Johana 5 - ÎVUKU RÎA ÛVORO MWARO

Jesû nîwavonirie mûndû warî kîthua

¹ Vuva wa ûguo, Jesû nîwathiîre Jerusalemu kîrugorî Kîam Ayahudi.

² Nakuo kûu îtûûrarî rîa Jerusalemu vakuvî na Kîvingo Kîam Ng'ondu, kwarî na îria rînene rîa manjî rîatumîrîtwe ithaku ithano na rîetagwa Bethizatha na rûthiomi rwa Kîhibirania.

³ Nao arwaru eengî: atumumu, ithua, na andû arîa maakuîte ciîga, nîmeekarîte ithakurî icio. [Arwaru acio nîmeetagîrîra manjî maunjugwe,

⁴ nîûndû mavinda kwa mavinda mûraika wa Mwathani nîwanyûrûrûkaga îriarî rîu na akaunjuga manjî. Nake mûrwaru wa wonthe ûrîa watuvûkaga îriarî rîu arî wa mbere manjî marîkia kunjugwa, nîwavonagua mûrimû wa wonthe ûrîa ethagîrwa arwarîte.]

⁵ Vau Kîthakurî vaarî na mûndû watûûrîte mîaka mîrongo îthatû na înana arwarîte.

⁶ Rîrîa Jesû oonire mûndû ûcio amamîte vo, nîwamenyire atî mûndû ûcio aarî mûtûûru mîaka mîîngî arî mûrwaru. Kwoguo Jesû nîwaûririe mûndû ûcio atîrî, “We nîûrenda kûvona?”

⁷ Mûndû ûcio nîwacokerie Jesû atîrî, “Mûthuuri ûyû, ava vatirî na mûndû ûngînduvukia îriarî manjî marîkia kunjugwa. Na vîndî wa yonthe îrîa nageria gwîtuvukia kuo, mûndû wîngî nîatuvûkaga kuo mbere yakwa.”

⁸ Nake Jesû nîwamwîrire atîrî, “Ûkîra woce kîvarî gîaku na ûthiî.”

⁹ Na vîndî wa îo mûndû ûcio nîwavonire, agîoca kîvarî gîake na akîîthiîra. Mûthenya ûcio gwekîkire ûguo warî wa thavatû.

¹⁰ Kwoguo Ayahudi nîmaamwîrire atîrî, “Ûmûnthî nî mûthenya wa thavatû na watho wetû ndûgwîtîkîrîtie gûkuua kîvarî gîaku.”

¹¹ Nake mûndû ûcio nîwacokerie Ayahudi acio atîrî, “Mûndû ûrîa ûmvonirie aambîrire mboce kîvarî gîakwa na nthiî.”

¹² Nao Ayahudi nîmaaûririe mûndû ûcio atîrî, “Nî mûndû ûrîkû ûcio ûkwîrire wîke ûguo?”

¹³ Nwatî mûndû ûcio wavonetue ndaamenya ûrîa wamûvonirie nîûndû Jesû nîwaûrîre kîrîndîrî kîrîa Kîamrî vau.

¹⁴ Vuva wa ûguo, Jesû nîwethîrîrie mûndû ûcio hekarûrî na akîmwîra atîrî, “Nîwona, rîu we nîwavona. Tiga kwîvagia nîguo ndûkone ûndû wîngî mûcûku makîria ya ûyû.”

¹⁵ Nake mûndû ûcio nîwacokire akîthiî kwîra Ayahudi atî Jesû nîke wamûvonetie.

¹⁶ Kwoguo Ayahudi nîmaambîrîrie kûnyarira Jesû nîûndû nîwekaga maûndû ta mama mûthenya wa thavatû.

¹⁷ Nwatî Jesû nîwerire Ayahudi atîrî, “Vava nîarutaga wîra vîndî cionthe na wa nanie nwa nginya ndute wîra.”

¹⁸ Rîrîa Jesû aaugire ûguo, Ayahudi nîmaagîre na kîîo kîîngî mûno gîa kwenda kûmûûraga. Meendaga gwîka ûguo tî nîûndû atî nîwaunîte watho wîgiî mûthenya wa thavatû, nwatî nîûndû nîwaugîte atî Ngai nî îthe kwoguo akeîganania na Ngai.

Wathani wa Mûriû

¹⁹ Kwoguo Jesû nîwamerire atîrî, “Nîramwîra na ma atî: gûtirî ûndû Mûriû ekaga eîrîte; ekaga wa ûrîa tu onaga Îthe agîka. Na wa ûrîa wonthe Îthe eekaga, wana Mûriû nîwîkaga.

²⁰ Nîûndû Îthe nîwendete Mûriû na nîamwonagia maûndû monthe marîa ke mwene ekaga. Ke nîakaamwonia wana maûndû manene ma gwîka gûkîra mama, na mue nîmûkaamaka.

²¹ Na wata ûrîa Îthe ariûkagia akuû na akamava mwoyo, ûguo nwa ta guo Mûriû avecanaga mwoyo kûrî arîa onthe endaga kûva.

²² Gûtirî mûndû ûtucagîrwa ciira nî Îthe. Ke nîwîtîkîrîtie Mûriû atucanagîre ciira,

²³ nîguo andû onthe matîîage Mûriû wata ûrîa matîîaga Îthe. Mûndû wa wonthe ûtatîîaga Mûriû, ndatîîaga Îthe ûrîa wamûtûmire.

²⁴ “Nie nîramwîra na ma atî: mûndû wa wonthe wîgucaga ndûmîrîri yakwa na agetîkia Ngai ûrîa wandûmire, arî na mwoyo wa tene na tene. Mûndû ûcio ndagaacirithua nî Ngai, nîûndû ke nîmumu kûrî arîa akuû na agatonya kûrî arîa marî mwoyo.

²⁵ Nie nîramwîra na ma atî îvinda nîrîkuvîvîriu na nîrîrîkîtie gûkinya. Îvinda rîîrî nîrîo akuû makeegua mûgambo wa Mûriû wa Ngai, na arîa makaawîgua nîmakaagîa na mwoyo.

²⁶ Na wata ûrîa Vava ke mwene arîke kiumo Kîam mwoyo, ûguo nwa ta guo atûmîte Mûriû atuîke kiumo Kîam mwoyo.

²⁷ Nake Vava nîavete Mûriû rûtha rwa gûtuîra andû ciira, nîûndû ke nî Mûrû wa Mûndû.

²⁸ Tigani kûmakua nî maûndû mama, nîûndû îvinda nîrîgaakinya rîrîa akuû onthe makeegua mûgambo wake,

²⁹ na maume mbîrîrarî ciao. Andû arîa mekîte waro nîmakaariûkua na magîe na mwoyo wa tene na tene, nwatî arîa mekîte naaî nîmakaariûkua na matuîrwe.

Aira a Jesû

³⁰ “Gûtirî ûndû nîngîka na vinya wakwa. Nducanagîra ciira kûringana na ûrîa Ngai ambîraga mbîke. Kwoguo îtua rîakwa nî rîa kîvooto nîûndû nie ndirageria kûvingia wendi wakwa, nwatî nîrageria kûvingia wendi wa ûrîa wandûmire.

³¹ “Angîthîrwa nîravecana ûira wakwa nie mwene, ûira ûcio nîravecana tî wa ma.

³² Nwatî nîmbîcî atî kûrî mûndû ûvecanaga ûira ûmbîgiî, na nie nîmbîcî atî maûndû marîa augaga mambîgiî nî ma ma.

³³ Mue nîmwatûmire anjaama enyu kûrî Johana, na Johana akîaria ûma ûrîa ûmbîgiî.

³⁴ Nie ndivatarîte ûira kuuma kûrî mûndû wana ûrîkû, nwatî nauga ûguo nîguo mûvonokue.

³⁵ Johana aakengaga ta taa yakanîte, namue nîmwendire gûkenerera ûtheri ûcio wake kavinda kanini.

³⁶ Nwatî nîrî na ûira ûmbîgiî ûkîrîte wa Johana. Maûndû marîa Vava aambîrire mbîkage nîmo maumbûraga atî Vava nîke wandûmire.

³⁷ Wana nginya Vava ûrîa wandûmire nîavecanaga ûira ûmbîgiî. Mue mûtianegua mûgambo wake na mûtianona ûrîa ekariî.

³⁸ Mue mûtiîtîkagîra ndûmîrîri yake nîûndû mûtiîtîkagia ûrîa wandûmire.

³⁹ Mue mûthomaga Mandîko Matheru nîûndû mwîciragia atî mwamathoma nîmûkûgîa na mwoyo wa tene na tene. Mandîko Matheru maragia ûvoro ûmbîgiî.

⁴⁰ Kûnarî ûguo mue mûtiendaga gûka kûrî nie nîguo mûgîe na mwoyo.

⁴¹ “Nie ndiracaria ngumo kuuma kûrî andû.

⁴² Nwatî nîmbîcî mûrî andû a mûthemba ûrîkû na nîmbîcî atî mue mûtiendete Ngai na ngoro cienyu.

⁴³ Nie mbûkîte na rîîtwa rîa Vava na mûtinyamûkagîra. Nwatî mûndû wîngî angîûka akîaragia ûrîa eîrîte, nwa mûmwamûkîre.

⁴⁴ Mue mûcaragia ngumo kuuma kûrî andû arîa engî, nwatî mûtigeragia kûgîa na ngumo kuuma kûrî ûrîa arîke Ngai.

⁴⁵ Mûtigecirie atî nie nînie ngaamûthitanga kûrî Vava. Musa ûrîa mwigîte kîîrîgîrîro kûrî ke, nîke ûkaamûthitanga.

⁴⁶ Kethîrwa na ma mue nîmwetîkîtie Musa, wa nanie nîmûngîmbîtîkîtie, nîûndû ke aandîkire ûvoro ûrîa ûmbîgiî.

⁴⁷ Nwatî angîthîrwa mûtiîtîkîtie ûvoro ûrîa aandîkire, mûngîvota atîa vi gwîtîkia ûrîa nie mbugîte?”