Johana 18 - ÎVUKU RÎA ÛVORO MWARO

Jesû nîwanyitirwe

¹ Rîrîa Jesû aarîkirie kûvoya, nîwaumire kûu maarî na arutwa ake na makîthiî mûringo ûcio wîngî wa karûnjî ga Kidironi. Navo vau vaarî na mûgûnda na Jesû na arutwa ake nîmaatonyire kuo.

² Judasi ûrîa wacukanîrîre Jesû nîwaicî varîa mûgûnda ûcio warî, nîûndû Jesû nîwamenyerete gûtûnganaga na arutwa ake kuo.

³ Kwoguo Judasi nîwathiîre mûgûndarî ûcio arî na gîkundi Kîam athigari a Roma wa vamwe na arangîri a hekarû matûmîtwe nî anene a athînjîri-Ngai wa vamwe na Afarisai. Maathiîre kuo makuuîte indo cia mbaara, taa na imûrî.

⁴ Jesû nîwaicî maûndû monthe marîa meendaga kûmwîka. Kwoguo nîwaumîrire vau mbere yao na akîmaûria atîrî, “Nû mûracaria?”

⁵ Nao nîmaamûcokerie atîrî, “Nî Jesû wa Nazarethi.” Nake Jesû nîwamerire atîrî, “Nînie ke.” Nake Judasi ûrîa wamûcukanîrîre aarûngamîte vau marî na andû acio.

⁶ Rîrîa Jesû aameerire atî, “Nînie ke,” nîmaacokire na vuva na makîgwa nthî.

⁷ Nake Jesû nîwacokire akîmaûria rîngî atîrî, “Nû mûracaria?” Nao nîmaamûcokerie atîrî, “Nî Jesû wa Nazarethi.”

⁸ Nake Jesû nîwamerire atîrî, “Nie nînamwîra atî nînie ke. Kwoguo angîthîrwa nînie mûracaria îtîkîriani aya engî mathiî.”

⁹ (Ke aaugire ûguo nîguo ciugo irîa aaugîte ivinge, atî: “Vava, nie ndirî mûteu mûndû wana ûmwe wa arîa we wamvere.”)

¹⁰ Nake Simoni Petero nîwacomorire rûviû rûrîa aarî naruo na akîrenga gûtû kwa mwena wa ûrîo kwa ngombo ya Mûthînjîri-Ngai mûnene. Ngombo îo yetagwa Maliku.

¹¹ Nake Jesû nîwerire Petero atîrî, “Cokia rûviû rwaku njûrarî. Nîkwa ûreciria atî ndikûnyuîra gîkomberî Kîam mathîna kîrîa Vava amvete?”

Jesû nîwavirirwe kûrî Anasi

¹² Kwoguo athigari a Roma marî vamwe na mûnene wao na atongoria a Ayahudi nîmaanyitire Jesû.

¹³ Nîmaamwovire na makîmûvira kûrî Anasi ûrîa warî mûthoniwe wa Kaiafa na warî Mûthînjîri-Ngai mûnene mwakarî ûcio.

¹⁴ Kaiafa nîke wataarîte Ayahudi atî nî kava mûndû ûmwe akuîre andû onthe.

Petero nîwakaanire Jesû

¹⁵ Simoni Petero marî na mûrutwa wîngî nîmaaumire Jesû vuva. Mûrutwa ûcio wîngî nîwecîkene mûno nî Mûthînjîri-Ngai mûnene. Kwoguo ke marî na Jesû nîmaatonyire vau nja ya nyomba ya Mûthînjîri-Ngai mûnene,

¹⁶ na Petero agîtigwa mwîrîgarî. Nake mûrutwa ûcio wîngî wecîkene mûno nî Mûthînjîri-Ngai mûnene nîwacokire akiuma nja, akîaria na mwîrîtu ûrîa warî mwîkaria wa mwîrîga na agîtonyia Petero kuo.

¹⁷ Nake mwîrîtu ûcio warî mwîkaria wa mwîrîga nîwaûririe Petero atîrî, “Na kinthî wa nawe ndûrî ûmwe wa arutwa a mûndû ûcio?” Petero nîwamûcokerie atîrî, “Naarî, nie ndirî ûmwe wa arutwa ake!”

¹⁸ Na nîûndû kwarî na mvevo, ndungata na arangîri maarî akiu mwaki wa makara na nîmaarûngamîte maûthiûrûrûkîrîtie makîwota. Kwoguo Petero nîwathiîre na akîrûngama vamwe nao nîguo ote mwaki.

Jesû nîwaûrirue ciûria nî Mûthînjîri-Ngai mûnene

¹⁹ Mûthînjîri-Ngai mûnene nîwaûririe Jesû ciûria ciîgiî arutwa ake wa vamwe na maûndû marîa ke aathomithanagia.

²⁰ Nake Jesû nîwamûcokerie atîrî, “Nie ndûûraga mbaragîria andû onthe cararûkû nîguo megue. Ndûûraga nthomithanagîria mavoerorî na hekarûrî kûrîa andû onthe macemanagia. Nie ndianaria ûndû wana ûmwe nthithorî.

²¹ Nîndûî kîratûma ûmbûrie ciûria? Ûria andû arîa maregucaga maûndû marîa nîrathomithanagia. O nîo maicî maûndû marîa nîraragia.”

²² Rîrîa Jesû aarîkirie kuga ûguo, mûrangîri ûmwe ûrîa warî vau nîwamûringire na rûvî na akîmûria atîrî, “Ûngîvota gûcokeria Mûthînjîri-Ngai mûnene ûguo atîa?”

²³ Nake Jesû nîwamûcokerie atîrî, “Ethîrwa nînaria ûndû mûcûku, îra andû aya marî ava ûndû ûcio nî ûrîkû. Nwatî ethîrwa naria ûvoro wa ma, nîndûî gîatûma ûninge?”

²⁴ Nake Anasi nîwacokire akîvecana Jesû arî mwove nîguo avirwe kûrî Kaiafa, Mûthînjîri-Ngai mûnene.

Petero nîwakaanire Jesû rîngî

²⁵ Rîrîa Petero aarûngamîte vau nja agîota mwaki, andû amwe arîa maarî vo nîmaamûririe atîrî, “Na kinthî wa nawe ndûrî ûmwe wa arutwa a mûndû ûûrîa?” Nwatî Petero nîwakaanire akiugaga atîrî, “Nie ndirî ûmwe wa arutwa ake.”

²⁶ Nayo ngombo îmwe ya Mûthînjîri-Ngai mûnene yarî vo. Ngombo îo yarî ûmwe wa andû a mûciî wa mûthigari ûrîa Petero aarengire gûtû. Ngombo îo nîyaûririe Petero atîrî, “Na kinthî ndikwonire mûrî nake mûgûndarî?”

²⁷ Na wa rîngî Petero nîwakaanire. Na vîndî wa îo ngûkû îkîgamba.

Jesû nîwavirirwe kûrî Pilato

²⁸ Kîraûko macangîa arangîri nîmaarutire Jesû mûciî gwa Kaiafa na makîmûvira mûciî mûnene wa Pilato. Nao Ayahudi matietîkîra gûtonya kuo nîûndû matiendaga kûnyitwa nî mûgiro mbere ya kûrîa kîrugo Kîam pasaka.

²⁹ Kwoguo Pilato nîwaumire nja varîa maarî na akîmaûria atîrî, “Mûrathitanga mûndû ûyû na maûndû marîkû?”

³⁰ Nao nîmaamûcokerie atîrî, “Kethîrwa mûndû ûyû ndarekîte naaî tûtingîakwindîra ke.”

³¹ Nake Pilato nîwamerire atîrî, “Kwoguo vi mwoceni mûkamûcirithie kûringana na watho wenyu.” Nao nîmaamûcokerie atîrî, “Tue tûtiîtîkîrîtue kûûraga mûndû.”

³² (Ûndû ûyû wekîkire nîguo maûndû mavinge marîa Jesû aarîtie megiî mûthemba wa gîkuû kîrîa agaakua.)

³³ Nake Pilato nîwacokire nyomba, agîîta Jesû na akîmûria atîrî, “We nîwe Mûthamaki wa Ayahudi?”

³⁴ Nake Jesû nîwamûcokerie atîrî, “We nîwe weciiria ûmbûrie kîûria kîu, kana nî andû engî makwîrîte ûvoro ûmbîgiî?”

³⁵ Pilato nîwamwîrire atîrî, “Nîkwa ûreciria nie nîrî Mûyahudi? Nî andû enyu na anene a athînjîri-Ngai makûnenganîre kûrî nie. We nîkwa wîkîte atîa?”

³⁶ Nake Jesû nîwaugire atîrî, “Ûthamaki wakwa tî ta wa andû a gûkû nthî. Nîûndû ûthamaki wakwa ûngîkariî ta wa andû a gûkû nthî, arûmîrîri akwa nîmangîrandûîrîra nîguo ndikanenganîrwe kûrî Ayahudi. Nwatî ûthamaki wakwa tî ta wa andû a gûkû nthî!”

³⁷ Pilato nîwamûririe atîrî, “Anga we ûrî mûthamaki?” Nake Jesû nîwamûcokerie atîrî, “We nîwe wauga atî nie nîrî mûthamaki. Nie naaciarirwe na ngîûka gûkû nthî nîûndû wa gîtûmi gîkî kîmwe, kwaria ûvoro wa ma. Na mûndû wa wonthe wîthagîrwa akîaria ûma nîambathîkagîra.”

³⁸ Nake Pilato nîwamûririe atîrî, “Ûvoro wa ma nî ûrîkû?” Nake Pilato aarîkia kuga ûguo nîwaumire nja wa rîngî na akîra Ayahudi atîrî, “Nie ndirona îvîtia rîrîa mûndû ûyû ekîte.

Jesû nîwatuîrîrwe kûûragwa

³⁹ Nwatî kûringana na mûtugo wenyu nî atî wa vîndî ya pasaka nîmwovoragîre mûndû ûmwe gatagatîrî ka arîa mavingîrîtwe njeera. Nîmûrenda nîmwovorere Mûthamaki wa Ayahudi?”

⁴⁰ Nao maugîrîrîtie nîmaamûcokerie atîrî, “Naarî ndûkamwovore! Tûrenda ûtwovorere Baraba!” (Nake Baraba aarî mûcunani.)