Johana 19 - ÎVUKU RÎA ÛVORO MWARO

¹ Pilato nîwacokire akîrivithia Jesû ivoko.

² Nao athigari nîmaatumire nthûmbî ya mîgua na makîmwîkîra yo kîongo. Nîmaacokire makîmwîkîra kanjû ya rangi ya njambarawe,

³ na makathiîcaga varîa arî na makamûringa na mvî makîmwîraga atîrî, “Wî mwaro Mûthamaki wa Ayahudi!”

⁴ Nake Pilato nîwaumire nja rîngî na akîra Ayahudi atîrî, “Tathikîrîriani, nie nauga aindwe ava nja nîguo mûmenye atî nie ndirona îvîtia rîrîa mûndû ûyû ekîte.”

⁵ Kwoguo Jesû nîwaumire nja ekîrîte nthûmbî ya mîgua na kanjû ya rangi wa njambarawe. Nake Pilato nîwamerire atîrî, “Taroriani! Mûndû nîke ûyû!”

⁶ Rîrîa anene a athînjîri-Ngai na arangîri a hekarû maamwonire, nîmaambîrîrie kugîrîria atîrî, “Mwambithie mûtharavarî! Mwambithie mûtharavarî!” Nake Pilato nîwamerire atîrî, “Mwoceni na mûthiî mûkamwambe mûtharavarî arî mue nîûndû nie ndirona îvîtia rîrîa mûndû ûyû ekîte.”

⁷ Nao Ayahudi nîmaamûcokerie atîrî, “Watho wetû ugaga atî ke aagîrîrwe nî kûûragwa nîûndû nîwîtuîte Mûriû wa Ngai.”

⁸ Rîrîa Pilato eegwire ûguo, nîwetigîre mûno makîria.

⁹ Nîwacokire agîtonya rîngî kûu nyomba na akîûria Jesû atîrî, “We wî wa kuuma kû?” Nwatî Jesû ndaamûcokeria.

¹⁰ Nake Pilato nîwacokire akîmûria atîrî, “Wana nginya ndûrenda kûmbarîria? Nîkwa ûtaicî atî nîrî na ûvoti wa gûkwovera wana wa gûkwambithia mûtharavarî?”

¹¹ Nake Jesû nîwamûcokerie atîrî, “We ndûrî na ûvoti wa kûmbîka wanarî ûndû ethîrwa ûvoti ûcio ndûvetwe guo nî Ngai. Kwoguo mûndû ûrîa ûmindire kûrî we arî na wîvia mûnene makîria.”

¹² Rîrîa Pilato eegwire ûguo, nîwageririe gûcaria ûrîa angîovora Jesû. Nwatî Ayahudi nîmaaugîrîrie atîrî, “Wona wovora mûndû ûyû, we ndûrî mûrata wa mûthamaki wa Roma. Mûndû wonthe wîtucaga mûthamaki ethagîrwa arî nthû ya mûthamaki wa Roma!”

¹³ Rîrîa Pilato eegwire ciugo icio, nîwarutire Jesû nja na akîmwîkarîria gîtîrî gîa gûtucanîra ciira kîrîa Kîamrî vandû vetagwa “Rwara rwa Îthiga.” (Na Kîhibirania vetagwa “Gabatha.”)

¹⁴ Vîndî îo kwarî ta thaa thita cia mûthenya wa kûvarîrîria pasaka. Pilato nîwerire Ayahudi atîrî, “Ûyû mûthamaki wenyu!”

¹⁵ Nao Ayahudi nîmaaugîrîrie atîrî, “Mûrage! Mûrage! Mwambithie mûtharavarî!” Pilato nîwamaûririe atîrî, “Nîkwa mûrenda nyambithie mûthamaki wenyu mûtharavarî?” Nao anene a athînjîri-Ngai nîmaamûcokerie atîrî, “Tue tûtirî mûthamaki wîngî tiga mûthamaki wa Roma!”

¹⁶ Kwoguo Pilato nîwanenganîre Jesû kûrî o nîguo mathiî makamwambe mûtharavarî. Kwoguo athigari nîmaanyitire Jesû.

Jesû nîwambirwe mûtharavarî

¹⁷ Nake nîwathiîre ekuuîrîte mûtharava nginya magîkinya nja ya îtûûra rîu vandû vetagwa “Vandû va Îvîndî rîa Kîongo.” (Na Kîhibirania vetagwa “Gologotha”.)

¹⁸ Vau nîvo maambire Jesû mûtharavarî. Nîmaacokire makîamba andû engî aîrî vakuvî na Jesû, ûmwe mwena wa ûrîo, na ûcio wîngî mwena wake wa ûmotho.

¹⁹ Pilato nîwandîkithirie kîmenyithia na akiuga gîcuurue mûtharavarî wa Jesû. Nakîo kîmenyithia kîu Kîamndîkîtwe atîrî, “Jesû wa Nazarethi, Mûthamaki wa Ayahudi.”

²⁰ Nao andû eengî nîmaathomire kîmenyithia kîu nîûndû varîa Jesû aambirwe vaarî vakuvî na îtûûra. Nakîo Kîamndîkîtwe na nthiomi mîthemba îthatû: rûthiomi rwa Kîhibirania, Kîlatini na Kîngiriki.

²¹ Nao anene a athînjîri-Ngai nîmeerire Pilato atîrî, “Ndûkandîke ‘Mûthamaki wa Ayahudi’ nwatî andîka, ‘Mûndû ûyû araugaga atî, Nie nînie Mûthamaki wa Ayahudi.’ ”

²² Pilato nîwamacokerie atîrî, “Ûguo nandîkithia nînandîkithia.”

²³ Nao athigari marîkia kwamba Jesû mûtharavarî, nîmaagaanirie nguo ciake icunjî inya, wa mûthigari gîcunjî gîake. Nîmaacokire magîoca kanjû yake îrîa yatumîtwe na gîtambaa gîtaarî na rûtumo wana rûmwe.

²⁴ Athigari acio nîmaambîrîrie kwîrana atîrî, “Vandû va kûmîatûrana tigani tûmîûthîre nîguo tûmenye nî ûrîkû ûkûthiî nayo.” Ûndû ûyû wekîkire nîguo Mandîko Matheru mavinge marîa maugîte atî: “Nîmaagaanirie nguo ciakwa, na makîûthîra kanjû yakwa.” Na ûguo nwaguo athigari meekire.

²⁵ Nao ng'ina wa Jesû, mwarwang'ina na ng'ina wa Jesû, Mariamu mûka wa Kileopa na Mariamu Mûmagidali, nîmaarûngamîte vakuvî na mûtharava wa Jesû.

²⁶ Rîrîa Jesû oonire ng'ina wa vamwe na mûrutwa ûrîa eendeete marûngamîte vakuvî nake, nîwerire ng'ina atîrî, “Mwongia, ûyû nîke mûvîcîguo.”

²⁷ Nîwacokire akîra mûrutwa ûcio atîrî, “Ûyû nîke nyûkwe.” Na kuuma vîndî îo mûrutwa ûcio nîwamwocire makîthiî gwîkara nake gwake mûciî.

Gûkua kwa Jesû

²⁸ Jesû nîwaicî atî vuva wa ûguo maûndû monthe maarî marîku. Na nîguo mandîko matheru mavinge nîwaugire atîrî, “Nie nîrî mûnyondu.”

²⁹ Navo vaarî na mbakûri yecûrîte ndivei îno ngagatu. Kwoguo nîmarindire civonji ndiveirî îo, makîmîmundîrîra rûthanjurî rwa mûtî wa Hisofu na makîmîvutithia mîromorî ya Jesû.

³⁰ Rîrîa Jesû aakundire ndivei îo nîwaugire atîrî, “Maûndû monthe nîmavinga!” Nîwacokire akîînamia kîongo gîake na agîkua.

Jesû nîwamundirwe na îtumû rûvarurî rwake

³¹ Vuva wa ûguo Ayahudi nîmaaûririe Pilato ametîkîrie maunange magûrû ma andû acio maambîtwe na vuvarî macurûrie mîîrî îo kuuma mîtharavarî. Maaûririe metîkîrue gwîka ûguo nîûndû mûthenya ûcio warî wa Jumaa, na thavatû îo yarî ya vata mûno. Matiendaga mîîrî îo îkare mîtharavarî mûthenya wa thavatû.

³² Kwoguo athigari nîmaathiîre na makiunanga magûrû ma mûndû wa mbere na ma ûcio wîngî wambîtwe marî na Jesû.

³³ Nwatî rîrîa maakinyire varî Jesû, nîmoonire atî aarî mûkuû, kwoguo matiamunanga magûrû.

³⁴ Nwatî mûthigari ûmwe nîwamundire rûvaru rwa Jesû na îtumû na vakiuma nthakame na manjî.

³⁵ (Mûndû ûrîa wonire ûndû ûyû ûgîkîka nîke ûravecana ûira, na ûrîa augîte nî ûira wa ma. Ke nîwicî aragia ûvoro wa ma, na aragia nîguo wa namue mwîtîkie.)

³⁶ Maûndû mama monthe meekîkire nîguo mandîko matheru mavinge marîa maugîte atî: “Gûtirî îvîndî rîake wana rîmwe rîkaaunangwa.”

³⁷ Na rîngî vandûrî vengî mandîko matheru nîmaugîte atî, “Andû nîmakaaroria mûndû ûrîa maamundire na îtumû.”

Kûthikwa kwa Jesû

³⁸ Vuva wa ûguo, Josefu ûrîa warî wa kuuma îtûûra rîa Arimathea nîwaûririe Pilato amwîtîkîrie akuue mwîrî wa Jesû. (Josefu aarî mûrûmîrîri wa Jesû, nwatî aamûrûmagîrîra na nthitho, nîûndû nîwetigagîra Ayahudi.) Pilato nîwamwîtîkîrie, na kwoguo Josefu nîwathiîre na agîûkuua.

³⁹ Nake Nikodemu ûrîa vau mbererî wathiîte kûrî Jesû ûtukû, nîwathiîre marî na Josefu akuuîte kilo ta mîrongo îthatû cia maguta maanungaga waro na ndawa cia mûtî wa mare.

⁴⁰ Nao andû acio aîrî nîmaakuuire mwîrî wa Jesû, makîwovania na cuka ya gatani na makîûminjîria ndawa kûringana na mûtugo wa kûthikana wa Ayahudi.

⁴¹ Nakuo mûgûndarî ûrîa warî vakuvî na varîa Jesû aambirwe, kwarî na mbîrîra îteethîrîtwe yanathikwa mûndû wana ûmwe.

⁴² Nao nîmaaigire mwîrî wa Jesû mbîrîrarî îo nîûndû warî mûthenya wa Ayahudi wa kwîvarîria thavatû, na rîngî nîûndû mbîrîra îo yarî vakuvî.