Johana 12 - ÎVUKU RÎA ÛVORO MWARO

Jesû nîwetîrîrue maguta arî îtûûrarî rîa Bethania

¹ Gûtigarîtie mîthenya îtandatû pasaka yambîrîrie, Jesû nîwathiîre îtûûrarî rîa Bethania kûrîa Lazaro ûrîa aariûkîtie aatûûraga.

² Kûu nîkuo maamûvarîrîrie irio cia kîvwaî. Maritha nîwatethererie kûvecana irio, nake Lazaro aarî ûmwe wa arîa meekarîte na Jesû metharî.

³ Mariamu nîwocire mûcuva warî na maguta maanungaga waro na ma goro, akîmetîrîria magûrûrî ma Jesû. Mariamu nîwagiririe maguta magûrûrî ma Jesû na njuîrî ciake. Naguo mûnungo mwaro wa maguta mau nîwecûrire nyomba yonthe.

⁴ Mûrutwa ûmwe wa Jesû wetagwa Judasi Mûsikariota, (na nîke ûrîa wacokire kûmûcukanîrîra), nîwaûririe atîrî,

⁵ “Nîndûî Kîamgiria maguta mama mendue dinarii magana mathatû, na mbeca icio ivewe athîni.”

⁶ Nwatî Judasi ndaauga ûguo nîûndû atî wa kûrîrîra athîni, nwatî aaugire ûguo nîûndû aarî mwîi. Ke nîke wakuuaga kathandûkû ka mbeca na nîwaîaga mbeca kuuma kathandûkûrî kau.

⁷ Jesû nîwaugire atîrî, “Tigana na Mariamu! Tiga aige kîrîa arî nakîo nîûndû wa mûthenya ûrîa ngaathikwa.

⁸ Mûkethagîrwa mûrî na athîni vingo cionthe nwatî mûtikethagîrwa mûrî nanie vingo cionthe.”

Mûvango wa kûraga Lazaro

⁹ Rîrîa Ayahudi eengî meegwire atî Jesû aarî îtûûrarî rîa Bethania nîmaathiîre kuo. Nao matiathiî kuo nîûndû wa kwenda kwona Jesû, nwatî maathiîre kuo nîguo makoone Lazaro ûrîa wariûkîtue nî Jesû.

¹⁰ Kwoguo anene a athînjîri-Ngai nîmaavangire ûrîa makûraga Lazaro wanake,

¹¹ nîûndû Ayahudi eengî mamenya maûndû marîa Lazaro eekîtwe, nîmaareganaga na atongoria ao na magetîkia Jesû.

Jesû nîwatonyire Jerusalemu arî na ûvootani

¹² Mûthenya ûcio warûmîrîrîte, andû eengî arîa maakinyîte kîrugorî Kîam pasaka, nîmegwire atî Jesû aarî njîrarî athiîte Jerusalemu.

¹³ Kwoguo nîmoocire mathîgî ma mîkîndû na makîthiî kûmûtûnga makîanagîrîra atîrî, “Hosana! Kûrathimwa nî ûrîa ûkîte na rîîtwa rîa Mwathani! Kûrathimwa nî Mûthamaki wa Isiraeli!”

¹⁴ Nake Jesû nîwonire njaû ya mvunda na akîthiî amîtwîte wata ûrîa mandîko matheru maugîte atî,

¹⁵ “Tigani gwîtigîra mue andû a îtûûra rîa Zayuni! Oneni Mûthamaki wenyu nîaûkîte, atwîte njaû ya mvunda.”

¹⁶ Nao arutwa ake matiataûkîrwa nî maûndû vîndî îo, nwatî rîrîa Jesû aarîkirie kûgîa na riiri nîmaaririkanire atî mandîko matheru nîmaugîte nîagekwa maûndû mama.

¹⁷ Nao andû arîa maarî nake vîndî îrîa eetire Lazaro kuuma mbîrîrarî na akîmûriûkia, nîmaathiîre na makîva kîrîndî ûvoro wa ûrîa Jesû eekire.

¹⁸ Ûndû ûcio nîguo watûmire kîrîndî kîmûtûnge, nîûndû nîkîegwire atî nîwaringîte Kîamma kîu.

¹⁹ Nao Afarisai nîmaacokire makîrana atîrî, “Nîmûrona tûtiravota gwîka wanarî atîa! Taroriani! Andû onthe nîmaramûrûmîrîra!”

Angiriki amwe nîmaacaririe Jesû

²⁰ Kwarî Angiriki maarî gatagatîrî ka andû arîa maathiîte îtûûrarî rîa Jerusalemu kûgooca Ngai vîndî ya Kîrugo Kîam pasaka.

²¹ Nao nîmaathiîre kûrî Filipu (ûrîa warî wa kuuma Bethisaida gîcunjîrî Kîam Galili) na makîmwîra atîrî, “Mûthuuri ûyû, nîtûrenda kwona Jesû.”

²² Nake Filipu nîwathiîre na akîra Enderea, na oîrî makîthiî makîra Jesû.

²³ Nake Jesû nîwamerire atîrî, “Îvinda nîrîkinyu Mûrû wa Mûndû avewe riiri.

²⁴ Nie nîramwîra na ma atî, mvîndî ya ngano îkaraga îrî wa yonga îngîrega kûvandwa mûtheturî na îkue. Nwatî îngîkua, nîîciaraga maciaro meengî.

²⁵ Mûndû wa wonthe wendete mwoyo wake nîakaaûrwa nîguo, nwatî mûndû wa wonthe ûmenete mwoyo wake arî gûkû nthî nîagaûtûûria tene na tene.

²⁶ Mûndû wa wonthe ûndungatagîra nwa nginya anûmîrîre nîguo varîa nîrî ndungata yakwa îthagîrwe nîvo îrî wa nayo. Nake Vava agaatîîaga mûndû wa wonthe ûrîa ûndungatagîra.

Jesû nîwaririe ûvoro wîgiî gûkua gwake

²⁷ “Rîu nînîrathînîka mûno ngororî yakwa, nwatî nîmbuga atîa? Nîkwa nguuga, ‘Vava ndûgetîkîre nginyîrwe nî îvinda rîîrî?’ Nwatî kîu nîkîo gîtûmi kîrîa gîatûmire mbûke gûkû nthî nîguo nginyîre îvinda rîîrî.

²⁸ Vava goocithia rîîtwa rîaku!” Naguo mûgambo nîwacokire ûkiuma îgûrû ûkiuga atîrî, “Nînîrîgoocithîtie na nwa ngûrîgoocithia wa rîngî.”

²⁹ Nao andû arîa maarûngamîte vo nîmeguire mûgambo ûcio na amwe gatagatîrî kao makiuga, atî mau maarî marurumî. Nwatî andû arîa engî nîmaaugire atîrî, “Mûraika nîke wamwarîria!”

³⁰ Nake Jesû nîwamerire atîrî, “Mûgambo ûcio ndûnarua nîûndû wakwa, nwatî warua nîûndû wenyu.

³¹ Rîrî nî îvinda rîa gûtuîra andû a gûkû nthî ciira, na rîu mûnene wa gûkû nthî nîakwîngatwa.

³² Rîrîa ngaavirwa îgûrû nyume gûkû nthî, nîngaagucîrîria andû onthe kûrî nie.”

³³ (Jesû akiuga ûguo eendaga kwonania njîra îrîa aarî akue nayo.)

³⁴ Nakîo kîrîndî nîgîacokirie atîrî, “Watho wetû ûtwîraga atî Mesaya agaatûûra tene na tene. Kûngîvoteka atîa ûtwîre atî Mûrû wa Mûndû nwa nginya ambatue? Mûrû wa Mûndû ûcio nû?”

³⁵ Nake Jesû nîwamerire atîrî, “Ûtheri nîwîthîrwa ûrî gatagatîrî kenyu kavinda kanini. Thiîni rîrîa kûrî na ûtheri nîguo mûtikethîrîrue nî nduma, nîûndû mûndû ûrîa ûthiîcaga kûrî na nduma ndamenyaga kûrîa arathiî.

³⁶ Îtîkiani ûtheri vîndî îrîa mûrî naguo, nîguo mûtuîke andû a ûtheri.” Nake Jesû aarîkia kuga ûguo, nîwamatigire na akîmethitha.

Andû nîmaaregire gwîtîkia Jesû

³⁷ Wana ethîrwa Jesû aarî mûringu ciama ino cionthe andû makîonaga, o matiamwîtîkia.

³⁸ Ûndû ûyû wekîkire nîguo ciugo ivinge irîa mûrathi Isaia aaugire atîrî: “Mwathani, nû wetîkirie ndûmîrîri îrîa twavecanire? Na nû Mwathani oonirie ûrîa vinya wake wîgana?”

³⁹ Kwoguo andû matietîkia, nîûndû Isaia nwa waugire atîrî:

⁴⁰ “Ngai nîamatuîte atumumu, na akamaûmia ngoro, nîguo matikone na metho mao, na matigataûkîrwe ngororî ciao, wana matikanjokerere nîmavonie.”

⁴¹ Isaia aaugire ûguo nîûndû nîwonire riiri wa Jesû na akîaria ûvoro ûmwîgiî.

⁴² Nakuo kwarî na anene eengî a Ayahudi maamwîtîkirie, na nîûndû nîmeetigagîra Afarisai nîmaaremirwe nî kwaria cararûkû ûvoro ûmwîgiî nîguo matikengatwe kuuma îvoerorî.

⁴³ O meendete gûkumua nî andû makîria ya ûrîa meendete gûkumua nî Ngai.

Ciugo cia Jesû nîcio igaatuîra andû ciira

⁴⁴ Jesû nîwanîrîre akiuga atîrî, “Mûndû wa wonthe ûmbîtîkîtie tî nie tu etîkîtie, nwatî etîkîtie wana ûrîa wandûmire.

⁴⁵ Mûndû wa wonthe ûmonaga nîwonaga wana ûrîa wandûmire.

⁴⁶ Nie mbûkîte ta ûtheri gûkû nthî nîguo andû onthe arîa mambîtîkagia matigekare ndumarî.

⁴⁷ Mûndû wa wonthe angîgua ndûmîrîri yakwa na arege kûmîathîkîra, ndingîmûtuîra. Nie ndiaûka gûtuîra andû nwatî naaûkire kûmavonokia.

⁴⁸ Mûndû wa wonthe ûndegaga na ûtetîkagîra ndûmîrîri yakwa arî na mûndû ûkaamûtuîra ciira. Ciugo irîa naria nîcio igaacirithia mûndû ûcio mûthenya wa mûthiia!

⁴⁹ Nie ndinaria na wathani wakwa nie mwene, nwatî Vava ûrîa wandûmire nîke ûmvete ûrîa mbagîrîrwe nî kuga na kwaria.

⁵⁰ Na nîmbîcî atî maathani make nîmatûmaga andû magîe na mwoyo wa tene na tene. Kwoguo ûndû wa wonthe mbugaga nî ûrîa Vava ethagîrwa ambîrîte mbuge.”