Jeremia 52 - ÎVUKU RÎA ÛVORO MWARO

Kûgwa kwa Jerusalemu

¹ Zedekia aatuîkire mûthamaki arî na ûkûrû wa mîaka mîrongo îîrî na ûmwe (21) na nîwathanire arî Jerusalemu mîaka îkûmi na ûmwe. Ng'ina etagwa Hamutali mwarî wa Jeremia wa kuuma Libuna.

² Nake Zedekia nîwekire maûndû macûku marîa matakenagia Ngai-Mûnene, wata marîa mekîtwe nî mûthamaki Jehoiakimu.

³ Nake Ngai-Mûnene nîwarakarire mûno nîûndû wa andû a Jerusalemu na a Juda nginya akîmengata maume vakuvî nake. Nake Zedekia nîwareganire na Nebukadinezarû, mûthamaki wa Babuloni.

⁴ Kwoguo, mûthenya wa îkûmi wa mweri wa îkûmi mwaka wa kenda wa ûthamaki wa Zedekia, mûthamaki Nebukadinezarû nîwathiîre na athigari ake onthe a mbaara akîtharîkîra îtûûra rîa Jerusalemu, na makîrîthiûrûkîria na mîena yonthe.

⁵ Narîo îtûûra rîu rîekarire rîthiûrûrûkîrîtue nginya mwaka wa îkûmi na ûmwe wa ûthamaki wa Zedekia.

⁶ Na mûthenya wa kenda wa mweri wa kana, yûra nîrîacacire mûno îtûûrarî rîu, atî gûtiarî kîndû andû akuo mangîarîre.

⁷ Kwoguo rûthingo rwa îtûûra nîrwatûrîkirue, nao athigari a mbaara makiuma îtûûrarî rîu ûtukû, makîûra. Nao mavîtûkîrîre mûgûndarî kwa mûthamaki na makîthiî makiumîrîra kîvingorî kîrîa Kîamrî gatagatî ka nthingo irîa igîrî. Maathiîre maroretie mwena wa werû wa Araba.

⁸ Nwatî athigari a Babulonia nîmaavinyûrire makîrûmîrîria mûthamaki Zedekia, na makîmûkinyîrîra kûndû kûrîa kwaraganu vakuvî na rûnjî rwa Jeriko, nao athigari ake onthe nîmaamûtiganîrie makîûra.

⁹ Nao athigari a mbaara a Babulonia nîmaagwatire mûthamaki Zedekia, na makîmûvira kûrî mûthamaki Nebukadinezarû ûrîa warî îtûûrarî rîa Ribula rîrîa rîrî mûringo wa Hamathi, na akîmûtuîra ciira.

¹⁰ Nake mûthamaki wa Babuloni nîwaûragire ciana cia Zedekia mbere ya îthe wao, wana akîûragithia anene onthe a Juda.

¹¹ Nîwacokire agîkûûra Zedekia metho na akîmwova na mvîngû na akîmûvira Babulonia. Nake Zedekia nîwekarire kûu Babuloni arî mwove nginya rîrîa akuire.

Gûcûkangua gwa hekarû

¹² Mûthenya wa îkûmi wa mweri wa gatano, mwaka wa îkûmi na kenda wa wathani wa Nebukadinezarû mûthamaki wa Babuloni, Nebuzaradani mûnene wa athigari ake a mbaara ûrîa watungataga mûthamaki nîwathiîre Jerusalemu.

¹³ Nake nîwavîvirie hekarû, nyomba ya mûthamaki na nyomba cionthe cia andû a vata kûu Jerusalemu.

¹⁴ Nao athigari ake a Akalidei nîmomorire nthingo cionthe cia îtûûra rîa Jerusalemu.

¹⁵ Nebuzaradani mûnene wa arangîri nîwatavire andû onthe arîa maatigarîte kûu îtûûrarî, athîni wana andû onthe arîa maûrîte makathiî mwena wa Babuloni vamwe na mafundi.

¹⁶ Nwatî Nebuzaradani mûnene wa arangîri a mûthamaki nîwatigire andû amwe arîa maarî athîni mûno matuîke a kûmenyagîrîra mîthavibu na a kûrîma.

¹⁷ Nao andû a Babuloni nîmaaunangire itugî cia gîcango cia hekarû, ikaari cia gîcango irîa ciarî hekarûrî, na magîkuua gîcango kîu kîonthe magîkîvira Babuloni.

¹⁸ Wana nîmaakuire nyûngû, iciko cia mûthetu, tûnyamû twa kûnyitîrîra ndambi cia taa, mbakûri cia gwîkîra ûbani na indo cionthe cia gîcango irîa ciatûmagîrwa hekarûrî.

¹⁹ Nîmaakuire tûbakûri tûnini, ngîo cia gûkuua mwaki, mbakûri, nyûngû, vandû va kwigîrîrwa taa, mbakûri cia kûvîvîria ûbani na mbakûri cia magongoona ma gwîtûrûra ndivei. Mûnene wa arangîri nîwakuire indo irîa ciarî cia thaavu na sîlûva.

²⁰ Îgûrû rîgiî itugî icio ciîrî, îtangi rîa gîcango rîrîa rînene na ndegwa îkûmi na igîrî irîa ciarînyitîrîrîte, ikaari cia gîcango; gîcango Kîam indo icio cionthe yarî ndito mûno.

²¹ Wa gîtugî Kîamrî na ûraca wa mita inyanya (8), na mûthiûrûrûko wakîo warî mita ithano na cendimita mîrongo îîrî na ithano (5.25) na ûtungu wakîo warî wa milimita mîrongo mûgwanja na ithano (75) na cionthe ciarî na îrima ndaarî.

²² Îgûrû rîa wa gîtugî, kwarî na kîongo gîa gîcango; ûraca wa kîongo kîmwe warî mita igîrî na cendimita mîrongo îîrî (2.20). Wa kîongo Kîamrigicîrîtue na neti ya ngûngûmanga, na cionthe ciarî cia gîcango. Gîtugî gîa kaîrî gîekariî wa ûguo.

²³ Kwarî na ngûngûmanga mîrongo kenda na ithathatû mîenarî ya itugî icio na mwîgana wa ngûngûmanga cionthe warî îgana rîmwe irî ng'emie.

Andû a Juda nîmaavirirwe Babuloni

²⁴ Nake Nebuzaradani, mûnene wa arangîri nîwanyitire Seraia Mûthînjîri-Ngai, Mûnene wa athînjîri-Ngai, na Zefania ûrîa warî mûnini wake, na arangîri engî athatû.

²⁵ Na kûu îtûûrarî nîwanyitire mûnene wa athigari a mbaara na andû mûgwanja arîa mataaraga mûthamaki maarî wa kûu îtûûrarî. Wana nîwanyitire karani ka mûnene wa athigari ûrîa wamenyagîrîra mavuku marîa mandîkîtwe rûgano rwa athigari a mbaara, na andû engî mîrongo îtandatû arîa maarî kûu îtûûrarî.

²⁶ Nake Nebuzaradani mûnene wa arangîri nîwamavirire kûrî mûthamaki wa Babuloni ûrîa warî îtûûrarî rîa Ribula.

²⁷ Nake Nebukadinezarû mûthamaki wa Babuloni nîwamarivire na akîmaûragîra îtûûrarî rîa Ribula vûrûrirî wa Hamathi. Ûguo nîguo andû a Juda maatavirwe na makîthamua kuuma vûrûrirî wao.

²⁸ Ûyû nîguo mwîgana wa andû arîa Nebukadinezarû aatavire: Mwaka wa mûgwanja wa wathani wake aatavire Ayahudi ngiri îthatû na mîrongo îrî na athatû (3,023);

²⁹ mwaka wa îkûmi na înana wa wathani wake nîwatavire Ayahudi magana manana ma mîrongo îthatû na aîrî (832) kuuma Jerusalemu.

³⁰ Mwaka wa mîrongo îîrî na îthatû wa wathani wake, Nebuzaradani, mûnene wa arangîri nîwatavire andû magana mûgwanja na mîrongo îna na atano (745). Mwîgana wa andû onthe arîa maatavirwe maarî ngiri inya na magana matandatû (4,600).

³¹ Mwaka wa mîrongo îthatû na mûgwanja, tarîki mîrongo îîrî na ithano mweri wa îkûmi na îîrî, Jehoiakini arî mûthamaki wa Juda, Evilimerodaki nîwatuîkire mûthamaki wa Babuloni. Mwaka wa ûcio nîweguîrîre Jehoiakini ntha na akîmûrekereria akiuma njera.

³² Nake Evilimerodaki nîwekire Jehoiakini maûndû maro mûno na akîmûnenevia gûkîra athamaki arîa engî maarî nake kûu Babuloni.

³³ Kwoguo Jehoiakini nîwarutire nguo ciake cia njera, na agîtûûra arîcaga kwa mûthamaki.

³⁴ Na wa mûthenya wa mûthenya nîwavecagwa ûtethio wa kwîgana nî mûthamaki wa Babuloni nginya rîrîa akuire.