Johana 14 - ÎVUKU RÎA ÛVORO MWARO

Jesû nîke njîra ya kûthiî kûrî Îthe

¹ Jesû nîwamerire atîrî, “Tigani gûtangîka ngororî cienyu. Îtîkiani Ngai na wa nanie mûmbîtîkie.

² Mûciî kwa Vava kûrî na ciîkaro nyîngî, na nîngûthiî kûmûvarîrîria vandû. Nie ndingîamwîra ûguo angîthîrwa ûguo tîguo kûrî.

³ Na narîkia kûthiî kûmûvarîrîria vandû, nîngûcoka nîmwîcîre nîguo mue mwîthagîrwe mûrî varîa nie nîrî.

⁴ Mue nîmwîcî njîra îrîa yerekagîria mûndû kûrîa nîrathiî.”

⁵ Nake Toma nîwaûririe Jesû atîrî, “Mwathani, tûngîvota atîa kûmenya njîra îrîa yerekagîria mûndû kûrîa we ûrathiî, na tue wana tûtiîcî kûrîa ûrathiî?”

⁶ Nake Jesû nîwamûcokerie atîrî, “Nie nînie njîra, nînie ûvoro wa ma, na nînie mwoyo. Gûtirî mûndû ûthiîcaga kûrî Vava atavîtûkîrîrîte kûrî nie.”

⁷ Nake Jesû nîwerire arutwa ake atîrî, “Angîthîrwa na ma nîmûmbîcî, nîmûngîramenya wana nginya Vava. Nwatî kuuma rîu nîmwamûmenya na nîmwamwona.”

⁸ Nake Filipu nîwerire Jesû atîrî, “Mwathani, twonie Vava, na nîtûkwîgua tweganîra.”

⁹ Jesû nîwamûcokerie atîrî, “Filipu, ndûûranîtie namue muonthe kavinda karaca ûguo na atî we ndûrî mûûmenyu? Mûndû wa wonthe ûmonete, nîmwonu Vava. Nîndûî kîratûma ûmbîre, ‘Twonie Vava?’

¹⁰ Filipu, ndûretîkia atî nie nîrî ndaarî ya Vava na Vava arî ndaarî yakwa? Nie, tînie nîîrîte ciugo irîa namwîra. Vava ûrîa wîkaraga ndaarî yakwa nîke wîkaga maûndû mama.

¹¹ Namwîra atî nie nîrî ndaarî ya Vava na Vava arî ndaarî yakwa, mbîtîkiani. Ethîrwa tîmwîtîkia nîûndû wa ûguo, îtîkiani nîûndû wa maûndû marîa mbîkîte.

¹² Nie nîramwîra na ma atî: mûndû wa wonthe ûmbîtîkagia ageekaga maûndû ta marîa mbîkaga, na ageekaga maûndû wana manene gûkîra mama nîûndû nînîrathiî kûrî Vava.

¹³ Ûndû wa wonthe ûrîa mûkavoyaga na rîîtwa rîakwa ngawîkaga, nîguo Vava akumague na njîra ya Mûriû.

¹⁴ Mûngîkaavoya ûndû wana ûrîkû na rîîtwa rîakwa, ngaamûvingagîria.

Kwîrîrwa Roho Mûtheru

¹⁵ “Ethîrwa nîmûmendete, mûkaathîkagîra maathani makwa.

¹⁶ Nie nîngûvoya Vava, nake nîakûmûva Mûtethia wîngî nîguo atûûranagie namue tene na tene.

¹⁷ Ke nîke Roho ûrîa wonagia andû ûvoro wa ma. Andû a gûkû nthî matingîmwamûkîra, nîûndû matimwonaga wana kana mamûmenye. Nwatî mue nîmûmwîcî nîûndû atûûranagia namue na arî ndaarî yenyu.

¹⁸ “Nie ndikûmûtiga ta ciana cia ndigwa; ngaamûcokerera.

¹⁹ Vuva wa kavinda kanini andû a nthî tî macoka kûmona rîngî, nwatî mue mûkaamona; na nîûndû nîndûûraga mwoyo, wa namue nîmûgaatûûra mwoyo.

²⁰ Na rîrîa mûthenya ûcio ûgaaûka, nîmûkaamenya atî nie nîrî ndaarî ya Vava na atî mue mûrî ndaarî yakwa, wata ûrîa nie nîrî ndaarî yenyu.

²¹ “Mûndû wa wonthe wamûkagîra maathani makwa na akamathîkîra nîke ûmendete. Vava akendaga mûndû ûrîa ûmendete, wa nanie ngaamwendaga na ngeyonithanagia kûrî ke.”

²² Nake Judasi (nwatî tî Judasi Mûsikariota) nîwaûririe Jesû atîrî, “Mwathani, kûngîvoteka atîa ûkeyonithanagia kûrî tue na tî kûrî andû a gûkû nthî?”

²³ Nake Jesû nîwamûcokerie atîrî, “Mûndû wa wonthe ûmendete nîwathîkagîra ciugo ciakwa. Vava nîamwendete, na nie tûrî na Vava nîtûkaga kûrî ke na tûgatûûrania nake.

²⁴ Mûndû wa wonthe ûtamendete ndathîkagîra ciugo ciakwa. Na ciugo irîa mwegua tî ciakwa, nwatî ciumîte kûrî Vava ûrîa wandûmire.

²⁵ “Nie namwîra maûndû mama nîrî wa vamwe namue.

²⁶ Nwatî Mûtethia, na nîke Roho Mûtheru, ûrîa Vava agaatûma na rîîtwa rîakwa, nîakaamûthomithia maûndû monthe na amûvotithie kûririkana ûrîa wonthe namwîra.

²⁷ “Thayû nîguo nie nîramûtigîra; nî thayû wakwa nîramûva. Nie ndiramûva thayû wîkariî ta ûrîa ûvecanagwa nî nthî. Tigani gûtangîka ngororî cienyu kana mûgîe na guoya.

²⁸ Mue nîmwîguîte ngîmwîra atî, ‘Nînîrathiî, nwatî ngaamûcokerera.’ Ethîrwa na ma nîmûmendete, nîmûngîrakena nîûndû nîrathiî kûrî Vava, nîûndû ke nî mûnene kûngîra.

²⁹ Nie namwîra maûndû mama rîu mbere ya mekîke, nîguo rîrîa mageekîka mûgeetîkia.

³⁰ Ndikwaria namue mûno rîngî îvinda îraca, nîûndû mûnene wa gûkû nthî nîaûkîte. Ke ndangîvota kûmbatha,

³¹ nwatî nîmbîkaga maûndû monthe marîa Vava ambathaga mbîke, nîguo andû a gûkû nthî mamenye atî nîmendete Vava. “Ûkîrani rîu tûthiî tuume ava.