Johana 21 - ÎVUKU RÎA ÛVORO MWARO

Jesû nîwaumîrîre arutwa mûgwanja

¹ Vuva wa ûguo Jesû nîwacokire akiumîrîra arutwa ake rîngî îriarî rîa Tiberia. Nake aamaumîrîre na njîra îno:

² Simoni Petero, Toma (Ûrîa wetagwa Mathatha), Nathanieli (ûrîa warî wa kuuma Kana ya Galili), na ariû a Zebedii na arutwa engî aîrî a Jesû maarî vamwe.

³ Simoni Petero nîwerire acio engî atîrî, “Nie nthiîte gûtega nthamaki.” Nao nîmaamwîrire atîrî, “Wa natue nîtûkûthiî nawe.” Kwoguo nîmaaumagarire na magîtwa îtarûrî makîthiî, nwatî ûtukû wonthe matianyita wanarî kîndû.

⁴ Rîrîa riûa rîarathaga, Jesû nîwarûngamire rûtererî rwa îria, nwatî arutwa matiamenyaga atî nî Jesû.

⁵ Nake Jesû nîwacokire akîmaûria atîrî, “Anake aya, mûrîanyitu nthamaki wanarî îmwe?” Nao nîmaamûcokerie atîrî, “Naarî.”

⁶ Nake Jesû nîwamerire atîrî, “Ikiani neti cienyu mwena wa ûrîo wa îtarû na nîmûkûnyitia nthamaki.” Kwoguo nîmaaikirie neti îriarî na makîremwa nî kûmîguucia nîûndû wa ûrîa maanyitîtie nthamaki nyîngî.

⁷ Nake mûrutwa ûrîa Jesû eendeete nîwerire Petero atîrî, “Nî Mwathani!” Na rîrîa Petero eegwire atî nî Mwathani, nîwekîrire kanjû yake (nîûndû aarî mûmîrutu) na akîrûga manjîrî.

⁸ Nao arutwa acio engî nîmaathiîre rûtererî rwa îria marî îtarûrî magucîtie neti îcûrîte nthamaki. Na vau maarî vatiarî varaca mûno kuuma nthî nyûmû, vaarî kîndû ta mita îgana rîmwe.

⁹ Rîrîa maaumîrire, nîmoonire mwaki wa makara na nthamaki cigîrîrîtwe îgûrû na makîona mîgate.

¹⁰ Nake Jesû nîwamerire atîrî, “Indeni nthamaki imwe cia irîa mwanyitia.”

¹¹ Nake Simoni Petero nîwatwîre îtarûrî na akiumîria neti amîgucîtie îcûrîte nthamaki nene. Nacio ciarî nthamaki îgana rîmwe rîa mîrongo îtano na ithatû. Nwatî wana ethîrwa nthamaki ciarî nyîngî ûguo, neti ndîatuîka.

¹² Jesû nîwamerire atîrî, “Ûkani mûtue mwathi.” Na gûtirî mûrutwa waûmîrîrie kûmûria, “We wî û?” nîûndû nîmaaicî nî Mwathani.

¹³ Kwoguo Jesû nîwaumîre vau mbere yao, agîoca mûgate na akîmanengera. Nîwacokire agîoca nthamaki na akîmanengera.

¹⁴ Rîîrî nîrîo rîarî riita rîa kathatû rîa Jesû kuumîrîra arutwa ake arîkia kûriûka kuuma kûrî akuû.

Jesû nîwaririe na Petero

¹⁵ Marîkia gûtua mwathi Jesû nîwaûririe Simoni Petero atîrî, “Simoni Mûrû wa Johana nîûmendete gûkîra aya engî?” Nake Simoni nîwamûcokerie atîrî, “Îî Mwathani, we nîwîcî atî nîngwendete.” Nake Jesû nîwamwîrire atîrî, “Rîthagia ng'ondu ciakwa.”

¹⁶ Jesû nîwacokire akîmûria riita rîa kaîrî atîrî, “Simoni mûrû wa Johana, nîûmendete?” Nake Simoni nîwamûcokerie atîrî, “Îî Mwathani, we nîwîcî atî nîngwendete.” Nake Jesû nîwamwîrire atîrî, “Rîthagia ng'ondu ciakwa.”

¹⁷ Jesû nîwacokire akîmûria riita rîa kathatû atîrî, “Simoni mûrû wa Johana, nîûmendete?” Nake Petero nîwatuurirwe nîûndû Jesû nîwamûririe riita rîa kathatû, “Nîûmendete?” Kwoguo nîwamwîrire atîrî, “Mwathani, we nîwîcî maûndû monthe; we nîwîcî atî nîngwendete!” Nake Jesû nîwamwîrire atîrî, “Rîthagia ng'ondu ciakwa.

¹⁸ Nîrakwîra na ma atî vîndî îrîa warî mwîthî wevaragîria na ûkathiî wa kûrîa kuonthe wendaga, nwatî vîndî îrîa ûgaakûra ûgaatambûrûkia njara ciaku nake mûndû wîngî akwove na akûvire kûrîa ûtarenda kûthiî.”

¹⁹ (Jesû akiuga ûguo eendaga kwonania ûrîa Petero agaakua na agoocithie Ngai.) Nake Jesû nîwacokire akîmwîra atîrî, “Nûmîrîra!”

Jesû nîwaririe ûvoro wîgiî mûrutwa ûrîa endeete

²⁰ Petero nîwavûgûkire na akîona mûrutwa ûcio wîngî ûrîa Jesû endeete amaumîte vuva na nwake wekarîte vakuvî mûno na Jesû vîndî ya irio cia mûthiia. Mûrutwa ûcio nwake waûrîtie Jesû atîrî, “Mwathani, nî ûrîkû ûgûgûcukanîrîra?”

²¹ Rîrîa Petero oonire mûrutwa ûcio nîwaûririe Jesû atîrî, “Mwathani, î nake mûndû ûyû, ûvoro wake nî atîa?”

²² Jesû nîwamûcokerie atîrî, “Wana ngenda ekare nginya rîrîa ngaaûka-î, îo nî thîna yaku? We ta nûmîrîra!”

²³ Kwoguo ndeto nîciatambire gatagatîrî ka arûmîrîri a Jesû atî mûrutwa ûyû ndagaakua. Nwatî Jesû ndaaugîte atî mûrutwa ûyû ndagaakua, aaugîte atîrî, “Wana ngenda ekare nginya rîrîa ngaaûka rî, îo nî thîna yaku?”

²⁴ Mûrutwa ûcio nîke waririe maûndû mama na akîmandîka na tue nîtwîcî atî ûvoro ûrîa aaririe nî wa ma.

Kûrîkia

²⁵ Kûrî maûndû mengî meengî Jesû eekire. Angîthîrwa maûndû mau monthe nîmaandîkirwe, nîreciria wana nthî yonthe ndîngîganîra mavuku marîa mangîandîkwa.