Jeremia 7 - ÎVUKU RÎA ÛVORO MWARO

Jeremia nîwavunjirie hekarûrî

¹ Ngai-Mûnene nîwathire Jeremia athiî arûngame

² mûrangorî wa hekarû ya Ngai-Mûnene na anîrîre ndûmîrîri îno auge atîrî, “Thikîrîriani ndûmîrîri ya Ngai-Mûnene mue arîa mûtonyaga gûkû hekarûrî kûgooca Ngai-Mûnene.

³ Ngai-Mûnene mwene vinya wonthe, Ngai wa Isiraeli arauga atî mûrûngarie mîthiîre yenyu na ciîko cienyu, na nîngûmwîtîkîria mûthiî na mbere gûtûûra vûrûrirî ûyû.

⁴ Mûtikevoke ciugo ino cia maveeni: ‘Îno nî hekarû ya Ngai-Mûnene, îno nî hekarû ya Ngai-Mûnene, îno nî hekarû ya Ngai-Mûnene.’

⁵ “Rûngariani mîthiîre yenyu na ciîko cienyu na mwîkage maûndû ma kîvooto, kûrî mûndû na mûndû ûrîa wîngî.

⁶ Tigani kûvinyîrîria ageni, ciana cia ngoriai na aka a ndigwa, kana mûrage mûndû mûthingu gûkû vûrûrirî ûyû, wana mûtige gûtungatîra ngai ciîngî nîûndû kûu nîgwîcûkangagia.

⁷ Nîûndû mweka ûguo nîngûmwîtîkîria gûtûûra vûrûrirî ûyû, ûrîa naveere methe menyu matûûre kuo tene na tene.

⁸ “Taroriani, mûtûûraga mwîtîkîtie ciugo cia maveeni.

⁹ Nî mwîaga, mûkaûragana, mûkatharia, mûkarutîra Baali magongoona na mûkagooca Ngai irîa mûtaicî.

¹⁰ Mûcokaga mûgaûka na mûkarûngama mbere yakwa, hekarûrî îno îtanîtue na rîîtwa rîakwa na mûkauga atî, ‘Tûrî agitîre.’ Na mûgacoka mûkathiî na mbere gwîka maûndû marîa nthûrîte.

¹¹ Nîkwa hekarû îno îtanîtue na rîîtwa rîakwa, îrî ngurunga ya acunani? Menyani atî nîmenyete ciîko cienyu cionthe.

¹² Thiîni wa rîu Shilo, kûrîa nathuurîte mbererî ngocagîrwe kuo na mwone ûrîa nagûcûkangirie nîûndû wa waganu wa andû akwa a Isiraeli.

¹³ Mue nîmwîkîte maûndû mama monthe, na mavinda meengî na namwarîrie na mûkîrega kûmbîgua, na namwîta mûkîrega kûmbîtîka.

¹⁴ Kwoguo, nîmbîka hekarû yakwa îrîa mwîvokete na kûndû gûkû naveere methe menyu ta ûrîa nekire Shilo.

¹⁵ Nîmwîngata mume mbere yakwa wata ûrîa nengatire andû enyu onthe, njiarwa cia Efiraimu.”

Ûremi wa andû

¹⁶ Ngai-Mûnene augîte atîrî, “We Jeremia, ndûkavoere andû aya, kana ûrîre ûkînthaitha nîûndû wa andû aya, nîûndû tîngûthikîrîria.

¹⁷ Nîkwa ûtarona ûrîa mareka matûûrarî ma Juda na ma Jerusalemu?

¹⁸ Ciana ciunaga ngû, methe magakia mwaki, nao aa ng'ina magakanda mûtu wa kûruga mîgate ya ngai ya mûndûmûka îrîa metaga mûthamaki mûndûmûka wa îgûrû. Marutagîra ngai ciîngî matega ma ndivei, nîguo matûme ndakare.

¹⁹ Nama, nînie mararakaria? Naarî, nî o ene marerakaria na makeretera gîconoko.

²⁰ Kwoguo nie Mwathani Ngai nîrauga atî: rîu nîngwîtûrûra marakara makwa manene gûkû na makinyîre andû na nyamû cia kîthaka mîtî na mîmera yonthe ya nthî. Marakara makwa magaakana ta mwaki ûtangîvoreka.”

²¹ Ngai-Mûnene mwene vinya wonthe, Ngai wa Isiraeli arauga atîrî, “Ongererani matega menyu ma kûvîvua kûrî magongoona marîa menyu mûrîe nyama ciamo.

²² Nîûndû vîndî îrîa narutire methe menyu Misiri, ndiamera ûndû kana nîmava watho wîgiî matega na magongoona ma kûvîvua.

²³ Nwatî namaveere watho ngîmeera, ‘Athîkagîrani mûgambo wakwa, nîngûtuîka Ngai wenyu na mûtuîke andû akwa, na mûrûmagîrîre maûndû marîa ngûmwatha, nîguo maûndû menyu mavue.’

²⁴ Nwatî matiambathîkîra kana manthikîrîria. Vandû va ûguo, marûmîrîre meciria na ûremi wa ngoro ciao, na magîcoka na vuva vandû va kûthiî na mbere.

²⁵ Kuuma mûthenya ûrîa methe menyu maumire Misiri nginya ûmûnthî, ndwîre ndûmaga arathi, ndungata ciakwa kûrî o.

²⁶ Nwatî mûtianthikîrîria kana mûmbîgua, nwatî nîmwaûmirie ciongo, na mûgîtuîka aregi gûkîra methe menyu.

²⁷ “Kwoguo we Jeremia, îra andû akwa maûndû mama monthe, nwatî tîmakûthikîrîria. We nîûkameta, nwatî matigagwîtîka.

²⁸ Nawe ûkamera atî, ‘Rûrû nî rûrîrî rûrîa rwaregire kwathîkîra mûgambo wa Ngai-Mûnene Ngai wao, na rûkîrega kûrûngwa nîke. Ûûma nîwathirire kûrî o, wana matiaragia ûvoro waguo.’

Wîvia ûrîa wekirwe Kîandarî kîa Hinomu

²⁹ “Mue andû a Jerusalemu, enjani njuîrî cienyu na mûite, cakayani mûrî tûthûrûmûndûrî twa irîma, nîûndû nie Ngai-Mûnene nîrîmûrakaru nîmue, nînîmûregete na ngamûtiganîria.

³⁰ “Andû a Juda nîmekîte maûndû macûku mbere yakwa, nîmekîrîte mîvuanano hekarûrî yakwa na magatûma îgwatwa nî mûgiro.

³¹ Nîmatumîte metha cia magongoona ciîtagwa ‘Tofethi’ kûu Kîamndarî Kîam Hinomu, nîguo marutîre ciana ciao cia anake na erîtu kuo irî matega ma kûvîvua. Nie ndiamatha meke ûguo, na ûndû ta ûcio ndwanagîa meciriarî makwa.

³² Kwoguo vîndî nîgaakinya rîrîa matakaveta ‘Tofethi’, kana Kîamnda Kîam Hinomu, nwatî vagetagwa Kîamnda gîa kûûraganîrwa. Kûu nîkuo gûkathikagwa andû nîûndû gûtikethîrwa kûrî na vandû vengî va kûthikana.

³³ Ciimba cia andû aya ikaarîwa nî iconi cia rîerarî na nyamû cia kîthaka na gûtirî mûndû ûkaimakia.

³⁴ Na kûu matûûrarî ma Juda na tûcîrarî twa Jerusalemu nîngatûma gûtikegue mûgambo wa kûthekania na wa gîkeno, mûgambo wa mûviki na mûvikania, nîûndû vûrûri wonthe ûgatwîka îganjo.”