Johana 1 - ÎVUKU RÎA ÛVORO MWARO

Kiugo nîgîatuîkire mûndû

¹ Kîambîrîriarî, Ke ûrîa wîtagwa Kiugo aarî wa kuo. Kiugo aarî vamwe na Ngai na aarî Ngai.

² Kuuma wa Kîammbîrîria, Kiugo aarî vamwe na Ngai.

³ Indo cionthe ciaûmbirwe nî Ngai na njîra ya Kiugo na gûtirî kîndû wana kîmwe Kîamûmbirwe Kiugo atarî vo.

⁴ Ndaarî yake kwarî na mwoyo, naguo mwoyo nîguo warî ûtheri wa andû.

⁵ Ûtheri nîûkengaga ndumarî, na nduma ndîanaûvoota.

⁶ Ngai nîwatûmire mûnjaama wake; mûndû ûcio eetagwa Johana.

⁷ Ke aaûkire kûva andû ûira wa ûtheri nîguo andû onthe megue ndûmîrîri îo na mamîtîkie.

⁸ Johana tîke warî ûtheri, nwatî aaûkire nîguo ave andû ûira wa ûtheri.

⁹ Ûyû nîguo warî ûtheri wa ma; ûtheri ûrîa ûkaga gûkû nthî na ûkamûrîkîra andû onthe.

¹⁰ Kiugo aarî gûkû nthî, nwatî wana ethîrwa Ngai aaûmbire nthî na njîra yake, andû a gûkû nthî matiamwîtîkîra.

¹¹ Kiugo aathiîre vûrûrirî wake mwene na andû ake mwene matiamûnyita ûgeni.

¹² Nwatî andû onthe arîa maamwamûkîre na makîmwîtîkia, nîwametîkîrie gûtuîka ciana cia Ngai.

¹³ Nao matiatuîka ciana cia Ngai na njîra îrîa andû maciaragwa, kana vinya wa mûndû wana kana wendi wa mûndû, nwatî Ngai ke mwene nîke watûmire matuîke ciana ciake.

¹⁴ Kiugo nîwatuîkire mûndû na agîtûûrania natue ecûrîtwe nî wega na ûma. Natue nîtwonire riiri wake, riiri ûrîa Ngai aaveere Mûriû wake wa mûmwe.

¹⁵ Johana nîwavecanire ûira wa Kiugo na akîanîrîra akiuga atîrî, “Ûyû nîke ûrîa nie naaragia ûvoro wake vîndî îrîa naugire atî, ‘Ûrîa ûraûka vuva wakwa arî na vata kûngîra, nîûndû aarî kuo mbere ya njiarwe.’ ”

¹⁶ Nîtûnyitîte irathimo nyîngî mûno kuuma wegarî ûcio wake mwîngî.

¹⁷ Ngai aavecanire watho na njîra ya Musa, nwatî wega na ûma ciaûkire na njîra ya Jesû Kristû.

¹⁸ Gûtirî mûndû wanona Ngai. Nwatî Mûriû wake wa mûmwe ûrîa wî vakuvî mûno na îthe, nîke ûtûmîte amenyekane.

Ûira wa Johana Mûvatithania

¹⁹ Atongoria a Ayahudi marî Jerusalemu, nîmaatûmire athînjîri-Ngai na Alawi mathiî kûrî Johana makamûrie atîrî, “We wî û?”

²⁰ Johana ndaarega kûmacokeria, nwatî nîwamaumbûrîre cararûkû akîmeera atîrî, “Nie tînie Mesaya.”

²¹ Nao nîmaamûririe atîrî, “We wî û vi? We wî Elija?” Nake Johana nîwamacokerie atîrî, “Naarî, nie tînie ke.” Nao nîmaamûririe atîrî, “We nîwe Mûrathi?” Nake Johana nîwamacokerie atîrî, “Naarî.”

²² Kwoguo athînjîri-Ngai na Alawi nîmaamwîrire atîrî, “Twîre vi we wî û, nîûndû nwa nginya tûvire macokio kûrî atongoria arîa matûtûmire. Nî ûvoro ûrîkû ûngiuga ûkwîgiî?”

²³ Nake Johana nîwamacokerie na ciugo irîa mûrathi Isaia aaririe atî: “Nînie Mûgambo ûranîrîra werûrî ûkiugaga atîrî: ‘Rûngariani njîra ya Mwathani!’ ”

²⁴ Nao anjaama arîa maatûmîtwe nî Afarisai,

²⁵ nîmaacokire makîûria Johana atîrî, “Angîthîrwa we tîwe Mesaya, kana Elija, kana Mûrathi, ûvatithanagia nîkî?”

²⁶ Johana nîwamacokerie atîrî, “Nie mvatithanagia na manjî, nwatî gatagatîrî kenyu varî na mûndû mûtecî.

²⁷ Ke nîagûka vuva wakwa na nie ndirî mwagîrîru wa kwovora ndigi cia iratû ciake.”

²⁸ Maûndû mama monthe meekîkire îtûûrarî rîa Bethania rîrîa rîarî mûringo wa îrathîro wa Rûnjî rwa Jorodani, kûrîa Johana aavatithanagîria.

Gatûrûme ka Ngai

²⁹ Naguo mûthenya ûcio wîngî Johana nîwonire Jesû athiîte kûrî ke na akiuga atîrî, “Taroriani Gatûrûme ka Ngai karîa kathengutagia wîvia wa andû a nthî!

³⁰ Ûyû nîke naamwîraga ûvoro ûmwîgiî rîrîa naaugire atîrî, ‘Varî na mûndû ûgûka vuva wakwa, nwatî ke arî na ûvoti kûngîra nîûndû ke aarî kuo wana mbere ya njiarwe?’

³¹ Nie mwene ndiamwîcî, nwatî naaûkire ngîvatithanagia na manjî nîguo andû a Isiraeli mamûmenye.”

³² Johana nîwavecanire ûira ûyû: “Nînona Roho akînyûrûrûka kuuma îgûrû ekariî ta ndutuura na ekara îgûrû rîake.

³³ Nie mwene ndiamwîcî, nwatî Ngai ûrîa wandûmire ngavatithanie na manjî, nîwambîrire atîrî, ‘We nîûkoona Roho akînyûrûrûka na agîkara îgûrû rîa mûndû; Ke nîke ûvatithanagia na Roho Mûtheru.’

³⁴ Nie nînona maûndû mama magîkîka na nekîra ûira atî mûndû ûyû nî Mûriû wa Ngai.”

Arutwa a mbere a Jesû

³⁵ Naguo mûthenya ûcio wîngî Johana nîwarûngamîte vau rîngî marî na arutwa ake aîrî.

³⁶ Rîrîa oonire Jesû avîtûkîrîrîte vo, nîwaugire atîrî, “Taroriani Gatûrûme ka Ngai.”

³⁷ Rîrîa arutwa acio aîrî meeguire Johana auga ûguo, nîmaarûmîrîre Jesû.

³⁸ Jesû evûgûra, nîwamoonire mamûrûmîrîrîte na akîmaûria atîrî, “Nîndûî mûracaria?” Nao nîmaamûririe atîrî, “Rabii, Wîkaraga kû?” (“Rabii” nî kuga, “Mwarimû.”)

³⁹ Nake Jesû nîwacokerie arutwa acio atîrî, “Ûkani mûkone.” Vîndî îo kwarî ta thaa îkûmi cia mûthenya. Nao nîmaathiîre nake makîona kûrîa eekaraga na magîkarania nake nginya mûthenya ûcio ûkîthira.

⁴⁰ Ûmwe wa arutwa acio aîrî arîa meeguire Johana akîaria ûvoro wîgiî Jesû aarî Enderea mûrwang'ina na Simoni Petero.

⁴¹ Ûndû wa mbere ûrîa Enderea eekire warî kûthiî kûrî mûrwang'ina Simoni na akîmwîra atîrî, “Tue nîtûronire Mesaya.” (Ûguo nîkuga Kristû)

⁴² Enderea nîwacokire akîvira Simoni kûrî Jesû. Nake Jesû nîwamûroririe na akîmwîra atîrî, “We nîwe Simoni, mûvîcî wa Johana nwatî kuuma rîu ûgeetagwa Kefa.” (Rîîtwa rîîrî na Kîngiriki nî Petero, na nî ûndû ûmwe na kuga “Îthiga.”)

Jesû nîwetire Filipu na Nathanieli

⁴³ Naguo mûthenya ûcio wîngî Jesû nîwatwire athiî Galili. Nake nîwethîrîrie Filipu na akîmwîra atîrî, “Nûmîrîra!”

⁴⁴ (Filipu aarî wa kuuma îtûûrarî rîa Bethisaida, kûrîa Enderea na Simoni maatûûraga).

⁴⁵ Nake Filipu nîwonire Nathanieli na akîmwîra atîrî, “Tue nîtwona mûndû ûrîa ûvoro wake wandîkîtwe nî Musa îvukuurî rîa Watho na ûgacoka ûkandîkwa nî arathi. Ke nîke Jesû mûriû wa Josefu wa kuuma îtûûrarî rîa Nazarethi.”

⁴⁶ Nake Nathanieli nîwaûririe Filipu atîrî, “Kûrî kîndû Kîamro kîngiuma îtûûrarî rîa Nazarethi?” Nake Filipu nîwamûcokerie atîrî, “Ûka ûkone.”

⁴⁷ Rîrîa Jesû oonire Nathanieli athiîte kûrî ke nîwaririe ûvoro ûmwîgiî na akiuga atîrî, “Taroriani mwone Mûisiraeli wa ma, na ndarî ûcuke!”

⁴⁸ Nake Nathanieli nîwamûririe atîrî, “We ûmbîcî atîa?” Nake Jesû nîwamûcokerie atîrî, “Nie nîngwonire rîrîa ûrekarîte kîrururî Kîam mûkûyû mbere ya Filipu agwîte.”

⁴⁹ Nathanieli nîwacokerie Jesû atîrî, “Mwarimû, we nîwe Mûriû wa Ngai! Nîwe Mûthamaki wa Isiraeli”

⁵⁰ Nake Jesû nîwamwîrire atîrî, “Wetîkia tu nîûndû nînakwîra nîngwonire rîrîa ûrekarîte kîrururî Kîam mûkûyû? We nîûkwona maûndû meengî manene gûkîra mama!”

⁵¹ Jesû nîwacokire akîmeera atîrî, “Nîramwîra ûvoro wa ma atî: nîmûkoona îgûrû rîkîvingûka nao araika a Ngai makiunûkia na makînyûrûrûka îgûrû rîa Mûrû wa Mûndû.”