Johana 3 - ÎVUKU RÎA ÛVORO MWARO

Jesû na Nikodemu

¹ Vîndî îmwe kwarî na mûndû wetagwa Nikodemu warî mûtongoria wa Ayahudi na aarî wa Kîama Kîam Afarisai.

² Ûtukû ûmwe Nikodemu nîwathiîre kûrî Jesû na akîmwîra atîrî, “Rabii, tue nîtwîcî atî we wî mwarimû ûtûmîtwe nî Ngai. Gûtirî mûndû wana ûmwe ûngîvota kûringa ciama ta icio ûringaga Ngai atarî vamwe nake.”

³ Jesû nîwamûcokerie atîrî, “Nîramwîra na ma atî: gûtirî mûndû ûngîona Ûthamaki wa Ngai atambîte gûciarwa rîngî.”

⁴ Nikodemu nîwaûririe Jesû atîrî, “Mûndû mûgima angîvota gûciarwa rîngî atîa? Nwa atonye îvurî rîa ng'ina nîguo aciarwe rîngî.”

⁵ Nake Jesû nîwamûcokerie atîrî, “Nîrakwîra na ma atî gûtirî mûndû ûngîtonya Ûthamakirî wa Ngai atambîte gûciarwa rîngî na manjî na Roho Mûtheru.

⁶ Kîrîa kîonthe gîciarîtwe nî mwîrî nî mwîrî, na kîrîa kîonthe gîciarîtwe nî roho nî Roho.

⁷ Tiga kûmaka nîûndû nînakwîra atî nwa nginya ûciarwe rîngî.

⁸ Rûkûngi rûvurutanaga rûthiîte wa kûrîa rûkwenda na mûndû nîwîgucaga mûrurumo waruo, nwatî ndamenyaga na kûrîa rumîte kana na kûrîa rûthiîte. Ûguo nwa ta guo gwîkîkaga kûrî mûndû wa wonthe ûciarîtwe nî Roho Mûtheru.”

⁹ Nake Nikodemu nîwamûririe atîrî, “Ûndû ûyû ûngîvoteka atîa?”

¹⁰ Jesû nîwamûcokerie atîrî, “Kûngîvoteka atîa gûtuîke atî we ndwîcî ûndû ûyû na wî mwarimû wî ngumo nene vûrûrirî wa Isiraeli?

¹¹ Nîrakwîra na ma atî: tue twaragia maûndû marîa twicî na tûkavecana ndeto ciîgiî maûndû marîa twonete, nwatî mue mûtirenda gwîtîkia ûira wetû.

¹² Angîthîrwa ndûrambîtîkia ngîkwîra maûndû ma gûkû nthî, ûngîmbîtîkia atîa ngîkwîra maûndû ma îgûrû?

¹³ Gûtirî mûndû wanathiî îgûrû tiga Mûrû wa Mûndû ûrîa wanyûrûrûkire kuuma îgûrû.

¹⁴ “Wata ûrîa Musa aaûkîrîrie njoka ya gîcango arî werûrî ûguo nwa ta guo Mûrû wa Mûndû wa nake agaaûkîrîrua

¹⁵ nîguo mûndû wa wonthe ûmwîtîkîtie agîe na mwoyo wa tene na tene.

¹⁶ Nîûndû Ngai nîwendire andû a gûkû nthî mûno nîwavecanire Mûriû wake wa mûmwe nîguo mûndû wa wonthe ûmwîtîkîtie ndagaakue nwatî agîe na mwoyo wa tene na tene.

¹⁷ Ngai ndaatûma Mûriû gûkû nthî nîguo atuîre andû, nwatî aamûtûmire gûkû nthî nîguo atuîke mûvonokia wa andû.

¹⁸ “Andû arîa metîkîtie Mûriû matitucagîrwa, nwatî arîa matamwîtîkîtie nîmarîkîtie gûtuîrwa nîûndû matiîtîkitie Mûriû wa mûmwe wa Ngai.

¹⁹ Andû matucagîrwa na njîra îno: ûtheri nîûrîkîtie gûka nthî, nwatî andû nîmendete nduma gûkîra ûrîa mendete ûtheri nîûndû ciîko ciao nî njûku.

²⁰ Mûndû wa wonthe wîkaga ciîko cia waganu nîathûrîte ûtheri na ndarî vingo angîumîra ûtherirî, nîûndû ndangîenda ciîko ciake cia waganu cionekane.

²¹ Nwatî mûndû wa wonthe wîkaga ciîko cia ma nîwîyumagîria ûtherirî, nîguo ciîko irîa eekaga cionanagie atî nîwathîkagîra Ngai.”

Jesû na Johana Mûvatithania

²² Vuva wa ûguo Jesû na arutwa ake nîmaathiîre gîcunjîrî Kîam Judea na agîkarania nao kuo akîvatithanagia.

²³ Johana wa nake nîwavatithanagia arî Aenoni vakuvî na Salimu, nîûndû kûu kwarî na manjî meengî. Na andû nîmaathiîcaga kûrî Johana nake akamavatithia.

²⁴ (Ûndû ûyû wekîkire mbere ya Johana aikua njeera.)

²⁵ Arutwa amwe a Johana nîmaambîrîrie gûkararania na Mûyahudi ûmwe îgûrû rîgiî ûvoro wa kwîtheria.

²⁶ Kwoguo nîmaathiîre kûrî Johana na makîmwîra atîrî, “Mwarimû, nîûraririkana mûndû ûrîa mûrarî nake mûringo wa Rûnjî rwa Jorodani mwena wa îrathîro, na ûrîa waragia ûvoro ûmwîgiî? Rîu nîaravatithania na andû onthe nîmarathiî kûrî ke!”

²⁷ Nake Johana nîwamacokerie atîrî, “Gûtirî mûndû ûngîgîa na kîndû Ngai atamûvete kîo.

²⁸ Mue mûrî aira akwa atî nînaugire atîrî, ‘Nie tî nie Mesaya nwatî ndûmîtwe mbûke mbere yake.’

²⁹ Mûvikania nîke wîthagîrwa arî ke mwene mûviki, nwatî rîrîa mûrûngamîrîri wa ûviki arûngamîte vakuvî na mûvikania na akamûthikîrîria, nî ecûragwa nî gîkeno egua mûvikania akîaria. Na rîu gîkeno gîakwa nîgîcûru.

³⁰ Ke nwa nginya aneneve nanie nwa nginya nyive.”

Ûrîa ûkaga aumîte îgûrû

³¹ Ûrîa ûkaga aumîte îgûrû nî mûnene gûkîra arîa engî onthe. Ke ûrîa umîte gûkû nthî nî wa gûkû nthî na aaragia ûvoro wîgiî maûndû ma gûkû nthî. Nwatî ûrîa ûkaga aumîte îgûrû nî mûnene gûkîra arîa engî onthe.

³² Arutaga ûira wîgiî maûndû marîa onete na eguîte, nwatî gûtirî mûndû wîtîkagîra ûira wake.

³³ Nwatî mûndû wa wonthe wîtîkagîra ûira wake, nîatuîkaga mûira atî Ngai nî wa ma.

³⁴ Ûrîa ûtûmîtwe nî Ngai aragia ciugo cia Ngai nîûndû Ngai nîavecaga mûndû Roho atakûthimîrîra.

³⁵ Îthe nîwendete Mûriû wake na nîatûmîte agîe na wathani îgûrû rîa maûndû monthe.

³⁶ Mûndû wa wonthe wîtîkîtie Mûriû arî na mwoyo wa tene na tene; na mûndû wa wonthe ûregete kûmwîtîkia ndakaagîa na mwoyo, nwatî agatûûra averithagua nî Ngai.