandîrîre nîmatethie.

⁷ Nanie nînekîrire nduma gatagatî ka andû a Misiri na a Isiraeli. Nînatûmire îria rîkunîkîre andû a Misiri na nîmaaûrîre manjîrî. Mue nîmwicî ûrîa nekire andû a Misiri. “ ‘Mue nîmwatûûrire werûrî kavinda karaca.

⁸ Nînaacokire ngîmûreta vûrûrirî wa Amori arîa maatûûraga mwena wa îrathîro wa rûnjî rwa Jorodani. Nîmwarûire nao na nînaamûvotithirie kûmavoota. Nîmwegwatîre vûrûri wao ûgîtuîka wenyu na nînaamacûkangagia wa ûrîa mwathiîcaga na mbere.

⁹ Balaki mûvîcî wa Zipori ûrîa warî mûthamaki wa Moabu nîwarûire namue. Nîwatûmanîre Balaamu mûvîcî wa Beori aûke arume andû a Isiraeli kîrumi.

¹⁰ Nwatî ndingîetîkîrie Balaamu amûruma kîrumi, îthenya rîa ûguo Balaamu nîkwa aamûrathimire. Kwoguo nînaamûvonokirie kuuma kûrî Balaki.

¹¹ Nîmwaringire rûnjî rwa Jorodani na mûgîkinya Jeriko. Nao andû a Jeriko na Amori, Aperizi, Akanaani, Ahiti, Agirigashi, Ahivi na Ajebusi nîmaarûire namue. Nwatî nînaamûvotithirie kûmavoota onthe.

¹² Nînatûmire magwatwe nî guoya nîguo mîngate athamaki aîrî a Amori. Tî vinya wenyu na indo cienyu cia mbaara ciavootanire, nînie naamavootire.

¹³ Nie namûveere vûrûri mûtaarutîrîte wîra na ngîmûva matûûra manene mûtaatumîte. Kûu nîkuo rîu mûtûûraga. Nîmûrarîa thavibu kuuma mîthaviburî mûtaanavanda na nîmûrarîa ndamaiyû kuuma mîtamaiyûrî mûtaanavanda.’

¹⁴ “Nake Joshua nîwathiîre na mbere kwîra andû a Isiraeli atîrî, “Rîu îtigagîreni Ngai-Mûnene na mûmûtungatagîre mûmwîvokete na ma. Tiganani na ngai irîa methe menyu ma tene maagoocaga marî Mesopotamia na marî Misiri. Tungatagîrani Ngai-Mûnene arî wenga.

¹⁵ Ethîrwa mûtikwenda gûtungatîra Ngai-Mûnene, thuurani ûmûnthî ûrîa mûgatungatagîra. Thuurani kana nîkwa mûgatungatagîra ngai irîa methe menyu ma tene maatungataga marî Mesopotamia kana ngai cia Amori. Nwatî nie na andû a nyomba yakwa tûgaatungatagîra Ngai-Mûnene.”

¹⁶ Nao andû nîmaacokirie atîrî, “Tue tûtingîtungatîra ngai ciîngî, tûgatungatagîra Ngai-Mûnene!

¹⁷ Ngai-Mûnene, Ngai wetû nîke warutire methe metû tene wa natue Misiri, kûrîa twatûûraga tûrî ngombo. Nîtwonire ciama nene irîa aaringire. Rûgendorî rwetû rwa gûka gûkû nîtwavîtûkîrîre mavûrûri meengî na kûu kuonthe nî Ngai-Mûnene, Ngai wetû watûgitagîra.

¹⁸ Amori nîo maatûûraga gûkû vîndî îo, nwatî Ngai-Mûnene nîwamengatire nîguo tûke tûtûûre gûkû. Kwoguo wanatue tûgaatungatagîra Ngai-Mûnene, nîke Ngai wetû.”

¹⁹ Nwatî Joshua nîwerire andû a Isiraeli atîrî, “Mue nwa mûremwe nî gûtungatîra Ngai-Mûnene nîûndû ke nî Ngai Mûtheru na arî wîru. Ndakaamûrekera mevia menyu,

²⁰ ethîrwa nwa mûtiganîrie Ngai-Mûnene na mûcoke gûtungatîra ngai ng'eni. Nîakaamûgarûrûka na amûverithie mûthire wana ethîrwa kûrî mue aarî Ngai mwaro.”

²¹ Nao andû a Isiraeli nîmeerire Joshua atîrî, “Naarî! Tue tûgatungatagîra Ngai-Mûnene.”

²² Nake Joshua nîwamerire atîrî, “Mue nîmwatuîka aira enyu mue ene atî nîmwathuura gûtungatagîra Ngai-Mûnene.” Nao nîmaacokirie atîrî, “Ii tûrî aira.”

²³ Nake Joshua nîwamerire atîrî, “Tiganani na ngai icio ng'eni mûrî nacio na mûcokerere Ngai-Mûnene, Ngai wa Isiraeli mûmûtungatagîre.”

²⁴ Nao andû a Isiraeli nîmeerire Joshua atîrî, “Tue tûgatungatagîra Ngai-Mûnene, Ngai wetû na tûkaathîkagîra maathani make.”

²⁵ Kwoguo mûthenya ûcio, Joshua nîwarûthire kîrîkanîro gatagatî ka Ngai-Mûnene na andû a Isiraeli marî kûu Shekemu. Nîwacokire akîmanengera mawatho ma kûrûmagîrîra.

²⁶ Joshua nîwandîkire mawatho mau îvukuurî rîa Watho wa Ngai. Nîwacokire agîoca îthiga înene na akîriga rungu rwa mûtî mûnene wa mûvuru vakuvî na vandû varîa vatheru va Ngai-Mûnene.

²⁷ Joshua nîwerire andû onthe atîrî, “Taroriani, îthiga rîîrî nîrîegua maûndû monthe marîa Ngai-Mûnene atwîra. Kwoguo rîgatuîkaga ûira kûrî mue wa kûmûgiria mûregana na Ngai.”

²⁸ Joshua nîwerire andû mathiî, na wa mûndû nîwathiîre vûrûrirî ûrîa aaumîte.

Joshua na Eleazaru nîmaakuire

²⁹ Vuva wa maûndû mau ndungata ya Ngai-Mûnene Joshua mûvîcî wa Nuni nîwakwire. Aakwire arî na ûkûrû wa mîaka îgana rîmwe na îkûmi (110).

³⁰ Nao nîmaamûthikire gwake Timunathi Sera vûrûrirî ûrîa ûrî irîma wa Efiraimu mwena wa rûgûrû wa kîrîma Kîam Gaashu.

³¹ Andû a Isiraeli nîmaatûûrire magîtungatagîra Ngai-Mûnene matukû monthe marîa Joshua aarî mwoyo na vîndî ya atongoria arîa maatûûranîtie nake na moonete maûndû monthe marîa Ngai-Mûnene eekîte nîûndû wa andû a Isiraeli.

³² Andû a Isiraeli makiuma Misiri nîmaakuuire mavîndî ma Josefu. Nao nîmaamathikire Shekemu mûgûndarî ûrîa Jakovu aagûrîte kuuma kûrî avîcî a Hamori îthe wa Shekemu. Mûgûnda ûcio wagûrîtwe mbeca cia sîlûva îgana rîmwe. Mûgûnda ûyû nîwacokire ûgîtuîka wa njiarwa cia Josefu.

³³ Eleazaru mûvîcî wa Aroni nîwakwire na akîthikwa Gibea îtûûrarî rîrîa rîrî vûrûrirî ûrîa ûrî irîma wa Efiraimu. Vûrûri ûcio nîguo wagaîrwe Finehasi mûvîcî wa Eleazaru.