Johana 8 - ÎVUKU RÎA ÛVORO MWARO

Mûndûmûka ûrîa wanyitirwe akîtharia

¹ Jesû nîwacokire athiî Kîrîmarî Kîam Mîtî ya Mîtamaiyû.

² Kîraûko tene mûthenya ûcio wîngî, Jesû nîwacokire hekarûrî. Nao andû onthe nîmaathiîre kûrî ke, nake agîkara nthî na akîambîrîria kûmathomithia.

³ Nao arimû a watho na Afarisai nîmaamûvirîre mûndûmûka wanyitîtwe akîtharia. Nîmaacokire makîmûrûngamia mbere ya andû onthe

⁴ na makîra Jesû atîrî, “Mwarimû, mûndûmûka ûyû anyitirwe agîka maûndû ma ûtharia.

⁵ Wathorî wetû Musa aatwathire atî mûndûmûka ta ûyû aagîrîrwe arivwe na mathiga nginya akue. Rîu we ûrauga atîa?”

⁶ Nao maaûririe ûguo makîenda kûgeria Jesû nîguo mone ûndû ûrîa mangîmûthitanga naguo. Nwatî Jesû nîwakuamîrîrie na akîandîka nthî na Kîamra gîake.

⁷ Rîrîa maakîrîrîrie kûria Jesû ciûria, Jesû nîwenamûkire na akîmeera atîrî, “Angîthîrwa kûrî na mûndû wana ûmwe gatagatîrî kenyu ûtaanevia nî ethîrwe arî wa mbere gwikia mûndûmûka ûyû îthiga.”

⁸ Nake nîwakuamîrîrie na akîthiî na mbere kwandîka nthî.

⁹ Rîrîa meegwire ûguo, nîmaambîrîrie kûthiî ûmwe kwa ûmwe, mambîrîrîtue nî arîa maarî akûrû. Nao nîmaatigire Jesû arî wenga na mûndûmûka ûcio arûngamîte wa varîa aarî.

¹⁰ Nake Jesû nîwenamûkire na akîûria mûndûmûka ûcio atîrî, “Mûndûmûka ûyû, marî kû andû acio. Anga gûtirî mûndû wagûtuîra?”

¹¹ Nake mûndûmûka ûcio nîwamûcokerie atîrî, “Mwathani, gûtirî mûndû wanduîra.” Jesû nîwamwîrire atîrî, “Wa nanie ndigûgûtuîra. Thiî na ndûgacoke kwîvia rîngî.”]

Jesû nîke ûtheri wa nthî

¹² Jesû nîwarîrie Afarisai rîngî akîmeera atîrî, “Nie nînie ûtheri wa nthî. Mûndû wa wonthe ûnûmagîrîra nîakûgîa na ûtheri wa mwoyo na ndakaathiîcagîrîra ndumarî.”

¹³ Nao Afarisai nîmaamwîrire atîrî, “We nîkwa ûrevecana ûira waku. Ûira ûcio waku tî wa ma.”

¹⁴ Nake Jesû nîwamacokerie atîrî, “Wana ethîrwa nîravecana ûira wakwa, ûira ûrîa nîramûva nî wa ma nîûndû nie nîmbîcî kûrîa naaumire na kûrîa nthiîte. Mue mûtiîcî kûrîa naaumire wana kana kûrîa nthiîte.

¹⁵ Mue mûtucanagîra ciira kûringana na ûmûndû. Nie gûtirî mûndû nducagîra ciira.

¹⁶ Nwatî wana ningîtucanîra ciira îtua rîakwa rîngîthîrwa rîrî rîa ma, nîûndû nditucanagîra ciira nîrî nienga. Nwatî twîthagîrwa tûrî na Vava ûrîa wandûmire.

¹⁷ Nîkwandîkîtwe Wathorî wenyu atî ûira wa andû aîrî ûngîgucana, ûira ûcio nî wa ma.

¹⁸ Nie nîmvecanaga ûira wakwa, wana Vava ûrîa wandûmire nîavecanaga ûira wakwa.”

¹⁹ Nao Afarisai nîmaamûririe atîrî, “Aguo arî kû?” Nake Jesû nîwamacokerie atîrî, “Mue mûtimbîcî na mûtiîcî Vava. Angîthîrwa nîmûmbîcî nîmûngîramenya Vava.”

²⁰ Jesû aaririe maûndû mama monthe vîndî îrîa aathomithanagia hekarûrî arî vakuvî na kanyomba karîa kaaigagwa tûthandûkû tûrîa twekagîrwa mûvothi. Nwatî gûtirî mûndû wana ûmwe wamûnyitire nîûndû îvinda rîake rîtiarî rîkinyu.

Mûtingîvota kûthiî kûrîa nie ngûthiî

²¹ Wana rîngî Jesû nîwamerire atîrî, “Nie nîngûthiî namue mûkaanjaria, nwatî nîmûgaakua nî mevia menyu. Mue mûtingîvota kûthiî kûrîa ngûthiî.”

²² Kwoguo Ayahudi nîmeeranire atîrî, “Ke arauga atî tûtingîvota kûthiî kûrîa akûthiî. Nîkwa arenda kuga atî nîakwîyûraga?”

²³ Nake Jesû nîwamacokerie atîrî, “Mue muumîte gûkû nthî, nwatî nie nyumîte îgûrû. Mue mûrî a gûkû nthî, nwatî nie ndirî wa gûkû nthî.

²⁴ Na nîkîo namwîra atî mwona mwathiî na mbere na kwîvia, mûgaakua. Na mûgaakua mûrî wana mevia menyu angîthîrwa mûtigwîtîkia atî ‘Nie Nînie Nie’ ”

²⁵ Nao nîmaamûririe atîrî, “We nîwe û?” Nake Jesû nîwamacokerie atîrî, “Nie nînaamwîrire nîrî û kuuma wa Kîammbîrîria.

²⁶ Nîrî na maûndû meengî nîngiuga mamwîgiî na ma kûmûtuîra ciira. Nwatî ûrîa wandûmire nîmwîvokeku na nie mvecaga andû tu ûvoro ûrîa mbîguîte kuuma kûrî ke.”

²⁷ Nao matiataûkîrwa atî Jesû aamavecaga ûvoro wîgiî Îthe.

²⁸ Kwoguo nîwamerire atîrî, “Vîndî îrîa mûgaaûkîrîria Mûrû wa Mûndû îgûrû, nîmûkaamenya atî ‘Nînie Nie’ na atî gûtirî ûndû wana ûmwe mbîkaga nîyathîte, nwatî mbugaga tu wa ûrîa Vava ambathîte mbuge.

²⁹ Nake ûrîa wandûmire arî vamwe nanie. Ke tîmûndigu nîrî nienga nîûndû vîndî cionthe mbîkaga maûndû marîa mamûkenagia.”

³⁰ Andû eengî arîa meegwire Jesû akîaria maûndû mau, nîmaamwîtîkirie.

Ûma nîguo ûkaamûruta ûkomborî

³¹ Kwoguo Jesû nîwerire Ayahudi atîrî, “Mwona mwathîkîra ciugo ciakwa, nîmûgûtuîka arutwa akwa.

³² Nîmûkaamenya ûma na ûma nîûkaamûruta ûkomborî.”

³³ Nao Ayahudi nîmaamwîrire atîrî, “Tue tûrî njiarwa cia Iburahimu na tûtianatuîka ngombo cia mûndû wana ûrîkû. Ûrenda kuga atîa rîrîa ûrauga atî nîtûgaakûûrwa ûkomborî?”

³⁴ Nake Jesû nîwamerire atîrî, “Nîramwîra na ma atî, mûndû wa wonthe wîvagia, nî ngombo ya wîvia.

³⁵ Ngombo ndîtûûraga mûciî tene na tene, nwatî mûriû atûûraga kuo tene na tene.

³⁶ Kwoguo Mûriû angîmûruta ûkomborî, nîakûmûruta viû.

³⁷ Nie nîmbîcî atî mûrî njiarwa cia Iburahimu. Nwatî mûrenda kûmbûraga nîûndû mûtiîtîkagîra maûndû marîa nthomithanagia.

³⁸ Nie mbaragia maûndû marîa Vava amonetie, nwatî mue mwîkaga maûndû marîa îthe wenyu amwîrîte.”

³⁹ Nao Ayahudi nîmaamwîrire atîrî, “Îthe wetû nî Iburahimu.” Nake Jesû nîwamerire atîrî, “Angîthîrwa na ma mûrî ciana cia Iburahimu, nîmûngîkaga maûndû ta marîa ke eekire.

⁴⁰ Ûndû ûrîa nie naaneka nî kûmûva ûvoro wa ma ûrîa neguire kuuma kûrî Ngai, nwatî mue mûrenda kûmbûraga. Iburahimu ndeka ûndû ta ûcio.

⁴¹ Mue mûreka ûrîa îthe wenyu eekire.” Nao nîmaamûcokerie atîrî, “Ngai ke mwene nîke Îthe wetû na tue tûrî ciana ciake cia ma.”

⁴² Nake Jesû nîwamerire atîrî, “Angîthîrwa na ma Ngai nîke Îthe wenyu, nîmûngîmendete nîûndû naaumire kûrî Ngai na rîu nîrî ava. Nie tînie netûmire nwatî Ngai nîke wandûmire.

⁴³ Mûrarega gûtaûkîrwa nî ûrîa nîrauga nîkî? Mûrarega gûtaûkîrwa nîûndû mûtirenda kûthikîrîria ndûmîrîri yakwa.

⁴⁴ Mue mûrî ciana cia îthe wenyu Ngoma na mwendaga gwîka maûndû wata marîa îthe wenyu endaga gwîka. Kuuma wa Kîammbîrîria ke aarî mûragani na ndaanenda ûvoro wa ma nîûndû ke ndaanaria ûvoro wa ma. Rîrîa araria maveeni ethagîrwa akîaria kîrîa tu kîrî ngororî yake, nîûndû ke nî mûthaani na nîke îthe wa maveeni.

⁴⁵ Nwatî nie mbaragia ûvoro wa ma na nîkîo mûrarega kûmbîtîkia.

⁴⁶ Nîûrîkû gatagatîrî kenyu ûngîvota kwonania atî nîrî na ûcuke? Angîthîrwa nie mbaragia ûvoro wa ma, mûrarega kûmbîtîkia nîkî?

⁴⁷ Mûndû wa wonthe umîte kûrî Ngai nîwathîkagîra ciugo cia Ngai. Nwatî mue mûtiumîte kûrî Ngai na kîu nîkîo kîratûma mûrege kûthikîrîria.”

Jesû na Iburahimu

⁴⁸ Nao Ayahudi nîmaaûririe Jesû atîrî, “Na kinthî tue tûtiraria ûma tûkiuga atî we ûrî Mûsamaria na ûrî na ngoma?”

⁴⁹ Nake Jesû nîwamacokerie atîrî, “Nie ndirî na ngoma. Nie nîmvecaga Vava gîtîîo, nwatî mue mûtimvecaga gîtîîo.

⁵⁰ Nie ndiîkumagia, nwatî kûrî na ûrîa ûngumagia na nîke ûtucanagîra ciira na kîvooto.

⁵¹ Nîramwîra na ma atî: mûndû wa wonthe wathîkagîra ciugo ciakwa ndagaakua.”

⁵² Nao Ayahudi nîmaamwîrire atîrî, “Rîu nîtwamenya na ma atî we ûrî na ngoma! Iburahimu na arathi onthe nîmaakuire, nwatî we ûratwîra atî mûndû wa wonthe wathîkagîra ciugo ciaku ndagaakua.

⁵³ We nîkwa ûrî mûnene gûkîra Iburahimu îthe wetû ûrîa wakuire? Arathi wa nao nîmaakuire. Nîkwa ûreciria we ûrî û?”

⁵⁴ Nake Jesû nîwamacokerie atîrî, “Angîthîrwa nîkwa nîrekumia, gwîkumia kûu nî kwa mana. Ûrîa ûngumagia nî Vava wa ûcio mugaga atî nîke Ngai wenyu.

⁵⁵ Mue mûtianamûmenya, nwatî nie nînîmwîcî. Angîthîrwa nwa mbuge ndimwîcî, nîngîthîrwa nîrî mûthaani wa tamue. Nwatî nie nînîmwîcî na nîmbathîkagîra kiugo gîake.

⁵⁶ Îthe wenyu Iburahimu nîwakenire agîîciria atî nîakoona îvinda rîrîa ngaaûka. Ke nîwarîonire na agîkena.”

⁵⁷ Nao Ayahudi nîmaamûririe atîrî, “Kûngîvoteka atîa gûtuîka atî we wanona Iburahimu na we ndûrî mûkinyiu wanarî mîaka mîrongo îtano?”

⁵⁸ Jesû nîwamacokerie atîrî, “Nîramwîra na ma atî Iburahimu atarî mûciare, ‘Nie naarî wa kuo.’ ”

⁵⁹ Nao nîmoocire mathiga nîguo mamwikie, nwatî Jesû nîwethithire na akiuma kûu hekarûrî.