Josh 2 - ÎVUKU RÎA ÛVORO MWARO

Joshua nîwatûmire athigani Jeriko

¹ Joshua mûvîcî wa Nuni nîwacokire agîtûma athigani aîrî kuuma Shitimu na akîmera mathiî makathigane vûrûri wa Kanaani na makîria îtûûra rîa Jeriko. Rîrîa maakinyire îtûûrarî rîa Jeriko, nîmaathiîre na makîrarîrîra kwa mûndû mûka ûmwe mûmaraa wetagwa Rahabu.

² Mûthamaki wa Jeriko nîwegwire atî kûrî na andû a Isiraeli maaûkîte ûtukû ûcio nîguo mathigane vûrûri ûcio.

³ Kwoguo mûthamaki nîwatûmanîre Rahabu na akiuga erwe atîrî, “Arûme acio marî gwaku nyomba maûkîte nîguo mathigane vûrûri wetû wonthe. Marute ûmarete!”

⁴ Nwatî Rahabu nîwocete arûme acio aîrî na akamathitha. Kwoguo nîwacokirie atîrî, “Nîma kûrî arûme maraaûkire gwakwa nyomba, nwatî nie ndicî maraumîte kû.

⁵ Na kîvwaî mbere ya kîvingo gîa îtûûra kîvingwa nî maraumire na mathiî. Nie ndicî kûrîa marathiîre, nwatî kethîrwa nwa mûmarûmîrîrie na îvenya nwa mûmakinyîre.”

⁶ (Vîndî îo Rahabu aathithîte athigani acio nyombarî yake îgûrû na akamakunîkîra na itina cia kamûtî karîa kaumaga ndigi cia kûthondeka itambaa irîa aaigîte nyomba îgûrû.)

⁷ Kwoguo andû a mûthamaki nîmaarûmîrîrie athigani acio na îvenya. Na rîrîa maaumire nja ya îtûûra kîvingo gîa îtûûra nîkîavingirwe. Nao nîmaamarûmîrîrie nginya varîa rûnjî rwa Jorodani rwaringagîrwa.

⁸ Ûtukû ûcio mbere ya mamame, Rahabu nîwathiîre kûrî athigani acio kûu nyomba îgûrû

⁹ na akîmera atîrî, “Nîmbicî atî Ngai-Mûnene nîavecanîte vûrûri ûyû kûrî mue. Nao andû arîa onthe matûûraga vûrûrirî ûyû marî na guoya nyîngî mûno nîûndû wenyu.

¹⁰ Nîtwîguîte ûrîa Ngai-Mûnene aatûmire manjî ma îria Îtune mavûa mbere yenyu rîrîa mwaumaga Misiri. Wana nîtwîguîte ûrîa mwaûragire athamaki a Amori, Sihoni na Ogu arîa maarî mwena wa îrathîro wa Jorodani.

¹¹ Na rîrîa twegwire ûguo tue nîtwagîre guoya nyîngî na tûgîtigîra na gûtirî mûndû ûrî na ûmîrîru arî mbere yenyu. Nîûndû Ngai-Mûnene, Ngai wenyu nîke Ngai wa îgûrû na wa gûkû nthî.

¹² Kwoguo îîvîteni mbere ya Ngai-Mûnene atî nîmûgaatwîguîra ntha mûtûvonokie, nie na mûciî wetû wata ûguo namwîguîra ntha. Monia kîrîa gîgaatûma mbîtîkia.

¹³ Îranîrani atî nîmûkaavonokia vava, nyanya, aa mûrwaiya, aa mwarwaiya na mîciî yao matikaaûragwe!”

¹⁴ Nao arûme acio nîmaamwîrire atîrî, “Ethîrwa ndûkeera mûndû wana ûrîkû ûrîa twîthîrîtwe tûgîka, nîtûkwîranîra na ma atî nîtûgaakwîguîra ntha rîrîa Ngai-Mûnene agaatûvotithia kwîgwatîra vûrûri ûyû. Na tûngîkaarega kûvingia ûguo tweranîra, Ngai nîagaatûûraga.”

¹⁵ Rahabu atûûraga nyombarî yatumîtwe rûthingorî rwa îtûûra. Kwoguo nîwanyûrûrûkirie athigani acio na mûkanda maumîrîrîte ndiricarî.

¹⁶ Nake Rahabu nîwerire athigani acio atîrî, “Thiîni irîmarî mûkethithe kuo nîguo andû a mûthamaki arîa mamûrûmîrîrîtie matîkamwone. Îkarani kuo îvinda rîa mîthenya îthatû nginya rîrîa magaacoka. Vuva wa ûguo mûkaaumîra mwîthiîre.”

¹⁷ Nao nîmeerire Rahabu atîrî, “Tue nîtûkûrûmîrîra ûguo we watûma twîranîre.

¹⁸ Nawe ûgeeka atîrî, rîrîa tûkaatharîkîra vûrûri ûyû wenyu, ûkaathaîkîrîra kamûkumbû ka rangi ya njambarawe ndiricarî îrîa watûrutîre ûgîtûnyûrûrûkia. Nao andû enyu onthe, aguo, nyûkwe, na aa mûrwanyûkwe ûkaamatonyia gwaku nyomba.

¹⁹ Mûndû wa wonthe wa cienyu angîkaauma nja na aûragwe, mau makethîrwa marî mavîtia make, tue tûtikaaûrua. Nake mûndû wa wonthe wa cienyu, arîa mûkeethîrwa mûrî nao nyomba angîkoona thîna nîtue tûkaaûrua nthakame yake.

²⁰ Nwatî namue mûngîkeera mûndû ûrîa twîthîrîtwe tûgîka gûkû muma ûcio mwatûma twîvîta naguo ndûgaatûgwata.”

²¹ Rahabu nîwetîkirie na nîwamarekererie makîthiî. Na marîkia kûthiî nîwoverere kamûkumbû karîa ka rangi wa njambarawe ndiricarî ya nyomba yake.

²² Nao athigani nîmaathiîre irîmarî na makîîthitha kuo. Andû a mûthamaki arîa maamathingatîte nîmaamacaririe îvinda rîa mîthenya îthatû kûu vûrûrirî wonthe. Na rîrîa maaturire andû a mûthamaki nîmaacokire îtûûrarî rîao rîa Jeriko.

²³ Nao athigani acio aîrî makînyûrûrûka makiuma irîmarî na makîringa rûnjî rwa Jorodani makîthiî kûrî Joshua. Nîmaamwîrire maûndû monthe marîa meekîkîte

²⁴ na makiuga atîrî, “Tue nîtwîtîkîtie atî Ngai-Mûnene nîatûvete vûrûri ûyû wonthe. Andû onthe marî na guoya na nî amaku nî tue.”