Jeremia 9 - ÎVUKU RÎA ÛVORO MWARO

¹ Narî kethîrwa kîongo gîakwa nî kîthima Kîam manjî, na metho makwa matherûkage methori, nîguo ndîrage ûtukû na mûthenya, nîûndû wa andû akwa arîa maûragîtwe.

² Narî kethîrwa nîrî na vandû va kûraara werûrî, ndige andû akwa vo na nthiî kûraca nao. Nîûndû nî itharia, nî gîkundi Kîam acukanîrîri.

³ Makonjaga nîmî ciao ta ûta, magîte na vinya nîûndû tî evokeku. Vûrûri ûgîte na vinya nîûndû wa maveeni nwatî tî wîvokeku, na matimbicî nie Ngai-Mûnene.

⁴ Mûndû wa wonthe nî emenyerere kûrî arîa mariganîtie nake, na ndakaige mwîvoko kûrî mûrwang'ina, nîûndû andû onthe ao nî a maveeni, na mûndû wa wonthe athiîcaga agîcambagia arata ake.

⁵ Wa mûndû aveenagia mûrata wake, na gûtirî mûndû waragia ûûma, mamenyeretie tûrîmî twao kwaria maveeni, mekaga mevia makaremwa nî kwîrira.

⁶ Mavinyagîrîria andû na makamaveenia, na makarega kûmenya. Ûguo nîguo nie Ngai-Mûnene nîrauga.

⁷ Kwoguo Ngai-Mûnene mwene vinya wonthe arauga atîrî, “Taroria andû akwa nî evia, nîngûmatheria na nîmagerie, nîûndû gûtirî ûndû wîngî nîngîmeka.

⁸ Tûrîmî twao nîta mîguî îrî na ûvai, twaragia maveeni vîndî cionthe. Wa mûndû aragia waro na mûndû ûrîa mariganîtie nake, nwatî ngororî amûvangagîra ûndû mûcûku.

⁹ Nwa ndege kûmaverithia nîûndû wa maûndû mama? Nwa ndege kwîrîvîrîria kûrî rûrîrî ta rûrû?” Ûguo nîguo Ngai-Mûnene arauga.

¹⁰ Nie naugire atîrî, “Nîngûrîrîra na njakaîre irîma, na njakaîre kûndû gwa kûrîthua, nîûndû kuonthe nî kûmîte, gûtirî mûndû ûvîtûkagîrîra kuo, na gûtiîgucagwa mûgambo wa ng'ombe. Iconi cia rîerarî na nyamû cia kîthaka nîciûrîte ikathiî.

¹¹ Nîngatûma Jerusalemu îtuîke îganjo, gûtuîke kûndû kwa gwîkarwa nî ciathi, na ndûme matûûra ma Juda matuîke werû, kûndû gûtatûûragwa nî andû.”

¹² Kûrî na mûndû mûûgî ûngîvota gûtaûkîrwa nî maûndû mama? Nî ûrîkû Ngai-Mûnene erîte maûndû mama nîguo amenyithie andû? Nîndûî gîtûmîte vûrûri ûcûkangue na ûtigwe wîkariî ta werû na gûtirî mûndû ûvîtûkagîrîra kuo?

¹³ Ngai-Mûnene nîwacokirie atîrî, “Maûndû mama mekîkîte nîûndû andû akwa nîmatiganîrîtie watho ûrîa namaveere na makîrega kwathîkîra mûgambo wakwa kana meka ûrîa namathire.

¹⁴ Nwatî nîmaûmîtie ciongo na makarûmîrîra wendi wa ngoro ciao na makagooca mîvuanano ya Baali wata ûrîa maathomithirue nî methe mao.

¹⁵ Kwoguo Ngai-Mûnene mwene vinya wonthe, Ngai wa Isiraeli arauga atî: Nîngaava andû aya mîtî mîrûrû marîe na nîmave manjî marî na ûrogi manyue.

¹⁶ Nîngamanyagania mavûrûrirî marîa o wana methe mao mataicî na nîngatûma athigari a mbaara mamarûmîrîrie nginya nîmaûrage nîmathirie viû.”

Andû a Jerusalemu nîmaarîrire matethue

¹⁷ Ngai-Mûnene mwene vinya wonthe arauga atîrî, “Îcirieni ûvoro wa maûndû mama, na mwîte aka arîa macakayaga, îtani aka arîa maicî gûcakaya.

¹⁸ Meereni maûke na îvenya nîguo matuinîre rwîmbo rwa macakaya, nîguo metho metû marîre methori, na njuîrî cia metho metû iconjwe nî methori ta manjî.”

¹⁹ Nîûndû mûgambo wa kîrîro nîûreguîka kûu Zayuni ûkiuga atîrî, “Tûrî acûkangie viû! Tûrî aconorithie viû! Nwanginya tume vûrûrirî wetû; nîûndû mîciî yetû nîmîomomore.”

²⁰ Mue aka ta thikîrîriani ciugo cia Ngai-Mûnene, tegani matû mwîgue ûrîa arauga. Thomithiani erîtu enyu gûcakaya, na mûthomithie arata enyu nyîmbo cia mathiko.

²¹ Nîûndû gîkuû nîgîtonyererete ndiricarî cietû, nîgîtonyete nyombarî cietû irîa mbaro, nîkîûragîrîte ciana njîrarî cia îtûûra, na gîkathiria andû ethî thokorî.

²² Ngai-Mûnene nîwambîrire mbuge atî: “Ciimba cia andû inyagarûkîte ta mai ma ng'ombe mîgûndarî, ta imanja cia ngano itemetwe nî mûkethi, itarî na mûndû wa gûciûngani.”

²³ Ngai-Mûnene arauga atîrî, “Mûndû mûûgî ndakegathe na ûûgî wake, na andû njamba matikegathe nîûndû wa vinya wao, na itonga itikegathe na ûtonga wacio.

²⁴ “Nwatî mûndû ûngîenda kwîgatha nîegathe na ûndû ûyû, atî nîambîcî na atî nie Ngai-Mûnene nîmbîkaga maûndû maro, ma kîvooto na maûndû ma ûthingu gûkû nthî. Maûndû mama nîmo mangenagia. Ûguo nîguo nie Ngai-Mûnene nîrauga.”

²⁵ Ngai-Mûnene arauga atîrî, “Mîthenya nîgaakinya rîrîa ngaverithia andû onthe arîa maruîte mwîrî tu:

²⁶ Misiri, Juda, Edomu, njiarwa cia Amoni, Moabu na andû onthe arîa matûûraga werûrî na menjaga njuîrî ciao igakuvîva mîena. Andû a ndûrîrî ino cionthe na andû onthe a Isiraeli tî aruu ngororî.”