Johana 15 - ÎVUKU RÎA ÛVORO MWARO

Jesû nîke Mûthavibu wa ma

¹ “Nie nînie Mûthavibu wa ma, nake Vava nîke mûrîmîri.

² Ke nîatemaga rûvûa wa ruonthe rwakwa rûrîa rûtaciaraga maciaro, na rûvûa wa ruonthe rûciaraga maciaro nîarûcaaga nîguo rûciare maciaro meengî.

³ Mue nîmûrîkîtie kûtherua nî ciugo icio namwîra.

⁴ Îkaragani ndaarî yakwa, nanie mbîkare ndaarî yenyu. Rûvûa rûgekara rûrî ruonga rûtingîgîa na maciaro; rûngîvota kûgîa na maciaro tu angîthîrwa nwa rwîkare mûthaviburî. Ûguo nwaguo wa namue mûtangîvota kûgîa na maciaro angîthîrwa tî mwîkara mûrî ndaarî yakwa.

⁵ “Nie nî nie Mûthavibu, namue nîmue mvûa. Mûndû wa wonthe wîkaraga ndaarî yakwa, nanie ngekara ndaarî yake, nîagîcaga maciaro meengî; nîûndû mûtarî vamwe na nie gûtirî ûndû mûngîvota gwîka.

⁶ Mûndû wa wonthe ûtekaraga ndaarî yakwa nîatecagwa wata ûrîa rûvûa rûtecagwa rûgacoka rûkaûma. Mvûa ta icio nîciocanagua na igaikua mwakirî na ikavîa.

⁷ Ethîrwa mûgekaraga ndaarî yakwa na ciugo ciakwa igekara ndaarî yenyu, ngaamûvecaga kîndû wa kîonthe kîrîa mûkaambîtagia.

⁸ Mwagîa na maciaro meengî, mûkonekanaga mûrî arutwa akwa, na ûndû ûyû ûkaagoocithagia Vava.

⁹ Nie nîmwendete wata ûrîa Vava amendete; îkaragani wendorî wakwa.

¹⁰ Mwathîkîra maathani makwa mûgekaraga mûrî wendorî wakwa, wata ûrîa mbathîkîrîte maathani ma Vava na ngekara nîrî wendorî wake.

¹¹ “Nie namwîra maûndû mama nîguo mûgîe na gîkeno ta kîrîa nîrî nakîo na mûgîe na gîkeno gîcûru.

¹² Narîo rîathani rîakwa nî rîîrî: Endanagani wa ta ûrîa nîmwendete.

¹³ Wendo ûrîa mûnene mûndû angîonania nî kûruta mwoyo wake nîûndû wa arata ake.

¹⁴ Mwona mweka maûndû marîa nîmwathaga, nîmûgûtuîka arata akwa.

¹⁵ Nie ndigûcoka kûmwîta ndungata rîngî, nîûndû ndungata ndîthagîrwa îkîmenya ûrîa mûmîathi areka. Vandû va ûguo nînîmwîta arata, nîûndû nînîmûmenyithîtie maûndû monthe marîa mbîguîte kuuma kûrî Vava.

¹⁶ Mue tî mue mwanthuurire, nînie namûthuurire na ngîmûva wîra wa kûthiî kûgîa na maciaro meengî marîa magwîkara kavinda karaca. Kwoguo Vava akaamûvecaga kîndû wa kîonthe kîrîa mûkaamwîtagia na rîîtwa rîakwa.

¹⁷ Narîo rîathani rîakwa nî rîîrî: Endanagani.

Rûmena rwa andû a gûkû nthî

¹⁸ “Ethîrwa andû a gûkû nthî nîmamûmenete, ririkanani atî nie nînie maambire kûmena wana mbere ya mamûmena.

¹⁹ Mûngîrî a gûkû nthî, andû nwa mamwendete. Nwatî namûthuurire kuuma kûrî andû a gûkû nthî na kwoguo mue mûtirî a gûkû nthî. Kîu nîkîo gîtûmaga andû a gûkû nthî mamûmene.

²⁰ Taririkanani ûrîa namwîrire atî: ‘Gûtirî ngombo nene gûkîra mûmîathi.’ Angîthîrwa andû nîmaanyaririre, wa namue nîmakaamûnyarira. Ethîrwa nîmaathîkîre ciugo ciakwa, wana nginya cienyu nîmagaaciathîkîra.

²¹ Nwatî nîmakaamwîka maûndû mama monthe nîûndû wakwa na nîûndû matiîcî ûrîa wandûmire.

²² Angîthîrwa ndiamava ndûmîrîri yakwa, matingîatuirwe evia. Nwatî rîu matirî na kîîgwatio atî matirî na mevia.

²³ Mûndû wa wonthe ûmenete nîamenete wana nginya Vava.

²⁴ Ndangîekire maûndû marîa mataneekwa nî mûndû wîngî gatagatîrî kao, matingîatuirwe evia. Nwatî rîu nîmonete maûndû marîa nekire na nîmamenete na makamena Vava.

²⁵ Naguo ûndû ûyû wekîkire nîguo ciugo ivinge irîa ciandîkîtwe wathorî wao atî: ‘Maamenire gûtarî na gîtûmi.’

²⁶ “Nie nîngaamûtûmîra Mûtethia kuuma kûrî Vava. Ke nîke Roho wa ma ûrîa uumaga kûrî Vava na nîke ûkaaruta ûira wakwa.

²⁷ Wa namue nîmûkaaruta ûira ûmbîgiî nîûndû mwîthîrîtwe mûrî vamwe nanie kuuma wa Kîammbîrîria.