Johana 4 - ÎVUKU RÎA ÛVORO MWARO

Jesû na mûndûmûka Mûsamaria

¹ Jesû nîwamenyire atî Afarisai nîmeguîte atî ke nîwagîcaga na akavatithia arutwa eengî gûkîra Johana.

² (Nî ma Jesû ke mwene ndaavatithia mûndû wana ûmwe, nî arutwa ake tu maavatithagia andû.)

³ Kwoguo Jesû nîwaumire kûu vûrûrirî wa Judea na agîcoka vûrûrirî wa Galili.

⁴ Na arî rûgendorî rwa kûthiî Galili, nwa nginya angîavîtûkîrîre Samaria.

⁵ Kwoguo Jesû nîwakinyire îtûûrarî rîa Samaria rîrîa rîetagwa Sikaru, na rîarî vakuvî na mûgûnda ûrîa Jakovu aagaîrîte mûûriû wake Josefu.

⁶ Navo vaarî na kîthima Kîam Jakovu. Nake Jesû aarî mûnogu mûno nîûndû wa kûthiî rûgendo rûu. Kwoguo nîwekarire nthî rûtererî rwa kîthima kîu. Vîndî îo kwarî kîndû ta thaa thita cia mûthenya.

⁷ Mûndûmûka Mûsamaria nîwathiîre gûtava manjî kîthimarî kîu na Jesû akîmwîra atîrî, “Ngundia manjî.”

⁸ (Ûndû ûyû wekîkire vîndî îrîa arutwa ake mataarî vo nîûndû maarî athiîu îtûûrarî kûgûra irio.)

⁹ Nake mûndûmûka ûcio nîwamûririe atîrî, “Ûngîvota atîa kûmvoya manjî ma kûnyua na we wî Mûyahudi nanie nîrî Mûsamaria?” (Ayahudi matingîarîîrîre thaanirî kana manyuîre ikomberî irîa cianyunyagîrwa nî Asamaria.)

¹⁰ Jesû nîwamûcokerie atîrî, “Kethîrwa nwa ûmenye kîrîa Ngai avecanaga, na nî ûrîkû ûrakûvoya manjî ma kûnyua, we nîûngîamûvoya na nîangîakûva manjî ma mwoyo.”

¹¹ Nake mûndûmûka ûcio nîwamwîrire atîrî, “Mûthuuri ûyû, kîthima nîkîrikîru mûno na we ndûrî na kîndû ûngîtava manjî nakîo. Nîkû ûngîruta manjî ma mwoyo?

¹² Nî Jakovu îthe wetû wa tene watûveere kîthima gîkî. Ke mwene, ciana ciake na ndîthia yake nîmaanyuire manjî ma kîthima gîkî. We ûrenda kuga atî wî mûnene gûkîra Jakovu?”

¹³ Jesû nîwamûcokerie atîrî, “Mûndû wa wonthe ûnyunyaga manjî mama, nîacokaga kûnyonda.

¹⁴ Nwatî mûndû wa wonthe ûnyunyaga manjî marîa mvecanaga, ndakaanyonda rîngî. Manjî marîa ngûva mûndû ûcio nîmatuîka ta kîthima ndaarî yake kîrîa kîtherûkaga manjî marîa ma mwoyo wa tene na tene.”

¹⁵ Nake mûndûmûka ûcio nîwamwîrire atîrî, “Mûthuuri ûyû, mva manjî mau, nîguo ndikanacoke kûnyonda wana kana gûka ava rîngî gûtava manjî.”

¹⁶ Nake Jesû nîwerire mûndûmûka ûcio atîrî, “Ta thiî ûgeete mûthuuriguo na mûke ava nake.”

¹⁷ Nake mûndûmûka ûcio nîwamûcokerie atîrî, “Nie ndirî na mûthuuri.” Nake Jesû nîwacokire akîmwîra atîrî, “We ûraria ma ûkiuga ndûrî na mûthuuri.

¹⁸ We wanavikua nî athuuri atano, na mûthuuri ûcio wî nake rîu tîke mûthuuriguo. We waria ûma.”

¹⁹ Mûndûmûka ûcio nîwamwîrire atîrî, “Mûthuuri ûyû, rîu nînamenya atî we wî mûrathi.

²⁰ Methe metû ma tene ma Samaria maagoocagîra Ngai kîrîmarî gîkî, nwatî mue Ayahudi mugaga atî îtûûrarî rîa Jerusalemu nîkuo twagîrîrwe nî kûgoocera Ngai.”

²¹ Jesû nîwerire mûndûmûka ûcio atîrî, “Mûndûmûka ûyû mbîtîkia nîûndû kavinda nîgagûkinya karîa andû matagacoka kûgoocera Vava kîrîmarî gîkî wana kana îtûûrarî rîa Jerusalemu.

²² Mue Asamaria mûtiîcî nî ûrîkû mûgoocaga nwatî tue Ayahudi nîtwîcî nî ûrîkû tûgoocaga, nîûndû ûvonokio uumaga kwa Ayahudi.

²³ Nwatî kavinda nîgagûkinya karîa andû makaagoocaga Îthe wetû marî na Roho na ûma. Kavinda kau rîu nîgakinyu.

²⁴ Ngai nî Roho, na arîa mamûgoocaga mamûgoocage na Roho na ûûma.”

²⁵ Nake mûndûmûka ûcio nîwerire Jesû atîrî, “Nie nîmbîcî atî Mesaya nîagaaûka, na vîndî îrîa agaaûka agaatwîra maûndû monthe.”

²⁶ Jesû nîwamûcokerie atîrî, “Nie nîrakwarîria nînie ke.”

²⁷ Na kavinda wa kau arutwa a Jesû nîmaacokire na makîmaka mûno methîrîria Jesû akîaria na mûndûmûka. Nwatî gûtirî mûrutwa wana ûmwe waûririe Jesû atîrî, “Nîndûî ûrenda kuuma kûrî ke,” kana amûrie atîrî, “Ûraria nake nîkî?”

²⁸ Mûndûmûka ûcio nîwatiganîrie mûtûngi wake wa manjî agîcoka îtûûrarî na akîîra andû arîa maarî kuo atîrî,

²⁹ “Ûkani mûkoone mûndû wambîra maûndû monthe marîa naneka. Nwa kûvoteke ethîrwe ke nîke Mesaya?”

³⁰ Kwoguo andû nîmaaumire îtûûrarî rîu na makîthiî kûrî Jesû.

³¹ Na kamwerua andû acio makinye, arutwa nîmaathaithaga Jesû etîkîre kûrîa irio makîmwîraga atîrî, “Mwarimû! Wenda tu rîa irio.”

³² Nwatî Jesû nîwerire arutwa ake atîrî, “Nie nîrî na irio cia kûrîa irîa mue mûtaicî.”

³³ Kwoguo arutwa nîmaambîrîrie kûrania atîrî, “Nwa ethîrwe kûrî na mûndû ûmûreteere irio?”

³⁴ Jesû nîwamerire atîrî, “Irio ciakwa nî kûvingia wendi wa ûrîa wandûmire na kûrîkia wîra ûrî aamveere ndute.

³⁵ Mue mwîthagîrwa na nthimo yugaga atîrî, ‘Îvinda rîa gûketha rîtigarîtie mîeri îna tu.’ Nwatî nie nîramwîra atîrî, vingûrani metho menyu na mûrorie mîgûnda mwone atî maciaro ma kîmera gîkî nî makûrû!

³⁶ Mûkethi wa maciaro mau nîararîvwa mûcara wake na araketha maciaro nîûndû wa mwoyo wa tene na tene. Kwoguo mûvandi na mûkethi nîmagaakena marî vamwe.

³⁷ Nîûndû nthimo îno yugaga atî, ‘Mûndû ûmwe nîke ûvandaga nake wîngî agaketha.’

³⁸ Nie namûtûma mûthiî mûgakethe maciaro kuuma mûgûndarî ûrîa mue mûtaarutîra wîra. Andû engî nîo maaûrutîre wîra, namue mûragunîka kuumana na wîra wao.”

³⁹ Nao Asamaria eengî a kuuma îtûûrarî rîu nîmeetîkirie Jesû nîûndû mûndûmûka ûcio nîwamarutîre ûira akîmeera atîrî, “Ke ambîrire maûndû monthe marîa nie naaneka.”

⁴⁰ Kwoguo vîndî îrîa Asamaria acio maathiîre kûrî Jesû nîmaamûthaithire etîkîre gwîkarania nao. Nake Jesû nîwekaranirie nao kuo mîthenya îîrî.

⁴¹ Nao andû engî eengî nîmeetîkirie nîûndû wa ciugo irîa Jesû aaririe.

⁴² Nao nîmeerire mûndûmûka ûcio atîrî, “Rîu tue nîtwetîkia, tî nîûndû atî nîûtûrutîre ûira, nwatî nîûndû tue ene nîtweîguîra na matû metû na twamenya atî Jesû nîke Mûvonokia wa andû onthe a nthî.”

Jesû nîwavonirie mûvîcî wa karani ûmwe wa thirikari

⁴³ Jesû arîkia gwîkara kûu mîthenya îîrî, nîwacokire rîngî Galili.

⁴⁴ Nîûndû ke mwene nîwaugîte atîrî, “Mûrathi ndavecagwa gîtîîo vûrûrirî wake.”

⁴⁵ Rîrîa Jesû aakinyire Galili, andû a kuo nîmaamûgwatire ûgeni. Andû acio maarî onu maûndû monthe marîa eekîte vîndî ya kîrugo Kîam pasaka îtûûrarî rîa Jerusalemu nîûndû wa nao maarî kuo.

⁴⁶ Jesû nîwathiîre rîngî îtûûrarî rîa Kana ya Galili kûrîa aagarûrîrîte manjî magatuîka ndivei. Nakuo îtûûrarî rîa Kaperinaumu kwarî na karani ûmwe wa thirikari warî na mûvîcî wake warwarîte.

⁴⁷ Rîrîa Karani ûcio eegwire atî Jesû aarî mumu Judea na akathiî Galili, nîwathiîre kûrî ke na akîmûthaitha etîkîre kûthiî îtûûrarî rîa Kaperinaumu nîguo akavonie mûvîcî ûrîa watigarîtie vanini mûno akue.

⁴⁸ Jesû nîwerire karani ûcio atîrî, “Gûtirî mûndû wana ûmwe gatagatîrî kenyu ûgeetîkia atonete ciama na morirû.”

⁴⁹ Nake Karani ûcio nîwamwîrire atîrî, “Mûthuuri ûyû tûthiî nawe wa rîu mûvîcîwa atanakua.”

⁵⁰ Jesû nîwerire Karani ûcio atîrî, “Înûka mûvîcîguo nîakûvona!” Nake karani ûcio nîwetîkirie ciugo cia Jesû na akîînûka.

⁵¹ Vîndî îrîa karani ûcio aarî rûgendorî enûkîte nîwatûngirwe nî ndungata ciake na ikîmwîra atîrî, “Mûvîcîguo nîwavona!”

⁵² Nake karani ûcio nîwaûririe ndungata icio ciake atîrî, “Mûvîcîwa ambîrîrie kwîgua waro kîndû ta thaa ciîgana?” Nacio nîciamûcokerie atîrî, “Mûvîcîguo aregwire waro îgoro kîndû ta thaa mûgwanja cia mûthenya.”

⁵³ Nake îthe wa mwana ûcio nîwaririkanire atî thaa wa icio nîrîo Jesû aamwîrîte atî, “Mûvîcîguo nîakûvona!” Kwoguo karani ûcio na andû onthe a mûciî wake nîmeetîkirie Jesû.

⁵⁴ Gîkî nîkîo Kîamrî Kîamma gîa kaîrî kîrîa Jesû aaringire arî Galili arîkia kuuma Judea.