Jona 3 - ÎVUKU RÎA ÛVORO MWARO

Jona nîwathîkîre Ngai-Mûnene

¹ Ngai-Mûnene nîwacokire akîarîria Jona riita rîa kaîrî, akîmwîra atîrî,

² “Ûkîra ûthiî Nineve, îtûûra rîu rînene, ûkanîrîre ndûmîrîri îo ngûvete kûrî andû a kuo.”

³ Kwoguo Jona nîwaûkîrire na akîthiî Nineve wata ûrîa aathirwe nî Ngai-Mûnene. Îtûûra rîa Nineve rîarî rînene mûno. Wariî wa rîo warî wa rûgendo rwa mîthenya îthatû, mûndû athiîte na magûrû.

⁴ Rîrîa Jona aakinyire, nîwatoonyire îtûûrarî, na vuva wa kûthiî rûgendo rwa mûthenya mûgima, nîwanîrîre kûrî andû a îtûûra rîu atîrî, “Vuva wa mîthenya mîrongo îna kuuma ûmûnthî, îtûûra rîîrî rîa Nineve nîrîgaacûkangua!”

⁵ Andû a Nineve nîmeetîkirie ndûmîrîri ya Ngai îo meerirwe nî Jona. Kwoguo nîmaanîrîre kûgîe na îvinda rîa wînyerekia. Andû onthe nîmeekîrire nguo cia macakaya kuuma ûrîa mûnene nginya ûrîa mûnini.

⁶ Rîrîa mûthamaki wa Nineve eegwire ûguo, nîwaûkîrire na akiuma gîtîrî gîake Kîam ûthamaki, akîruta nguo yake ya ûthamaki na agîkîra nguo ya macakaya na agîkara nthî mûurî.

⁷ Nîwacokire akîanîrîra kûrî andû a Nineve akîmeera atîrî, “Ndûmîrîri kuuma kûrî mûthamaki vamwe na anene ake onthe: Nathana atî gûtirî mûndû wa wonthe, nyamû, ng'ombe kana ng'ondu; ikaarîa kana inyue kîndû.

⁸ Andû onthe wana nyamû cia kûrîthua nwanginya ciîkîrwe nguo cia macakaya. Mûndû wa wonthe nwanginya avoe na kinyi kûrî Ngai na atige mîtugo yake mîcûku na ciîko ciake cia waganu.

⁹ Ngai avota kwîricûkwa na atige kûrakara, na kwoguo tîtûkua!”

¹⁰ Rîrîa Ngai oonire ûrîa meekire na ûrîa maatiganire na ciîko ciao cia waganu, nîwericûkirwe na ndaamaverithia ta ûrîa aaugîte nîagwîka.