Joeli 1 - ÎVUKU RÎA ÛVORO MWARO

¹ Îno nî ndûmîrîri ya Ngai-Mûnene îrîa yaûkire kûrî Joeli mûvîcî wa Pethueli.

Ngige nîciakunîkire nthî

² Thikîrîriani mue andû akûrû; thikîrîriani mue muonthe mûtûûraga nthî! Nîkûrî ûndû ta ûyû wanoneka mûtûûrîrerî wenyu, kana vîndî ya njiarwa cienyu?

³ Îrani ciana cienyu maûndû mau, tiga ciana cienyu ciîre ciana ciao, nacio ciana ciao ciîre ciana irîa irûmîrîrîte.

⁴ Ikundi nyîngî cia ngige nîirîte mîmera; kîrîa ngige itigîtie, ngige icio ciîngî nîirîte.

⁵ Ûkîrani mue mîrîu na mûrîre: ugîrîriani, mue muonthe anyui a ndivei, thavibu cionthe cia kûrûtha ndivei îno njerû nînjûkangie.

⁶ Gîkundi Kîam ngige nîkîtharîkîrîte vûrûri wetû, kîrî na vinya na nî kînene mûno; magego ma kîo mekariî ta ma mûnyambû, mekariî ta ma mûnyambû wa nga.

⁷ Nîicûkangîtie mîthavibu yakwa, nîirîte mîkûyû yetû, nîirutîte makoni na ikamaikia nthî, na mvûa cia yo itigîtwe irî njerû.

⁸ Rîrani ta mwîrîtu ekîrîte nguo cia macakaya agîcakaa nîûndû wa gîkuû Kîam mwendwa wake.

⁹ Matega ma irio na ndivei nî mathiru hekarûrî, na mûromorî wa Ngai-Mûnene; athînjîri-Ngai nîmaracakaya nîûndû matirî na kîndû mangîtegera Ngai-Mûnene.

¹⁰ Mîgûnda îtigîtwe îtarî kîndû, nthî nîîracakaya nîûndû ngano nînjûkangie, ndivei nî nthiru na maguta magatura.

¹¹ Cakayani mue arîmi; rîrani mue mûmenyagîrîra mîthavibu. Ngano na cairi nî njûkangie, maketha monthe mîgûndarî nî macûkangie.

¹² Mîthavibu na mîkûyû nî mîvovu; mîtî yonthe ya matunda nî mîthiru vinya, mîkûngûmanga, mîkîndû na mîtunda yonthe nî mîûmû, na gîkeno nî kîthiru gatagatîrî ka andû.

¹³ Mue athînjîri-Ngai, îkîrani nguo cia macakaya mûrîre, mue mûtungataga metharî ya kîgongoona rîrani. Thiîni hekarûrî na mûcakae ûtukû mûgima! Matega ma irio na ma ndivei matirî kuo nyombarî ya Ngai.

¹⁴ Rutani watho andû menyerekie; îtani andû magomane vamwe. Ûnganiani andû arîa akûrû na andû arîa matûûraga vûrûrirî mûthiî hekarûrî ya Ngai-Mûnene, Ngai wenyu, na mûrî kûu mûrîrîre Ngai-Mûnene.

¹⁵ Kaî twî na thîna-î; mûthenya ûcio wa Ngai-Mûnene nîûkîte; ûkîte vamwe na maûndû ma gûcûkangia, kuuma kûrî Ngai-Mûnene.

¹⁶ Irio cietû nî njûkangie, gûtirî na gîkeno nyombarî ya Ngai.

¹⁷ Mbeû nîiracûkîra mûtheturî, kûrîa kwigagwa indo gûtirî kîndû, makûmbî rîu nî macûkangie, nîûndû gûtirî na irio cia kwiga kuo.

¹⁸ Nyamû nîkwa irania nî kîeva! Ndîthia cia ng'ombe nîirathînîka, nîûndû gûtirî na kûndû gwa kûrîthua, wana ndîthia cia ng'ondu nîirathînîka.

¹⁹ We Ngai-Mûnene nînîrakûrîrîra, mwaki nîûthirîtie kûndû gwa kûrîthua, nînîmbî cia mwaki nîithirîtie mîtî yonthe ya kîthaka.

²⁰ Wana nyamû cia kîthaka nîirakûrîrîra we, nîûndû tûmîtaro twa manjî rîu nî tûnyaru, mwaki nîûthirîtie kûndû gwa kûrîthua werûrî.