Josh 1 - ÎVUKU RÎA ÛVORO MWARO

Ngai nîwathire Joshua akavoote Kanaani

¹ Vuva wa Musa ndungata ya Ngai-Mûnene gûkua, Ngai-Mûnene nîwerire Joshua mûvîcî wa Nuni, ûrîa watethagîrîria Musa

² atîrî, “Ndungata yakwa Musa nîîkuîte. Rîu ûkîra mûrî na andû a Isiraeli mûringe rûnjî rwa Jorodani mûthiî vûrûrirî ûrîa ngûmava.

³ Kûrîa kuonthe mûgaakinya na magûrû menyu ngamûva kuo wata ûrîa nerîîre Musa.

⁴ Mîvaka ya vûrûri wenyu îkethîrwa yumîte werûrî mwena wa îveti nginya mwena wa rûgûrû irîmarî cia Lebanoni. Na kuuma îriarî rîa Mediterania rîrîa rîrî mwena wa îthûîro nginya rûnjîrî rûrîa rûnene rwa Farati, ûvîtûkîrîrîte vûrûrirî wa Ahiti.

⁵ Gûtirî mûndû ûgaakûvoota vîndî îrîa yonthe ûgûtûûra mwoyo. Ngethagîrwa nîrî nawe ta ûrîa nethagîrwa nîrî na Musa. Ndigaagûtiganîria.

⁶ Gîa na vinya na ûmîrîrie nîûndû nîwe ûgaatûma andû aya magae vûrûri ûrîa nerîre methe mao na ngîîvîta atî nîngaamava.

⁷ Kwoguo gîa na vinya na ûmîrîrie na wathîkagîre watho wonthe kûringana na ûrîa Musa ndungata yakwa aakwathire. Ndûkagarûrûke na mwena wa ûrîo kana wa ûmotho ume wathorî ûcio. Na wona weka ûguo ûkavootanaga kûrîa kuonthe ûkathiîcaga.

⁸ Ririkanaga vîndî cionthe kûthoma îvuku rîîrî rîa watho vîndî îrîa mûkûgooca. Rîthomage ûtukû na mûthenya, na wonage atî nîwathîkîra ûrîa wonthe rîandîkîtwe, nawe nîûkaagîa na mûtûûrîre mwaro.

⁹ Ririkana atî nakwatha ûgîe na vinya na ûmîrîrie! Ndûgetigîre kana ûgîe guoya, nîûndû nie Ngai-Mûnene, Ngai waku, ngethagîrwa nîrî nawe kûrîa kuonthe ûkathiîcaga.”

Joshua nîwavere andû mawatho

¹⁰ Joshua nîwacokire akîatha atongoria a andû a Isiraeli akîmera atîrî,

¹¹ “Thiîni kûrîa kuonthe andû mambîte magema mûmeere atîrî, ‘Varîriani irio cienyu, nîûndû mîthenya îthatû yûkîte nîmûkaaringa rûnjî rûrû rwa Jorodani mûthiî mûkegwatîre vûrûri ûrîa Ngai-Mûnene, Ngai wenyu akaamûva.’ ”

¹² Joshua nîwacokire akîîra andû a mûvîrîga wa Reubeni, Gadi na nuthu ya mûvîrîga wa Manase atîrî,

¹³ “Ririkanani ûrîa Musa ndungata ya Ngai-Mûnene aamwîrire. Ke aamwîrire atîrî, Ngai-Mûnene, Ngai wenyu nîakaamûva vandû va kûvurûka na nîguo vûrûri ûyû amûveete.

¹⁴ Aka enyu, ciana na ng'ombe cienyu nîciîkara gûkû. Nwatî andû enyu arîa mangîrûa, nîmoce indo ciao cia mbaara na maringe rûnjî rwa Jorodani nîguo magatethie Aisiraeli arîa engî,

¹⁵ nginya rîrîa megwatîre vûrûri ûrîa ûrî mwena wa îthûîro wa rûnjî rwa Jorodani. Vûrûri ûcio nîguo Ngai-Mûnene Ngai wenyu akûmava na marîkia kwîgwatîra vûrûri ûcio, namue nîmûgaacoka mûtûûre vûrûrirî ûrîa Musa ndungata ya Ngai aamûveere ûrîa ûrî mwena wa îrathîro rîa Jorodani ûtuîke wenyu.”

¹⁶ Nao nîmaacokerie Joshua atîrî, “Ûrîa wonthe watwatha twîke nîtûgwîka na kûrîa kuonthe ûngîtûtûma nîtûkûthiî.

¹⁷ Tue tûgaakwathîkagîra wata ûrîa twathîkagîra Musa. Ngai-Mûnene, Ngai waku nîethagîrwe nawe wata ûrîa eethagîrwa na Musa.

¹⁸ Mûndû wa wonthe ûkaaregana nawe na arege kwathîkîra watho waku, nî akaaûragwa. Gîa na vinya na ûmîrîrie!”