Jona 2 - ÎVUKU RÎA ÛVORO MWARO

Îvoya rîa Jona

¹ Jona nîwacokire akîvoya Ngai-Mûnene, Ngai wake arî îvurî rîa nthamaki

² na akiuga atîrî, “Rîrîa naagiîkaga, nînaagwîtire we Ngai-Mûnene, na nîwandethirie. Rîrîa naarî îvurî rîa arîa akuû, nînetanire na ûkîmbîgua.

³ We nîwambikirie kûrîa kûrikîru gîtina Kîam îria, kûrîa naarî rungu rwa manjî, kîvuvûkanio na mwîcûro wa manjî ciarî îgûrû rîakwa.

⁴ Neciragia naarî mwîngate kuuma kûrî we, na ndikona hekarû yaku ntheru rîngî.

⁵ Manjî nîmaandigicîrie na makîngunîkîra viû ngîremwa nî kûveva, îria rîrîa rîmeraga îriarî nîrîanjovanirie kîongo.

⁶ Nînaanyûrûrûkire nginya nthî ya irîma, nathiîre nginya vûrûrirî ûrîa naavingîrwe nî ivingo ciaguo tene na tene. Nwatî we, Ngai-Mûnene, Ngai wakwa, nîwandutire îrimarî rîu nîrî mwoyo.

⁷ Rîrîa neguire ngîambîrîria kûthirwa nî vinya, nînaakûvoire, we Ngai-Mûnene, na nîwambîguire ûrî hekarûrî yaku ntheru.

⁸ Arîa magoocaga mîvuanano îtarî kîene, nîmaatiganagîria wîvokeku wao kûrî we.

⁹ Nwatî nîngaakuinîra nyîmbo cia gûgûkumia; nîngaakûrutîra îgongoona, na mvingie ûrîa mbîranîrîte na mwîvîtwa. Ngai-Mûnene nîke ûvonokanagia!”

¹⁰ Vuva wa ûguo, Ngai-Mûnene nîwacokire akîatha nthamaki îtavîke Jona rûtererî rwa îria, na nîyekire guo.