Johana 13 - ÎVUKU RÎA ÛVORO MWARO

Jesû nîwathambirie arutwa ake magûrû

¹ Gwatigarîtie mûthenya ûmwe kîrugo Kîam pasaka Kîammbîrîrie. Jesû nîwaicî atî îvinda rîake rîa kuuma gûkû nthî athiî kûrî îthe rîarî rîkinyu. Ke aarî mwendu andû ake arîa maarî gûkû nthî, na aamendire nginya mûthiia.

² Rîrîa Jesû na arutwa ake maarî metharî makîrîa irio cia kîvwaî, Ngoma aarî mwîkîru meciria ma gûcukanîrîra Jesû ngororî ya Judasi mûvîcî wa Simoni Mûsikariota.

³ Nake Jesû nîwaicî atî Îthe aarî mûmûveu vinya wa gwîka maûndû monthe. Nîwaicî atî ke aaumîte kûrî Ngai na aacokete kûrî Ngai.

⁴ Kwoguo rîrîa maarî metharî makîrîa Jesû nîwaûkîrire, akîruta nguo yake îrîa eekagîra îgûrû na akîîyova taurû kîûnûrî.

⁵ Nîwacokire agîkîra manjî kîraîrî na akîambîrîria kûthambia arutwa ake magûrû akîmagiragia na taurû îo eeyovete kîûnûrî.

⁶ Nake Simoni Petero akinyîrîrwa nîwaûririe Jesû atîrî, “Mwathani, ûrenda kûnthambia magûrû?”

⁷ Nake Jesû nîwamûcokerie atîrî, “We rîu ndûramenya ûrîa nîreka, nwatî vuvarî ûgaataûkîrwa.”

⁸ Nake Petero nîwaugire atîrî, “We ndûngînthambia magûrû!” Nake Jesû nîwamûcokerie atîrî, “Ethîrwa tîngûthambia magûrû, ndûgûcoka gûtuîka mûrutwa wakwa.”

⁹ Nake Petero nîwamwîrire atîrî, “Mwathani, ndûkanthambie magûrû monga, nthambia wana njara na kîongo!”

¹⁰ Nake Jesû nîwamwîrire atîrî, “Mûndû ethambîtie mwîrî ethagîrwa arî mûtheru na ndavataraga kwîthambia rîngî warîo, nwanga tu ethambirie magûrû make. Mue mûrî atheru, nwatî ûmwe gatagatîrî kenyu tî mûtheru.”

¹¹ (Jesû nîwaicî ûrîa wendaga kûmûcukanîrîra. Na kîu nîkîo gîatûmire auge atî, “Mûrî atheru, nwatî ûmwe gatagatîrî kenyu tî mûtheru.”)

¹² Jesû aarîkia kûmathambia magûrû, nîwacokirie nguo yake mwîrî îrîa eekagîra îgûrû na agîcoka varîa eekarîte metharî. Nake nîwamaûririe atîrî, “Nîmwataûkîrwa nî ûrîa namwîka?

¹³ Mûmbîtaga Mwarimû na mûkambîta Mwathani. Rîrîa mûgwîka ûguo mwîthagîrwa mûkîaria ûvoro wa ma nîûndû nie nînie ke.

¹⁴ Angîthîrwa nie Mwathani na Mwarimû wenyu nînamûthambia magûrû wa namue nwa nginya mûthambanagie magûrû.

¹⁵ Nie namûva kîonereria nîguo mwîkage wata ûrîa namwîka.

¹⁶ Nîramwîra na ma atî gûtirî ngombo nene gûkîra mûmîathi, wana gûtirî mûnjaama mûnene gûkîra mûmûtûmi.

¹⁷ Rîu nîûndû nîmwamenya maûndû mama, mûkaarathimagwa ethîrwa mûkaamekaga!

¹⁸ “Nie ndiraria ûvoro ûmwîgiî muonthe. Nîmbîcî nî andû arîkû nthuurîte. Nwatî nwa nginya mandîko matheru mavinge marîa maugîte atî, ‘Mûndû ûrîa twarîcanîre mûgate nake nîke wacokire kûngarûrûka.’

¹⁹ Namwîra ûvoro ûyû mbere ya wîkîke nîguo rîrîa ûgeekîka, mûgeetîkia atî ‘Nie nînie ke.’

²⁰ Nie nîramwîra ûvoro wa ma atî, mûndû wa wonthe wamûkagîra mûndû ûrîa ndûmîte wa nanie nîanyamûkagîra. Nake mûndû wa wonthe ûnyamûkagîra nîwamûkagîra ûrîa wandûmire.”

Jesû nîwaugire atî nîagûcukanîrîrwa

²¹ Nake Jesû aarîkia kuga maûndû mau, nîwathînîkire mûno ngororî yake na akiuga cararûkû atîrî, “Nie nîramwîra na ma atî mûndû ûmwe gatagatîrî kenyu nîakûnjukanîrîra.”

²² Nao arutwa nîmaaroranirie mamakîte mûno nîûndû nîmaarigirwe Jesû eeciragîria mûndû ûrîkû.

²³ Nake mûrutwa ûmwe ûrîa Jesû eendeete nîwekarîte vakuvî na Jesû.

²⁴ Kwoguo Simoni Petero nîwavenerie mûrutwa ûcio na akîmwîra atîrî, “Ta mûrie araria ûvoro wa ûrîkû.”

²⁵ Nake mûrutwa ûcio nîwenamîrîre varî Jesû na akîmûria atîrî, “Mwathani nî ûrîkû ûgûgûcukanîrîra?”

²⁶ Nake Jesû nîwamûcokerie atîrî, “Mûndû ûrîa ngûnengera mûgate ûrîa ngûvokithia thuvurî nîke ûkûnjukanîrîra.” Kwoguo Jesû nîwocire kînuku Kîam mûgate, agîkîvokithia na akînengera Judasi mûriû wa Simoni Mûsikariota.

²⁷ Na vîndî wa îo Judasi aarîkia gwîcukia kînuku Kîam mûgate, nîwatonyirwe nî Caitani. Nake Jesû nîwerire Judasi atîrî, “Îka narua ûrîa ûrenda gwîka!”

²⁸ Gûtirî mûndû wana ûmwe gatagatîrî ka arîa maarî vau metharî wataûkîrwe nî kîrîa gîatûmire Jesû eere Judasi ûguo.

²⁹ Nwatî nîûndû Judasi nîke waigaga kathandûkû ka mbeca, arutwa amwe meciragia atî nîkwa Jesû aamwîraga athiî akagûre indo irîa ciavataranagia kîrugorî, wana kana atî athiî akave athîni kîndû.

³⁰ Nake Judasi ecukia kînuku Kîam mûgate, nîwaumire nja warîo. Nakuo kwarî ûtukû.

Rîathani rîcerû

³¹ Judasi aathiî, Jesû nîwaugire atîrî, “Rîu Mûrû wa Mûndû nîmûve riiri, na riiri wa Ngai nîwonanîtue na njîra ya Mûrû wa Mûndû.

³² Ethîrwa Ngai nîmûve riiri na njîra ya Mûriû wa Mûndû, kwoguo wana nginya Ngai nîakoonania na njîra yake riiri wa Mûrû wa Mûndû.

³³ Ciana ciakwa, nîmbîthîrwa nîrî namue îvinda rînini. Mue mûkaanjaria; nwatî nîramwîra wata ûrîa nerire Ayahudi atî, ‘Kûrîa ngûthiî tîmûvota gûka.’

³⁴ Na rîu nîngûmûva rîathani rîcerû: Endanagani. Nwa nginya mwendanage wata ûrîa nîmwendete.

³⁵ Mwekara mwendanîte, andû onthe makaamenyaga atî mûrî arutwa akwa.”

Jesû nîwerire Petero atî nîakûmûkaana

³⁶ Simoni Petero nîwaûririe Jesû atîrî, “Mwathani, nîkwa ûrathiî kû?” Nake Jesû nîwamûcokerie atîrî, “Kûrîa nie nîrathiî ndûngînûmîrîra rîu, nwatî vuvarî ûkaanûmîrîra.”

³⁷ Nake Petero nîwamûûririe atîrî, “Mwathani, nîndûî gîkûgiria ngûrûmîrîre rîu, na nie nîrî mwîvarîriu gûkua nîûndû waku?”

³⁸ Nake Jesû nîwamûcokerie atîrî, “We wî mwîvarîriu gûkua nîûndû wakwa? Nie nîrakwîra na ma atî: mbere ya njamba ya ngûkû îgambe, nîûkwîthîrwa ûngaanîte maita mathatû.”