Joeli 2 - ÎVUKU RÎA ÛVORO MWARO

Ngige irî kîonereria kîa mûthenya wa Ngai-Mûnene

¹ Vuvani karumbeta mûrî Zayuni; ugîrîriani mûrî kîrîmarî gîakwa kîthuure! Tigani andû onthe a Juda mainaine, nîûndû mûthenya wa Ngai-Mûnene nîûkîte, ûrî vakuvî mûno.

² Ûcio nî mûthenya wa nduma na kîeva, mûthenya wa matu na nduma nene. Ngige nyîngî nîciûkîte, ciîkariî ta nduma îtambûrûkîte irîmarî. Gûtianethîrwa kûrî na tayo wanarî vanini, na ndîkoonekana rîngî kûrî njiarwa cionthe igaûka.

³ Ta ûrîa mwaki ûvîvagia vûrûri wîkariî ta mûgûnda wa Edeni, nwatî vuva wake nîta werû, na gûtirî kîndû kîngîûra.

⁴ Mekariî ta mbarathi, mavinyûraga ta mbarathi cia mbaara.

⁵ Mararûgarûga marî îgûrû rîa kîrîma, mararûgarûga ta ikaari cia mbarathi; mararuruma ta mwaki wa macaki mama maûmû rîerarî. Mevangîte ta gîkundi kînene Kîam athigari kîîvarîrîtie kûrûa.

⁶ Wa ûrîa magûkuvîvîria andû maragwatwa nî guoya, mothiû mao magatuka nî guoya.

⁷ Marûaga ta arûi a mbaara matûcaga nthingo ta athigari. Mathiîcaga marûmanîrîrîte, na maticenjagia njîra ciao.

⁸ Gûtirî mûndû ûvatîkaga ûrîa wîngî, wa mûndû arûmagîrîra njîra yake; mavîtûkagîrîra gatagatî ka nyambo, na gûtirî wanarî gîa kûmagirîrîria.

⁹ Mavinyûranagia rûthingorî; mavaritaga nyomba magatonyerera îgûrû; matonyagîrîra ndiricarî ta aîi.

¹⁰ Nthî nîîratetema mbere yao îgûrû nîrîrainaina. Riûa na mweri nîiratuîka nduma, nacio njata nîitigîte kûruta ûtheri.

¹¹ Ngai-Mûnene nîathaga athigari ake, athigari ake nî engî mûno, arîa mamwathîkagîra nî eengî mûno. Mûthenya wa Ngai-Mûnene nî mûnene na nîwakûmakania, nîûrîkû ûngîvota kûwîtirîria?

Ngai-Mûnene nîareta andû merire

¹² “Nwatî kûnarî ûguo,” nie Ngai-Mûnene nauga atîrî, “Njokererani na ngoro yonthe, na njîra ya kwînyerekia, kûrîra na gûcakaya.

¹³ Tembûrangani ngoro cienyu na mûtigatembûrange nguo cienyu.” Cokererani Ngai-Mûnene, Ngai wenyu, ke ecûrîtwe nî ntha na nî mûtugi, ndarakaraga na îvenya na arî wendo ûtathiraga; ke nîovanagîra agatiga kûverithania.

¹⁴ Nwa kwîthîrwa Ngai-Mûnene Ngai wenyu nîakwîricûkwa, na amûve irathimo cia irio nyîngî, mûcoke mûmûrutîre matega ma irio cia mûgûnda na ndivei.

¹⁵ Vuvani karumbeta kûu kîrîmarî gîa Zayuni; anîrîrani andû menyerekie, na mwîtane mûcemanio mûtheru.

¹⁶ Ûnganiani andû vamwe; varîrîriani andû nîûndû wa kîûngano kîtheru; reteni andû arîa akûrû, ûnganiani ciana vamwe, wana ciana irîa ironga. Andû arîa maravikanirie nîmaume kwao nyomba maûke.

¹⁷ Gatagatî ka metha ya kîgongoona athînjîri-Ngai arîa matungataga Ngai-Mûnene nî marîre makiugaga atîrî: “Îguîra andû aku ntha we Ngai-Mûnene. Ndûkareke andû arîa engî matûmena, matûmena makîûragia atîrî, ‘Ngai wao arî kû?’ ”

Ngai nîke ûcokagia ûnoru vûrûrirî

¹⁸ Ngai-Mûnene nîwacokire akîonania wendo wa vûrûri wake, na akîguîra andû ake ntha.

¹⁹ Nîwacokire akîra andû ake atîrî, “Rîu nîngûmûva ngano, ndivei na maguta ma ndamaiyû, na nîmûkwîganîra. Andû a ndûrîrî matikaamûnyarara rîngî.

²⁰ Nîngaaruta nthû icio ciumîte mwena wa rûgûrû, na nîngavira amwe nginya werûrî. Athigari arîa marî mbere nîngamavira nginya Îriarî rîa Cumbî, nao arîa a vuva nîmavire Îriarî rîa Mediterania. Nîmakaaruta mûruke mûcûku na mûnungo mûcûku, acio nîmekîte maûndû meengî mûno macûku.

²¹ “Ndûkegue guoya, we vûrûri, nwatî kena na ûcanjamûke, nîûndû wa maûndû monthe marîa Ngai-Mûnene ekîte nîûndû waku.

²² Mûtikegue guoya mue nyamû, kûndû gwa kûrîthia rîu nî kwîngî; mîtî rîu nîîraciara matunda, mîthavibu na mîkûyû nîîraciara mûno.

²³ “Kenani, mue andû a Zayuni, mûcanjamûke mûrî kûrî Ngai-Mûnene, Ngai wenyu, nîûndû nîamûvete mbura îrîa mûkwenda. Nîaurithîtie mbura ya kwîgana, mbura nene na mbura nini wata mbere.

²⁴ Vandû va kûvûrîra vakethîrwa vecûrîte ngano; kîvivîro nîgîgeecûra ndivei na maguta.

²⁵ Nîngamûcokeria kîrîa Kîamûrire vingo îrîa ngige ciarîîre irio cienyu, nînie namûtûmîre athigari acio engî ûguo.

²⁶ Nîmûrîa irio nyîngî na mwîganie, na mûkumie Ngai-Mûnene, Ngai wenyu, ûrîa wîkîte maûndû ma kûmakania kûrî mue, andû akwa matigaaconorithua rîngî.

²⁷ Nîmûkaamenya atî nîrî gatagatî ka Isiraeli, na nîmûkaamenya atî nie Ngai-Mûnene nîrî namue na gûtirî wîngî. Na atî andû akwa matigaconorithua rîngî.

Mûthenya wa Ngai-Mûnene

²⁸ “Vuvarî, nîngetîrîria andû onthe Roho wakwa, andû enyu, anake na erîtu nîmakaanîrîra, andû enyu arîa akûrû nîmakaarota iroto, nao anake enyu nîmakoona cioneki.

²⁹ Wana ndungata cia anake na cia erîtu nîngaciîtîrîria Roho wakwa, nîngetûrûra Roho wakwa kûrî ndungata cia arûme na cia aka.

³⁰ “Nîngekîra rûûri îgûrû na nthî, nîgûkethîrwa na nthakame, mwaki na matu ma ndogo.

³¹ Riûa nîrîgakûnîkwa rire, naguo mweri nîûgatunîva ta nthakame, mbere ya mûthenya wa Ngai-Mûnene ûkinya.

³² Nwatî andû onthe arîa makaavoya Ngai-Mûnene amatethie, nîmakaavonokua. Nîûndû kîrîma gîa Zayuni na Jerusalemu, nîgûkethîrwa na ‘andû makaavonoka, arîa magaatigara nî arîa nie nthurîte, ta ûrîa mbugîte nie Ngai-Mûnene.’ ”