Joeli 3 - ÎVUKU RÎA ÛVORO MWARO

Ngai nîagaatuîra Mavûrûri

¹ Ngai-Mûnene arauga atîrî, “Vîndî îo nîngaatûma Juda na Jerusalemu kûgacîre rîngî.

² Nîngaûngania mavûrûri monthe vamwe, na nîmavire Kîamndarî gîa îtuîro. Vau nîvo ngaamatuîra, nîûndû wa maûndû marîa mekîte andû akwa. Nîmanyaganîtie Isiraeli mavûrûrirî mageni, na makagaania Isiraeli, vûrûri wakwa.

³ Nîmaaûthire nîguo mamenye nî ûrîkû ûgwoca mîgwate; nîmeendirie anake na erîtu marî ngombo, nîguo marîve ûmaraa na ndivei.

⁴ “Mûrenda gwîka atîa mue Turo na Sidoni na kûu Filisiti kuonthe? Kûrî na ûndû mûrerîvîrîria? Ethîrwa nîkwa mûrerîvîrîria, nie nîngûmûrîvîrîria wa rîmwe.

⁵ Nîmwocete sîlûva na thaavu ciakwa na mûgakuua indo ciakwa mûkaivira metharî cienyu cia magongoona.

⁶ Nîmwendetie andû a Juda na a Jerusalemu kûrî andû a Ngiriki na mûkîmavira kûraca na vûrûri wao.

⁷ Rîu nîngûruta andû akwa kûrîa mwamendirie. Ngaamwîka wata ûguo mwamekire.

⁸ Nîngaatûma anake na erîtu enyu mendue kûrî andû a Juda, na nîmakaamendia vûrûri wa kûraca ûrîa wîtagwa Sabea. Nînie Ngai-Mûnene nauga ûguo.

⁹ “Anîrîra ûndû ûyû kûrî mavûrûri monthe: îîvarîrieni nîûndû wa mbaara; îtani athigari enyu. Ûnganiani athigari enyu na mathiî na mbere.

¹⁰ Turani tûviû twa mîraû yenyu mviû cia njûra, natuo tûviû twenyu twa gûcaa mûtûture matumû, arîa matarî na vinya nîmauge atîrî, ‘Wananie nî njamba ya kûrûa.’

¹¹ Ûkani na îvenya, mue mavûrûri monthe, ûnganani vamwe Kîamndarî, tûma athigari aku we Ngai-Mûnene.

¹² “Nwanginya mavûrûri mevarîrie; maûke Kîamndarî gîa îtuîro. Kûu nîkuo nie Ngai-Mûnene ngekara, kûu nîkuo ngekara ngîtuîra mavûrûri monthe ma nthî.

¹³ Ocani kaviû ga gûketha nîûndû rîu nî vîndî ya maketha. Tonyani! Mûmakinyange ta thavibu ciîcûrîte kîvivîrorî Kîam thavibu. Mavîtia mao nîmakîru njano, nîta matangi mecûrîte makauna.”

¹⁴ Marakinya marî ikundi gwa ikundi Kîamndarî gîa îtuîro, nîûndû mûthenya wa Ngai-Mûnene nîûkuvîvîrie.

¹⁵ Riûa na mweri nî igîte nduma, na njata nîitigîte kûgîa na ûtheri.

Ngai nîakaarathima andû ake

¹⁶ Ngai-Mûnene nîararuruma arî kîrîmarî gîa Zayuni; aranîrîra na mûgambo mûnene arî Jerusalemu, îgûrû na nthî nîirainaina. Ngai-Mûnene nîke rîûrîro rîa andû ake, nîke ûgitagîra andû ake.

¹⁷ Vîndî îo nîrîo we Isiraeli ûkaamenya atî, nînie Ngai-Mûnene Ngai waku, ndûûraga Zayuni, kîrîmarî gîakwa kîtheru. Jerusalemu îkethîrwa îrî ntheru, na ageni matikaarîvoota rîngî.

¹⁸ Vîndî îo, irîma nîikaanyûrûrûkia ndivei îrî na mûrîo, na irîmarî kumage îria, gûkethîrwa kûrî na manjî tûrûnjîrî tuonthe twa Juda. Gûkethîrwa kûrî na karûnjî nyombarî ya Ngai-Mûnene, karûnjî kau nîgakaathiîrîra Kîamndarî gîa Shitimu.

¹⁹ Misiri gûkethîrwa kûrî werû, na Edomu gûkethîra kûrî werû, nîûndû nîmaatharîkîre andû a Juda, na makiûraga andû mataarî na mavîtia.

²⁰ Nwatî Juda na Jerusalemu nîgûtûûra na andû vîndî cionthe.

²¹ Nîngarîvîrîria andû a Juda, na ndigaatigana na arîa marî na mavîtia. Nie Ngai-Mûnene mbîkaraga Zayuni.