Johana 17 - ÎVUKU RÎA ÛVORO MWARO

Jesû nîwavoere arutwa ake

¹ Jesû arîkia kwaria maûndû mama, nîwaroririe îgûrû na akîvoya atîrî, “Vava îvinda nîrîkinyu. Goocithia Mûrûguo, nîguo nake Mûrûguo akûgoocithie.

² Nîûndû Nîwamûvere wathani wa kwatha andû onthe nîguo arîa onthe wamûveere amave mwoyo wa tene na tene.

³ Naguo mwoyo wa tene na tene nî atî andû onthe makûmenye we Ngai wa ma na mamenye Jesû Kristû ûrîa watûmire.

⁴ Nie nîrîmûkûgoocithiu gûkû nthî nîûndû nîrîmûrîkiu kûruta wîra ûrîa wamvere.

⁵ Vava! Nîrî mbere yaku mva riiri, riiri wata ûrîa naarî naguo mbere ya nthî kûmbwa.

⁶ “Nîndûmîte ûmenyekane nî andû a gûkû nthî arîa wamvere. O maarî aku, nawe nîwamûvere o na makîathîkîra ciugo ciaku.

⁷ Rîu nîmaicî atî maûndû monthe marîa wamvere maumîte kûrî we.

⁸ Nie nînaamakinyîrie ndûmîrîri îrîa wamvere, nao makîmîamûkîra. Nîmaicî na ma atî nie naumire kûrî we, na nîmetîkîtie atî we nîwe wandûmire.

⁹ “Acio nîo nîravoera. Ndiravoera andû a gûkû nthî nwatî nîravoera arîa wamvere nîûndû nî aku.

¹⁰ Andû onthe akwa nî aku, na onthe aku nî akwa. Naguo riiri wakwa nîwonanîtue na njîra yao.

¹¹ Na rîu nîkwa mbûkîte kûrî we. Nie rîu ndirî gûkû nthî rîngî, nwatî o marî gûkû nthî. Vava Mûtheru, mamenyagîrîre na vinya wa rîîtwa rîaku rîrîa wamvere, nîguo matuîke kîndû kîmwe wata ûrîa we nanie tûrî kîndû kîmwe.

¹² Rîrîa naarî vamwe nao, nînaamamenyererete na vinya wa rîîtwa rîaku rîrîa wamvere. Nînaamagitîre na gûtirî mûndû wana ûmwe gatagatîrî kao waûrire tiga ûrîa warî wa kûûra nîguo mandîko matheru mavingue.

¹³ Rîu nie nîkwa mbûkîte kûrî we. Nîraria maûndû mama nîrî gûkû nthî nîguo arûmîrîri akwa magîe na gîkeno gîcûru ta kîrîa nîrî nakîo.

¹⁴ Nînaamakinyîrie ndûmîrîri yaku na andû a gûkû nthî makîmamena nîûndû o tî a gûkû nthî wata ûrîa wa nanie ndarî wa gûkû nthî.

¹⁵ Nie tîkwa nîrakûria ûmarute gûkû nthî, nwatî nîrakûria ûmamenyerere kuumana na Ûrîa Mûcûku.

¹⁶ Wata ûrîa wa nanie ndarî wa gûkû nthî, wa nao tî a gûkû nthî.

¹⁷ Mamûre matuîke aku ûvororî wa ma. Ciugo ciaku nî cia ma.

¹⁸ Wa ta ûrîa wandûmire gûkû nthî, wa nanie nîguo namatûma.

¹⁹ Na nîûndû wao nie nînîyamûrîte ngûtungatîre nîguo wa nao meyamûre magûtungatîre na ma.

²⁰ “Tî acio onga tu nîravoera, nwatî nîravoera nginya arîa onthe makaambîtîkia nîûndû wa ndûmîrîri yao.

²¹ Nîravoya atî onthe matuîke kîndû kîmwe. Maroekara ndaarî yetû, wata ûrîa we ûrî ndaarî yakwa nanie nîrî ndaarî yaku. Marotuîka kîndû kîmwe nîguo andû a gûkû nthî metîkie atî we nîwe wandûmire.

²² Nie nîmavete riiri wata ûrîa we wamvere nîguo matuîke kîndû kîmwe wata ûrîa we nanie tûrî kîndû kîmwe.

²³ Nie ngethagîrwa nîrî ndaarî yao, nawe ûkethagîrwa ûrî ndaarî yakwa nîguo matuîke kîndû kîmwe viû. Nao andû a gûkû nthî magaacoka mamenye atî we nîwe wandûmire na atî we nîûmendete wata ûrîa ûmendete.

²⁴ “Vava! Nîrenda acio wamvere mekarage varîa nie nîrî, nîguo monage riiri wakwa ûrîa we wamvere, nîûndû we nîwamendire wana mbere ya nthî kûmbwa.

²⁵ Vava Mûthingu! Andû a gûkû nthî matigwîcî, nwatî nie nîngwîcî na nginya acio wamvere nîmaicî atî we nîwe wandûmire.

²⁶ Nie nînakûmenyithanirie kûrî o, na nwa ngûthiî na mbere gwîka wa guo nîguo ûmende wata ûrîa ûmendete, na nîguo wa nanie mbîthagîrwe nîrî ndaarî yao.”