Johana 10 - ÎVUKU RÎA ÛVORO MWARO

Ngerekano ya Mûrîthi

¹ Jesû nîwaugire atîrî, “Na ma nîramwîra atî: mûndû ûrîa ûtavîtûkagîrîra kîvingorî agîtonya rwagarî rwa ng'ondu, nwatî atwîcagîra rwirigorî nî mwîi na nî mûcunani.

² Mûndû ûrîa ûvîtûkagîrîra kîvingorî agîtonya nîke mûrîthi wa ng'ondu.

³ Ûcio nîke ûvingûragîrwa nî mwîkaria wa kîvingo. Nake nîwîtaga ng'ondu ciake na marîîtwa na ciegua mûgambo wake agaitongoreria, ikauma nja.

⁴ Nake airuta nja nîaitongoragîria nacio ikamuuma vuva nîûndû nîciîcî mûgambo wake.

⁵ Itingiuma mûndû wîngî vuva; vandû va ûguo nîkwa ingîûra nîke nîûndû itiîcî mûgambo wake.”

⁶ Jesû nîwamavere ngerekano îno, nwatî matiataûkîrwa nî ûrîa eendaga kuga.

Jesû nîke Mûrîthi Mwaro

⁷ Kwoguo Jesû nîwamerire rîngî atîrî, “Nîramwîra na ma atî: Nie nînie kîvingo kîrîa ng'ondu ivîtûkagîrîra igîtonya.

⁸ Arîa onthe maaûkire mbere yakwa nî aîi na acunani, nwatî ng'ondu itiamathikîrîria.

⁹ Nie nînie kîvingo. Mûndû wa wonthe ûvîtûkagîrîra varî nie agîtonya, nîakaavonoka; ke agaatonyaga na akauma na akona kîndû gîa kûrîa.

¹⁰ Mwîi aûkaga tu nîguo aîe, aûrage na acûkangie. Nie mbûkîte nîguo mûgîe na mwoyo na mûgîe naguo viû.

¹¹ “Nie nînie mûrîthi mwaro. Mûrîthi mwaro nîarutaga mwoyo wake nîûndû wa ng'ondu.

¹² Mûndû ûrîa ûrîvagwa nîguo amenyerere ng'ondu nî ngûrani na mûrîthi mwene cio. Mûndû wa kûrîvwa angîona Kîamthi gîûkîte nîavinyûraga aûrîte na agatiganîria ng'ondu irî cionga. Nakîo Kîamthi nîkînyitaga ng'ondu îmwe na icio ciîngî ikanyagania.

¹³ Mûndû wa kûrîvwa nîavinyûraga akaûra, nîûndû ke nî mûndû tu wa kûrîvwa na ndatindanagîra na ng'ondu.

¹⁴ Nie nînie mûrîthi ûrîa mwaro. Nîmbîcî ng'ondu ciakwa nacio ng'ondu ciakwa nîimbîcî,

¹⁵ wata ûrîa Vava ambîcî, nanie ngamenya Vava. Nînaruta mwoyo wakwa nîûndû wa cio.

¹⁶ Na nîrî na ng'ondu ciîngî ciakwa itarî rwagarî rûrû, na nwa nginya wa nacio nîirete. Nacio nîikûthikîrîria mûgambo wakwa, na cionthe vamwe ituîke cia ndîthia îmwe na igîe na mûrîthi ûmwe.

¹⁷ “Vava nîamendete nîûndû nîrîmwîvarîriu kûruta mwoyo wakwa nîguo njoke nîwîcukie rîngî.

¹⁸ Gûtirî mûndû ûkûnjuna mwoyo wakwa. Nie nînie ngûûvecana na kwenda gwakwa. Nîrî na ûvoti wa kûûvecana na nîrî na ûvoti wa kûwîcukia rîngî. Na ûguo nîguo Vava ambathîte mbîke.”

¹⁹ Nake auga ûguo, Ayahudi nîmaamûkanire rîngî.

²⁰ Eengî gatagatîrî kao nîmaambîrîrie kuga atîrî, “Ke arî na ndaimono, na arî na ngoma! Mûramûthikîrîria nîkî?”

²¹ Nwatî andû engî nîmaaugaga atîrî, “Mûndû wîna ndaimono ndangîvota kwaria ûguo! Ndaimono nwa îvotithie mûtumumu kwona?”

Jesû nîwaregirwe

²² Îvinda nîrîakinyire rîa kîrugo gîa gûkûngûîra kwamûrwa kwa hekarû îtûûrarî rîa Jerusalemu. Kwarî vîndî ya mvevo.

²³ Rîrîa Jesû aaceraga Kîthakurî gîa Solomoni kûu hekarûrî,

²⁴ andû amwe nîmaamûrigicîrie na makîmûûria atîrî, “Nîwîkara ûtwigîte na nganja nginya rî? Twîre cararûkû: we nîwe Mesaya?”

²⁵ Nake Jesû nîwamacokerie atîrî, “Nie nîndîkîtie kûmwîra, nwatî mûtirambîtîkia. Maûndû marîa mbîkaga na rîîtwa rîa Vava nîmonanagia nie nîrî û;

²⁶ nwatî mue mûtiretîkia nîûndû mûtirî ng'ondu ciakwa.

²⁷ Ng'ondu ciakwa nîithikagîrîria mûgambo wakwa; nie nînîciîcî na nîinûmagîrîra.

²⁸ Nie nînîivecaga mwoyo wa tene na tene, na itigaakua rî kana rî. Gûtirî mûndû ûngînjuna cio.

²⁹ Vava nîke wamvere ng'ondu icio. Ke nî mûnene gûkîra andû onthe na gûtirî mûndû ûngîiruta njararî cia Vava.

³⁰ Nie na Vava tûrî kîndû kîmwe.”

³¹ Wa rîngî Ayahudi nîmoocire mathiga nîguo mamûûrage namo.

³² Nwatî Jesû nîwamerire atîrî, “Mue mûrî onu ngîka maûndû meengî maro mvotithîtue nî Vava; gatagatîrî ka mo nî ûndû ûrîkû ûratûma mwende kûmbûraga?”

³³ Nao nîmaamûcokerie atîrî, “Tûtirenda gûkûûraga nîûndû wa gwîka maûndû maro, nwatî nîûndû nîwaruma Ngai! We wî mûndû tu, nwatî ûrageria gwîtua Ngai!”

³⁴ Nake Jesû nîwamacokerie atîrî, “Nîkwandîke wathorî wenyu atî Ngai aaugire atîrî, ‘Mue mûrî ngai.’

³⁵ Tue nîtuicî atî mandîko matheru maugaga ûma vîndî cionthe. Nake Ngai nîwetire andû acio maavunjîrue ndûmîrîri îo yake ngai cia mîvuanano.

³⁶ Vava nîwanyamûrire na akîndûma gûkû nthî. Kwoguo nîndûî kîratûma muge nînaruma Ngai namwîra, ‘Nie nîrî Mûriû wa Ngai?’

³⁷ Angîthîrwa ndireka maûndû marîa Vava endaga mbîke, gûtirî na vata wa kûmbîtîkia.

³⁸ Nwatî angîthîrwa nîreka maûndû marîa Vava endaga mbîke, nîkwagîrîrîte mwîtîkie maûndû marîa mbîkaga wana ethîrwa mûtirambîtîkia. Mwona mwetîkia maûndû marîa mbîkaga nîmûkûvota kûmenya waro atî nie na Vava tûrî kîndû kîmwe.”

³⁹ Na wa rîngî Ayahudi nîmaageririe kûnyita Jesû nwatî ke nîwaûrire.

⁴⁰ Wa rîngî Jesû nîwacokire mûringo wa rûnjî rwa Jorodani kûrîa Johana aavatithanagîria mbererî. Jesû nîwekarire kuo,

⁴¹ na andû eengî makîthiî kûrî ke na makîmwîra atîrî, “Johana ndaatûringîra ciama, nwatî maûndû monthe marîa aaririe megiî mûndû ûyû nî ma ma.”

⁴² Nao andû onthe arîa maarî kuo nîmeetîkirie Jesû.