Josh 20 - ÎVUKU RÎA ÛVORO MWARO

Matûûra manene marîa andû maathiîcaga kwîthitha.

¹ Ngai-Mûnene nîwacokire akîra Joshua

² eere andû a Isiraeli atîrî, “Thurani matûûra marîa mûkathiîcaga kwîthitha marîa nerire Musa ûvoro wamo.

³ Mûndû angîûraga mûndû wîngî atakwenda, nî athiîcage kuo kwîthitha aûre aume kûrî mûndû ûrîa ûrenda kûrîvîrîria mûndû ûcio ûragîtwe.

⁴ Mûndû ûcio ûraganîte nî akaaûra athiî îtûûrarî rîmwe rîa mau. Nake nîakaarûngama kîvingorî gîa îtûûra rîu na ataarîrie atongoria a îtûûra ûrîa gwîkîkîte. Nao nîmakaamwîtîkîria atonye îtûûrarî rîu na mamûve vandû va gûtûûra na nîagaatûûrania na andû a îtûûra rîu.

⁵ Ethîrwa mûndû ûrîa ûrenda kûrîvîrîria mûndû ûrîa ûragîtwe nîakaamûrûmîrîria nginya îtûûrarî rîu, ene rîo matîkaamûnenganîra, nîûndû aaûraganire atakwenda na matiarî ûthû mbererî.

⁶ Mûndû ûrîa ûraganîte nîagekara îtûûrarî rîu nginya rîrîa agaacirithua arî mbere ya andû nîguo kûmenyeke kana nîevîtie nginya rîrîa Mûthînjîri-Ngai ûrîa mûnene ûrîa ûrî kuo vîndî îo agaakua. Mûthînjîri-Ngai ûcio arîkia gûkua, mûndû ûrîa ûraganîte nwa acoke mûciî îtûûrarî rîao kûrîa aaumîte.”

⁷ Kwoguo nîmaamûrire îtûûra rîa Kedeshi rîrîa rîrî Galili vûrûrirî ûrîa ûrî irîma wa Nafutali. Nîmaacokire makîamûra Shekemu îtûûra rîrîa rîrî vûrûrirî ûrîa ûrî irîma wa Efiraimu na Heburoni (Nîrîo Kiriathariba) vûrûrirî wa Juda ûrîa ûrî irîma.

⁸ Naguo mûringo wa rûnjî rwa Jorodani, îrathîro rîa Jeriko nîmaathuurire Bezeri vûrûrirî wa Reubeni, Ramothi vûrûrirî wa Gileadi kuuma mûvîrîgarî wa Gadi na Golani îrîa îrî Bashani vûrûrirî wa Manase.

⁹ Mau nîmo maarî matûûra marîa maathuurirwe ma kûthiîcagwa nî andû onthe a Isiraeli wana nî ageni arîa maatûûraga nao nîûndû wa kwîthitha. Mûndû wa wonthe waûraganaga atakwenda nîwathiîcaga matûûrarî mau nîguo egitîre kuuma kûrî mûndû ûrîa ûngîendire kûrîvîrîria mûndû. Gûtirî mûndû ûngîaûragirwe nîûndû atî nî aûraganîte atambîte gûcirithua arî mbere ya andû.