Josh 14 - ÎVUKU RÎA ÛVORO MWARO

Vûrûri wa mwena wa îthûîro rîa rûnjî rwa Jorodani nîwagaîrwe

¹ Ûyû nîguo mûtaratara wa ûrîa vûrûri wa Kanaani wagaanirue gatagatîrî ka andû a Isiraeli. Vûrûri ûcio warî mwena wa îthûîro wa rûnjî rwa Jorodani. Mûthînjîri-Ngai Eleazaru, Joshua mûvîcî wa Nuni na atongoria a mbarî cia mîvîrîga ya Isiraeli nîmaagaire vûrûri ûcio kûringana na andû ao.

² Musa nîwathîtwe nî Ngai-Mûnene atî vûrûri ûyû ûkaagaanua na njîra ya kûthîrwa. Naguo nîwagaîrwe mîvîrîga kenda na nuthu ya andû a Isiraeli.

³ Musa nîwarîkîtie kûgaania vûrûri ûrîa warî mwena wa îrathîro wa rûnjî rwa Jorodani wagaîrîtwe mîvîrîga îrî na nuthu ya andû a Isiraeli, nwatî mûvîrîga wa Lawi ndwagaîrwa kûndû vamwe nao.

⁴ Njiarwa cia Josefu nîciagaanirue igîtuîka mîvîrîga îrî: Mûvîrîga wa Manase na mûvîrîga wa Efiraimu. Mûvîrîga wa Lawi ndwagaîrwa vûrûri ûtuîka wao. Vandû va ûguo Musa nîwamavere matûûra nîguo matûûrage kuo na kûndû gwa kûrîthagua nîûndû wa ndîthia yao.

⁵ Andû a Isiraeli maagaire vûrûri ûcio kûringana na ûrîa Ngai-Mûnene aathîte Musa.

Heburoni nîyaverwe Kalebu

⁶ Andû amwe a kuuma mûvîrîgarî wa Juda nîmaathiîre kûrî Joshua kûu Giligali. Ûmwe wao aarî Kalebu mûvîcî wa Jefune wa mbarî ya Kenezi. Nake Kalebu nîwerire Joshua atîrî, “We nîwicî ûrîa Ngai-Mûnene eerire Musa mûndû wa Ngai ûvoro wîgiî nie nawe vîndî îrîa twarî Kadeshi-barinea.

⁷ Rîrîa Musa ndungata ya Ngai-Mûnene aandûmire kuuma Kadeshi-barinea nthiî ngathigane vûrûri ûyû naarî na ûkûrû wa mîaka mîrongo îna. Naindîre Musa ûvoro wa ma.

⁸ Nwatî andû arîa naathiîcanirie nao nîmaatûmire andû etû metigîre. Nwatî nie nînathîkîre Ngai-Mûnene, Ngai wakwa nîrî na wîvokeku.

⁹ Nîûndû nînathîkire, Musa nîwambîrîre nama atî vûrûri ûrîa naakinyire na magûrû makwa nîûgaatuîka wakwa na ciana ciakwa tene na tene nîûndû nînatuîkire mwîvokeku kûrî Ngai-Mûnene, Ngai wakwa.

¹⁰ Nwatî rîu taroria, mîaka mîrongo îna na îtano nîmîthiru kuuma rîrîa Ngai-Mûnene eerire Musa ûguo vîndî îrîa andû a Isiraeli maavîtûkîrîrîte werûrî. Rîu nîrî na ûkûrû wa mîaka mîrongo înana na îtano na Ngai-Mûnene nîambigîte mwoyo nginya ûmûnthî.

¹¹ Nîrî na vinya ûmûnthî wata ûrîa naarî na vinya mûthenya ûrîa Musa aandûmire. Nîrî na vinya wa kûrûa wana wa ûndû wîngî.

¹² Kwoguo ngaîra vûrûri ûyû ûrî irîma ûrîa Ngai-Mûnene aambîrîre mûthenya ûcio twamwindîre ûvoro. Mûthenya ûcio twamwîrire atî andû arîa metagwa Anaki maatûûraga matûûrarî manene na mairigîre. Ngai-Mûnene nî akûndethia na nie nîngûmengata maume kuo wata ûrîa ke aaugire.”

¹³ Joshua nîwarathimire Kalebu mûvîcî wa Jefune. Nîwacokire akîmûva îtûûra rîa Heburoni rîtuîke îgai rîake.

¹⁴ Kwoguo îtûûra rîa Heburoni rîtûûraga rîrî rîa Kalebu mûvîcî wa Jefune na njiarwa ciake nîûndû nîwathîkîre Ngai-Mûnene, Ngai wa Isiraeli.

¹⁵ Mbererî îo Heburoni yetagwa Kiriathariba. (Ariba aarî mûndû warî ngumo mûno gûkîra onthe wa andû arîa meetagwa Anaki.) Naguo vûrûri ûcio nîwagîre thayû gûtarî mbaara.