Josh 19 - ÎVUKU RÎA ÛVORO MWARO

Vûrûri ûrîa wagaîrwe Simeoni

¹ Mûvîrîga wa kaîrî kûgaîrwa vûrûri warî mûvîrîga wa Simeoni na mbarî ciaguo. Vûrûri wao nîwathiûrûrûkîtwe nî vûrûrirî ûrîa wagaîrwe Juda.

² Vûrûri ûcio warî na matûûra ma Beerisheba, Sheba, Molada,

³ Hazaru Shuali, Bala, Ezemu,

⁴ Elitoladi, Bethuli, Horima,

⁵ Zikilagi, Bethi Marikabothu, Hazaru Susa,

⁶ Bethi Lebaothu, na Sharuheni. Mama monthe nî matûûra marîa manene îkûmi na mathatû vamwe na icagi irîa ciarî vakuvî namo.

⁷ Kwarî na matûûra mengî maarî vûrûrirî ûcio maagaîrwe. Namo maarî: Aini, Rimoni, Etheri, na Ashani. Mau maarî matûûra marîa manene mana wa vamwe na icagi irîa ciarî vakuvî namo.

⁸ Matûûra mama maarî vamwe na icagi irîa ciarî nginya Baala Beeri (kana Rama) mwena wa îveti. Vûrûri ûcio nîguo wagaîrwe mbarî cia mûvîrîga wa Simeoni.

⁹ Mûvîrîga wa Simeoni wagaîrwe vûrûri kuuma kûrî vûrûri ûrîa wagaîrîtwe Juda, nîûndû mûvîrîga wa Juda nîwagaîrîtwe vûrûri mûnene makîria ya ûrîa mangîendire.

Vûrûri ûrîa wagaîrwe Zebuluni

¹⁰ Andû a kathatû kûgaîrwa maarî mbarî cia mûvîrîga wa Zebuluni. Vûrûri ûrîa maagaîrwe wakinyîte Saridi.

¹¹ Kuuma vau mûvaka wao wathiîte mwena wa îthûîro nginya Mareali, ûvutîtie Dabeshethi na ûkîthiî kinya karûnjî karîa karî mwena wa îrathîro wa Jokineamu.

¹² Naguo mwena ûrîa wîngî wa Saridi, mûvaka wathiîte na mwena wa îrathîro nginya mûvakarî wa Kisilothi Taboru, ûkîvîtûka ûthiîrîrîte Daberathi nginya Jafia.

¹³ Kuuma Jafia nîwathiîte na mbere na mwena wa îrathîro ûkathiî Gathu Heferi na Ethikazini. Nîwacokete ûkegata werekerete Nea njîrarî ya kûthiî Rimoni.

¹⁴ Mwena wa rûgûrû, mûvaka waumîte Nea ûkegata werekerete Hanathoni na ûkathirîra Kîamndarî Kîam Ifitaheli.

¹⁵ Nîwanyitîte Katathi, Nahalali, Shimuroni, Idala na Bethilehemu. Mau monthe maarî matûûra manene îkûmi na maîrî wa vamwe na icagi irîa ciarî vakuvî namo.

¹⁶ Matûûra mau vamwe na icagi ciamo maarî vûrûrirî ûrîa wagaîrîtwe mûvîrîga wa Zebuluni na mbarî ciaguo ûtuîke wao.

Vûrûri ûrîa wagaîrwe Isakaru

¹⁷ Vûrûri wa kana kûgawa warî wa mbarî cia mûvîrîga wa Isakaru.

¹⁸ Vûrûri wao wanyitîte matûûra ma Jezireeli, Kesulothu, Shunemu,

¹⁹ Hafaraimu, Shioni, Anaharathi,

²⁰ Rabithu, Kishioni, Ebezi,

²¹ Remethi, Enganimu, Enihada, na Bethipazezi.

²² Mûvaka nîwacokete ûkanyita Taboru, Shahazuma na Bethi Shemeshi na ûkathirîra rûnjîrî rwa Jorodani. Mau maarî matûûra manene îkûmi na matandatû wa vamwe na icagi irîa ciarî vakuvî namo.

²³ Matûûra mau na icagi ciamo ciarî vûrûrirî ûrîa wagaîrwe mbarî cia mûvîrîga wa Isakaru ûtuîke wao.

Vûrûri ûrîa wagaîrwe Asheri

²⁴ Mûvîrîga wa gatano kûgaîrwa warî mûvîrîga wa Asheri vamwe na mbarî ciaguo.

²⁵ Vûrûri ûcio maagaîrwe wanyitîte Helikathu, Hali, Beteni, Akishafu,

²⁶ Alameleki, Amadi na Mishali. Mwenarî wa îthûîro nîwanyitîte Karimeli na Shihoru Libunathu.

²⁷ Kuuma Shihoru Libunathu, mûvaka nîwacokete ûkegata na mwena wa îrathîro ûkîthiî nginya Bethidagoni. Nîwacokete ûkavutia vûrûri wa Zebuluni na ûkavutia Kîamnda Kîam Ifutaheli werekerete Bethemeki na Neieli mwena wa îthûîro. Nîwathiîte na mbere mwena ûcio wa rûgûrû nginya Kabuli,

²⁸ Eburoni, Rehobu, Hamoni, Kana na ûkathiî nginya Sidoni îrîa nene.

²⁹ Mûvaka nîwacokete ûkegata ûkathiîra Rama na ûgakinya îtûûra rîrîa ririgîre rîa Turo. Nîwacokete ûkegata ûkathiîra Hosa na ûkathirîra îriarî rîa Mediterania. Vûrûri ûcio nwa wanyitîte matûûra ma Mahalabu, Akizibu,

³⁰ Uma, Afeku na Rehobu. Mau monthe maarî matûûra manene mîrongo îîrî na maîrî vamwe na icagi irîa ciarî vakuvî namo.

³¹ Matûûra mau na icagi ciamo maarî vûrûrirî ûrîa wagaîrwe mbarî cionthe cia mûvîrîga wa Asheri ûtuîke wao.

Vûrûri ûrîa wagaîrwe Nafutali.

³² Mûvîrîga wa Nafutali nîguo wagaîrwe vûrûri wao ûrî wa gatandatû. Maagaîrwe vûrûri ûcio kûringana na mbarî ciao.

³³ Mûvaka wao wambîrîrîtie Helefu mûtîrî ûrîa mûnene wa mûvuru ûrîa ûrî Zaananimu na ûkathiî Adaminekebu, Jamunia nginya Lakumu na ûkîthirîra rûnjîrî rwa Jorodani.

³⁴ Nîwacokete ûkegata na mwena wa îthûîro ûvîtûkîrîte Azinothu Taboru na ûgîkinya Hukoku ûvutîtie vûrûri wa Zebuluni mwena wa îveti na vûrûri wa Asheri mwena wa îthûîro. Naguo vûrûri wa Juda nîwavutîtue nî mûvaka wa mûvîrîga wa Nafutali rûnjîrî rwa Jorodani mwena wa îrathîro.

³⁵ Kwarî na matûûra maarî mairigîre vûrûrirî wa Nafutali. Namo matûûra mau nî: Zidimu, Zeri, Hamathi, Rakathu, Kinerethi,

³⁶ Adama, Rama, na Hazoru,

³⁷ Kedeshi, Ederei, Enihazoru,

³⁸ Yironi, Migidaleli, Horemu, Bethanathi na Bethishemeshi. Mau monthe maarî matûûra manene îkûmi na kenda vamwe na icagi irîa ciarî vakuvî namo.

³⁹ Matûûra mau vamwe na icagi ciamo maarî vûrûrirî ûrîa wagaîrwe mûvîrîga wa Nafutali na mbarî ciaguo ûtuîke wao.

Vûrûri ûrîa wagaîrwe Dani

⁴⁰ Mûvîrîga wa Dani nîguo wagaîrwe vûrûri wao ûrî wa mûgwanja.

⁴¹ Vûrûri ûcio maagaîrwe wanyitîte Zora, Eshitaoli, Irushemeshi,

⁴² Shalabini, Aijaloni, Ithila,

⁴³ Eloni, Timuna, Ekironi,

⁴⁴ Eliteke, Gibethoni, Baalathi,

⁴⁵ Jehudi, Beneberaki, Gathirimoni,

⁴⁶ Mejarikoni na Rakoni na vûrûri ûrîa warî vakuvî na Jopa.

⁴⁷ Vûrûri wa Dani nîwacunanirwe. Naguo mûvîrîga wa wa Dani nîwatharîkîre îtûûra rîa Laishi. Marîtharîkîra nîmaarînyitire na makîûraga andû a kuo na makîrîtua itûûra rîao. Nîmaatûûrire îtûûrarî rîu na makîgarûra rîîtwa rîarîo rîgîtiga gwîtagwa Laishi rîgîcoka gwîtagwa Dani. Maarîtanirie na Dani îthe wao wa tene.

⁴⁸ Matûûra mau monthe vamwe na icagi ciamo maarî ma vûrûri ûrîa wagaîrwe mûvîrîga wa Dani na mbarî ciaguo ûtuîke wao.

Vûrûri ûrîa wagairwe ûrî wa mûthiia

⁴⁹ Andû a Isiraeli nîmaarîkirie kûgaîra mîvîrîga icunjî cia vûrûri ituîke ciao. Nîmaacokire makîgaîra Joshua mûvîcî wa Nuni gîcunjî gîake.

⁵⁰ Ngai-Mûnene nîwathanîte atî Joshua akaagaîrwa îtûûra rînene rîrîa ageetia. Nîwaverwe îtûûra rînene rîa Timunathisera rîrîa rîrî vûrûrirî ûrîa ûrî irîma wa Efiraimu. Nîwacokire akîrîtuma rîngî na agîtûûra kuo.

⁵¹ Ûguo nîguo Eleazaru mûthînjîri-Ngai na Joshua mûvîcî wa Nuni marî na atongoria a mbarî cia mîvîrîga ya andû a Isiraeli maagaire vûrûri. Maaûgaire na njîra ya kûûthîra maûrîtie ûtaaro kuuma kûrî Ngai-Mûnene marî Shilo mûrangorî wa îgema rîa Ngai-Mûnene. Kwoguo nîmaarîkirie kûûgaa.