Josh 17 - ÎVUKU RÎA ÛVORO MWARO

Manase a mwena wa Îthûîro

¹ Josefu aarî na avîcî aîrî, Manase na Efiraimu. Manase nîke warî îrikithathi rîa Josefu. Îrikithathi rîa Manase rîarî mwanake wetagwa Makiru na aarî njamba ya mbaara. Makiru aarî îthe wa Gileadi. Kwoguo Gileadi na Bashani, mavûrûri marîa marî mwena wa îrathîro rîa Jorodani nîmaagaîrwe Makiru.

² Naguo vûrûri ûrîa warî mwena wa îthûîro wa rûnjî rwa Jorodani nîwagaîrwe Abiezeri, Heleki, Asirieli, Shekemu, Heferi, na Shemida. Andû acio maarî arûme njiarwa cia Manase mûvîcî wa Josefu na nîo maarî atongoria a mbarî ciao.

³ Nwatî Zelofehadi mûvîcî wa Heferi, Heferi mûvîcî wa Gileadi, Gileadi mûvîcî wa Makiru ûrîa warî îrikithathi rîa Manase ndaarî na ciana cia anake nwatî aarî na erîtu atheri. Namo marîîtwa mao nî: Mahila, Noa, Hogila, Milika, na Tiriza.

⁴ Nao nîmaathiîre kûrî Eleazaru ûrîa warî mûthînjîri-Ngai, Joshua na kûrî atongoria na makîmeera atîrî, “Ngai-Mûnene nîwathire Musa agaatûgaîra vûrûri ûtuîke wetû wata ûguo aragaîra andû acio engî etû a arûme.” Kwoguo, wata ûguo Ngai-Mûnene aathanîte nîmaagaîrwe vûrûri wao wanao.

⁵ Kwoguo mûvîrîga wa Manase nîwagaîrwe icunjî îkûmi cia vûrûri ûrîa warî mwena wa îthûîro rîa rûnjî rwa Jorodani, wa vamwe na Gileadi na Bashani irîa ciarî mwena wa îrathîro wa rûnjî rwa Jorodani,

⁶ nîûndû njiarwa ciake cia erîtu nîciagaîrwe wana cio wa ûndû ûmwe na cia arûme. Naguo vûrûri wa Gileadi nîwagaîrwe njiarwa icio ciîngî cia Manase.

⁷ Vûrûri wa Manase warî kuuma Asheri kinya Mikimethathi mwena wa îrathîro wa Shekemu. Mûvaka wao nîwacokete ûkathiî na mwena wa îveti ûgakinya kûrîa gwatûûraga andû a Enitapua.

⁸ Mûvakarî wa vûrûri wa Manase na Efiraimu kwarî na îtûûra rîetagwa Tapua. Îtûûra rîa Tapua rîagaîrwe mûvîrîga wa Efiraimu, nwatî vûrûri ûrîa warîthiûrûrûkîrîtie wagaîrwe mûvîrîga wa Manase.

⁹ Mûvaka wa vûrûri wa Manase nîwanyûrûrûkîte ûgakinya karûnjîrî getagwa Kana. Nîwacokete ûkathiîrîra karûnjîrî kau na mwena wa rûgûrû ûgîkinya îriarî rîa Mediterania. Matûûra marîa maarî mwena wa îveti wa karûnjî ga kana maagaîrwe mûvîrîga wa Efiraimu, nwatî maarî vûrûrirî wa Manase.

¹⁰ Vûrûri ûrîa warî mwena wa îveti wa karûnjî ga Kana wagaîrwe Efiraimu, naguo vûrûri ûrîa warî mwena wa rûgûrû wa karûnjî kau wagaîrwe Manase. Îria rîa Mediterania nîrîo rîarî mûvaka wa mûvîrîga wa Efiraimu na wa Manase mwena wa îthûîro. Mwena wa rûgûrû na îthûîro wa mûvîrîga wa Manase maavakanîte na mûvîrîga wa Asheri. Naguo mwena wa rûgûrû na îrathîro maavakanîte na mûvîrîga wa Isakaru.

¹¹ Mavûrûrirî marîa maagaîrwe Isakaru na Asheri kwarî na matûûra manene na icagi irîa ciarî vakuvî namo na maagaîrîtwe mûvîrîga wa Manase. Matûûra mau maarî: Bethi Shani na Ibileamu, Doru (rîrîa rîrî rûtere rwa îria), Endoru, Taanaki, Megido, vamwe na icagi irîa ciarî vakuvî namo.

¹² Andû a mûvîrîga wa Manase matianavota kwîngata andû a Kanaani arîa maatûûraga matûûrarî mau, kwoguo nwa maathiîre na mbere gûtûûra kuo.

¹³ Rîrîa andû a Isiraeli maagîre vinya matiengata Akanaani onthe kuuma kuo, nwatî andû a Isiraeli nîmaamarutithagia wîra na vinya.

Efiraimu na Manase a mwena wa îthûîro nîmaaûririe magaîrwe vûrûri wîngî

¹⁴ Njiarwa cia Josefu nîciaûririe Joshua atîrî, “Nîkî kîratûmire ûtûgaîra gîcunjî kîmwe tu Kîam vûrûri gîtuîke gîetû? Tue tûrî eengî nîûndû Ngai-Mûnene nîatûrathimîte.”

¹⁵ Joshua nîwamacokerie atîrî, “Ethîrwa mûrî eengî na vûrûri wa Efiraimu ûrîa ûrî irîma nî mûnini mûno ndûngîmwîgana, thiîni vûrûrirî wa Aperizi na Refaimu kûu mûtitûrî mûkethererie kîthaka kuo ûtuîke wenyu.”

¹⁶ Nacio njiarwa cia Josefu nîciacokerie Joshua atîrî, “Vûrûri ûrîa ûrî irîma tî mûnene wa gûtwîgana. Nwatî vûrûri ûrîa mwaraganu wa Bethi Sheani na matûûra marîa maûthiûrûrûkîrîtie na Kîamnda Kîam Jezireeli gûtûûraga Akanaani. Andû acio marî na ikaari cia mbarathi cia cuuma.”

¹⁷ Joshua nîwacokire akîra njiarwa cia Josefu, na nîo mûvîrîga wa Efiraimu na wa Manase atîrî, “Mue mûrî eengî na mûrî na vinya mûno. Nîmûkwongererwa îgai rîenyu.

¹⁸ Vûrûri ûrîa ûrî irîma nîûtuîka wenyu. Wana ethîrwa nî mûtitû, mue mûkaaûtheria na ûtuîke wenyu wonthe. Naguo ûvoro wîgiî andû a Kanaani, wana ethîrwa marî na ikaari cia mbarathi cia cuuma na marî na vinya nîmûkaamengata maume kuo.”