Josh 23 - ÎVUKU RÎA ÛVORO MWARO

Joshua nîwaugîre andû a Isiraeli ûvoro

¹ Vuva wa kavinda karaca Ngai-Mûnene nîwavere andû a Isiraeli thayû wa gwîkara matakûrûa na nthû irîa ciamathiûrûrûkîrîtie. Vîndî îo Joshua aarî mûkûrû mûno.

² Joshua nîwetire andû onthe a Isiraeli, athuuri, atongoria, atirîrîri vûrûri na anene a andû na akîmeera atîrî, “Rîu nîrî mûkûrû mûno

³ na nîmwonete maûndû monthe marîa Ngai-Mûnene, Ngai wenyu ekîte mavûrûri mama monthe nîûndû wenyu. Ngai-Mûnene, Ngai wenyu ethîrîtwe akîmûrûîrîra.

⁴ Ririkanani nîngaîrîte mîvîrîga yenyu vûrûri ûrîa wonthe umîte rûnjîrî rwa Jorodani nginya mwena wa îthûîro îriarî rîa Mediterania ûtuîke wao. Nîmûvete vûrûri wa ndûrîrî irîa twavootire, wana vûrûri wa ndûrîrî irîa tûtavootete.

⁵ Ngai-Mûnene, Ngai wenyu nîwamwîrîre atî nîagaatûma nthû cienyu ciûre nîmue na nîagaaciîngata wa ûrîa mûkeethîrwa mûkîthiî na mbere na nîmûkegwatîra vûrûri ûcio wao.

⁶ Kwoguo athîkagîrani maûndû monthe marîa mandîkîtwe îvukuurî rîa watho wa Musa na mûvingagie maûndû monthe marîa mandîkîtwe.

⁷ Mûtikagwatanîre na mavûrûri marîa maatigirwe gûkû mûrî. Mûtikagooce ngai ciao cia mîvuanano kana mwîvîta mûkîigwetaga wana kana mwînamîrîre mûrî mbere yacio.

⁸ Nwatî, îthagîrwani mûrî evokeku varî Ngai-Mûnene, wata ûrîa mûtûûrîte mûrî evokeku nginyagia ûmûnthî.

⁹ Nîmwatharîkîre ndûrîrî ciarî na vinya na nene na Ngai-Mûnene nîwaciîngatire. Gûtirî rûrîrî wana rûmwe rwavotire kûmwîtirîria.

¹⁰ Mûndû ûmwe gatagatîrî kenyu nwa atûme andû ngiri îmwe maûre nîûndû Ngai-Mûnene, Ngai wetû nîwatwîrire atî nîke ûgatûrûagîrîra.

¹¹ Kwoguo menyererani mwendage Ngai-Mûnene, Ngai wenyu.

¹² Mûtigatuîke aremi na njîra ya gûtukana na andû arîa matigarîte gûkû mûrî na mwambîrîrie kûvikia aarî ao nao mavikie aarî enyu.

¹³ Mweka ûguo, menyani na ma atî Ngai-Mûnene, Ngai wetû ndakeengata ndûrîrî icio ciûre rîrîa mûkaaitharîkîra. Nwatî nîigaatuîka kîndû gîcûku gîa kûmûgucagîrîria mûtonye mûtegorî kana mûgwe îrimarî. Nîigaatuîka ta kîvoko gîa kûmûriva kana ta mîgua îrî methorî menyu nginya rîrîa muonthe mûkaathira vûrûrirî ûyû mwaro Ngai amûveete.

¹⁴ “Rîu kavinda gakwa nîgakinyu ga gûkua. Mue muonthe nîmwicî meciriarî menyu na ngororî cienyu atî Ngai-Mûnene, Ngai wenyu nîamûvete indo cionthe mbaro irîa aamwîrîîre. Gûtirî wana kîmwe gîtavingîtue.

¹⁵ Nwatî, wata ûrîa Ngai-Mûnene, Ngai wenyu aavingirie ciîranîro cionthe irîa aarûthire namue, nwaguo akaamûretithîria maûndû macûku

¹⁶ ethîrwa mûtikaarûmîrîra maathani make. Maathani mau nî marîa Ngai-Mûnene, Ngai wenyu aamwîrire mûrûmagîrîre. Na ethîrwa nîmûgaatungatîra na mûgooce ngai ciîngî na mûciînamîrîra, nîakaarakara nîmue na amûverithie. Na vuvarî gûtirî mûndû wana ûmwe gatagatîrî kenyu ûgaatigara vûrûrirî ûyû mwaro Ngai-Mûnene, Ngai wenyu amûveete.”