Jeremia 8 - ÎVUKU RÎA ÛVORO MWARO

¹ Ngai-Mûnene arauga atîrî, “Vîndî îo mavîndî ma athamaki a Juda, mavîndî ma anene, mavîndî ma athînjîri-Ngai, mavîndî ma arathi na mavîndî ma atûûri a Jerusalemu nîmakaarutwa mbîîrîrarî ciao.

² Nîmakaanyagarûkua riûarî, mwerirî, na njatarî, irîa mendete na maaitungatagîra, irîa marûmîrîrîte na makagooca. Mavîndî mau matigacokanîrîrua kana mathikwa, makethîrwa mekariî ta mai marî îgûrû rîa nthî.

³ Andû arîa maatigarire a rûrîrî rûrû rwaganu, arîa matûûraga kûrîa namanyaganirie nîmakerirîria gûkua gûkîra gûtûûra mwoyo, ûguo nîguo Ngai-Mûnene, mwene vinya wonthe arauga.”

Mevia na Îvera

⁴ Ngai-Mûnene ambîrire mbîîre andû ake atîrî, “Rîrîa arûme magwa, kinthî matiûkagîra rîngî? Mûndû angîvîtia njîra, kinthî tîkwa agarûrûkaga?

⁵ Nî ndûî kîgiragia andû aya magarûrûka, rîrîa mavîtia mararega kûgarûrûka nîkî? Marûmagîrîra ngai cia mivuanano, makarega kûnjokerera.

⁶ Mbîthîrîtwe nthikîrîrîtie waro, nwatî matiaragia ûvoro wa ma. Gûtirî mûndû wanarî ûmwe wîriraga nîûndû wa waganu wake; na eyûrie atî, ‘Mbîkîte atîa?’ Wa mûndû athiîcaga njîra yake ke mwene, ta mbarathi îvinyûrîte mbaararî.

⁷ Wana nginya mvûngû nîciîcî mavinda mau, ndutuura, nthûngûrûrû na Njûmbaine nî imenyaga mavinda ma gûcoka, nwatî andû akwa matiîcî mawatho ma Ngai-Mûnene.

⁸ Mûngîvota atîa kuga, ‘Tûrî aûgî, na nîtûrûmagîrîra watho wa Ngai-Mûnene,’ nwatî taroriani mawatho nîmagarûre nî andîki maarûa, matarî evokeku nîmagarûrîte watho wakwa.

⁹ Andû arîa aûgî nîmagaconorithua, nîmakavîngwa na magwatwe. Nîmaregete ciugo cia Ngai-Mûnene; nî ûûgî ûrîkû marî naguo?

¹⁰ Kwoguo nîngaavecana aka ao kûrî andû engî, mvecane mîgûnda yao kûrî andû engî. Nîûndû kuuma ûrîa mûnini nginya ûrîa mûnene, onthe macaragia indo na njîra îrîa îtarî ya ma. Kuuma kûrî arathi kûthiî kûrî athînjîri-Ngai, onthe mekaga maûndû ma maveeni.

¹¹ Mavonetie ironda cia andû akwa îgûrû, makiugaga, ‘Kûrî na thayû,’ rîrîa gûtarî na thayû.

¹² Nîmaaconokire rîrîa mekire maûndû marî mûgiro? Naarî mûtiaconoka wanarî vanini, kana megua nthoni, kwoguo makaagwa wata ûrîa acio engî maagwîre, rîrîa ngaamaverithia nîmakaathira.” Ûguo nîguo Ngai-Mûnene arauga.

¹³ Ngai-Mûnene arauga atîrî, “Nendaga gûcokanîrîria andû akwa vamwe, ta ûrîa mûrîmi acokanagîrîria maketha make, mekariî ta mîthavibu îtarî na thavibu, kana ta mîkûyû îtarî na ngûû; na mathangû mayo marî maûmû, wana kîrîa kîonthe namaveete nîkîaûrire.”

¹⁴ “Twîkarîte wa ûguo nîkî? Tûgomane vamwe tûthiî matûûrarî marîa mairigîre tûgakuîre kuo. Nîûndû Ngai-Mûnene Ngai wetû nîatûtuîrîrîte gûkuîra kuo, na nîatûvete manjî marî na ûrogi tûnyue, nîûndû nîtûmûvîtîrîtie.

¹⁵ Twerîgîrîre thayû nwatî gûtirî wega twonire, tûkîrîgîrîra îvinda rîa ûvonia nwatî twonire kîmako.

¹⁶ Nîtûregua mbarathi ciao ikîgamba irî Dani, mûgambo wa mbarathi ciao cia njamba, ûratûma vûrûri wonthe ûthingitha. Nthû ciûkîte gûcûkangia vûrûri wetû na indo cionthe irîa irî kuo, gûcûkangia îtûûra na andû arîa matûûraga kuo.”

¹⁷ Ngai-Mûnene arauga atîrî, “Taroria nînîratûma njoka gatagatîrî kenyu, njoka irî na ûrogi itangîrogeka na nîikaamûrûma.”

Jeremia nîwacakaîre andû ake

¹⁸ Nîrî na kîeva gîtangîthira, nîrî mûrwaru ngoro.

¹⁹ Tathikîrîria kîrîro Kîam andû akwa kuuma mîena yonthe ya vûrûrirî, “Anga Ngai-Mûnene ndatûûraga Zayuni? Anga mûthamaki wa Zayuni ndarî kuo? Nîndûî kîratûma mandakarie makîgooca ngai cia mîvuanano, wana magooce ngai ciao ng'eni?

²⁰ Maketha nîmathiru na îvinda rîa riûa rîkathira, na tûtirî avonokie.”

²¹ Andû akwa marî ativie wananie nîrî mûtivie ngoro, nîracakaya na ngathirwa nî vinya viû.

²² Nîkwa Gileadi gûtarî mûndû mûgo? Nîkwa kûu gûtarî ndagîtarî? Nîndûî vi kîgirîtie andû akwa mavona?