Jeremia 51 - ÎVUKU RÎA ÛVORO MWARO

Ngai-Mûnene nîarathiî na mbere gûtuîra Babuloni

¹ Ngai-Mûnene arauga atîrî, “Nîngûretera vûrûri wa Babuloni na andû a kuo, rûkûngi rûnene rwa kûmacûkangia.

² Nîngûtûma ageni magacûkangie Babulonia, ta ûrîa rûkûngi rûmbûraga macaki. Rîrîa kavinda ga gûûcûkangia gagaakinya, makaûtharîkîra na mîena yonthe maûtige ûtarî kîndû.

³ “Mûtikareke athigari a Babuloni matunga mota mao, kana mekîra nguo ciao cia mbaara. Mûtigacaîre anake a kuo, cûkangiani athigari onthe a mbaara a guo!

⁴ Nîmagaativangîrua njîrarî cia matûûra ma kuo, na makuîre vûrûrirî ûcio wa Akalidei.

⁵ Nîûndû nie Ngai-Mûnene mwene vinya wonthe, ndirî mûtiganîriu andû a Isiraeli na a Juda, wana ethîrwa vûrûri wao na wa Akalidei nîûvîtîrîtie Ûrîa Mûtheru wa Isiraeli.

⁶ Ûrani mume Babuloni mûvonokie mîoyo yenyu! Babuloni îraverithua nîûndû wa mavîtia mayo, nîûndû gaka nîko kavinda ka Ngai-Mûnene ga kwîrîvîrîria, araverithia Babuloni kûringana na mavîtia mayo.

⁷ Babuloni yekariî ta gîkombe Kîam thaavu, kîrî njararî cia Ngai-Mûnene, gîatûmaga nthî yonthe îrîwe; mavûrûri maanyunyaga ndivei kuuma kûrî kîo makauma ngoma.

⁸ Babuloni nîûgwîte wa rîmwe na ûkavootwa; ûcakaîreni! Carîriani ironda ciaguo ndawa, nwa kwîthîrwa nîûkûvona.

⁹ Nîtwageririe kûvonia vûrûri wa Babuloni nwatî ndwavona. Tûûtiganîrie tûthiî wa mûndû vûrûrirî wake; nîûndû Ngai nîaverithîtie vûrûri wa Babuloni na vinya wake mûnene; na agaûcûkangia viû.

¹⁰ Ngai-Mûnene nîonanîtie atî tûtirî na mavîtia; tûthiîni Zayuni tûkanîrîre ûrîa Ngai-Mûnene Ngai wetû ekîte.

¹¹ Norani mîguî yenyu! Ocani ngo cienyu!” Ngai-Mûnene nîatûmîte athamaki a Media mavange kûtharîkîra vûrûri wa Babuloni nîûndû avangîte gûûcûkangia. Ûguo nîguo Ngai-Mûnene akwîrîvîrîria nîûndû wa kwanangwa kwa hekarû yake.

¹² Vecanani kîmenyithia Kîam mbaara, nthingo cia Babuloni itharîkîrwe. Ongererani athigari a kûrîrangîra, vangani arangîri, athigari a kûtharîkîra nîmethithe. Ngai-Mûnene nîavangîte na ageka ûrîa aaugire wîgiî atûûri a Babuloni.

¹³ Mue arîa mûtûûraga vûrûri ûrî nyûnjî nyîngî, vûrûri ûrî ûtonga mwîngî, îvinda rîenyu nîrîkinyu, ûtûûro wenyu nîmûkinyu mûthiia.

¹⁴ Ngai-Mûnene mwene vinya wonthe nîevîtîte ke mwene akauga atîrî, “Nama nîngûrete athigari eengî ta ngige makûtharîkîre, na nîmakaugîrîria na vinya nîûndû wa ûrîa mavootanîte.”

Rwîmbo rwa Gûkumia Ngai

¹⁵ Ngai-Mûnene nîke watûmire nthî îgîe kuo na ûûgî wake; nîke watûmire nthî îkindîrie na vinya wake, na agîtambûrûkia matu na ûmenyo wake.

¹⁶ Rîrîa aruta mûgambo, manjî marîa marî îgûrû nîmarurumaga; nîke ûtûmaga matu maume mîena yonthe ya nthî. Atûmaga kûgîe mveni vîndî ya mbura, na agatûma rûvuvo ruume makûmbîrî make.

¹⁷ Mûndû wa wonthe nî mûritu na ndarî ûmenyo, mûturi wa indo cia thaavu aconorithagua nî indo ciake; nîûndû mîvuanano îo arûthaga tî ya ma, na ndîrî mwoyo.

¹⁸ Mîvuanano îo nî ya mana, na nî ûthani mûtheri; vîndî îrîa makaverithua nîgaacûkangua.

¹⁹ Ngai wa Jakovu ndavana ta cio; nîûndû nîke waûmbire indo cionthe, na akîthuura mûvîrîga wa Isiraeli ûtuîke andû ake kîûmbe. Ngai-Mûnene mwene vinya wonthe nîrîo rîîtwa rîake.

Mûthiia wa Babuloni

²⁰ Ngai-Mûnene arauga atîrî, “We Babuloni nîwe nyondo na indo ciakwa cia mbaara, nîwe ndûmagîra kwananga mothamaki.

²¹ Nîwe ndûmagîra kunanga mbarathi na arîa mathiîcaga maciîkarîrîte, na kunanga ikaari cia mbarathi na arîa maitwarithagia.

²² Nîwe ndûmagîra kûraga arûme na aka, andû arîa akûrû na arîa ethî, wana tûvîcî na twîrîtu.

²³ Nîwe ndûmagîra kûûraga arîthi na ndîthia ciao, arîa marîmaga na mîraû vamwe na ng'ome ciao, wana athani na anene.”

Babuloni nîyaverithirue

²⁴ Ngai-Mûnene arauga atîrî, “Nîngaverithia Babuloni na andû a kuo mue ene mûkîonaga, nîûndû wa maûndû macûku marîa mekire îtûûrarî rîa Jerusalemu.

²⁵ Babuloni nîngûrûa nawe we kîrîma kîrîa gîcûkangagia, we ûcûkangagia nthî yonthe. Nîngûtambûrûkia njara yakwa ngûnyite, nîngûgaragaria kuuma mathigarî îgûrû, na ngûtue kîrîma kîvîvie na mwaki.

²⁶ Gûtirî îthiga wana rîmwe rîaku rîgacoka gûtuma rîngî, gûtirî îthiga rîgoocwa rîtume mûcingi! Nwatî ûgatûûra ûrî werû tene na tene. Ûguo nîguo Ngai-Mûnene arauga.

²⁷ “Vandani vendera ya mbaara gûkû nthî, vuvani karumbeta mavûrûrirî; varîriani mavûrûri nîguo marûe mbaara nake. Îtani mothamaki ma Ararati, Mini na Ashikenazi maûke maûtharîkîre. Thuurani njamba ya kûrûa nake; rîretereni mbarathi ta ikundi cia ngige.

²⁸ Varîriani mavûrûri marûe na Babuloni, varîriani athamaki a Media vamwe na anene na anini ao, na mûvarîrie ndûrîrî cionthe irîa irî rungu rwa wathani wake.

²⁹ Nthî nîîratetema na îkainaina nîûndû wa ûrûrû, nîûndû ûrîa Ngai-Mûnene avangîte gwîka Babuloni nwa nginya eke, atûme vûrûri wa Babuloni ûtuîke werû, kûndû gûtatûûragwa nî andû.

³⁰ Athigari a Babuloni nîmatigîte kûrûa, mekarîte nyombarî ciao cia kwîgitîra; vinya wao nîmûthiru na marî na guoya ta aka. Nyomba ciao nî mvîvie na mwaki, na mîrango yao îkaunangwa.

³¹ Anjaama maumanaga vuva mavinyûrîte, makamenyithie mûthamaki wa Babuloni, atî îtûûra rîake nîrîgwate rîonthe.

³² Mariûko nîmagwate, nyomba cia kwîgitîra nî mvîvie na mwaki, nao athigari makanyitwa nî kîmako.”

³³ Ngai-Mûnene mwene vinya wonthe, Ngai wa Isiraeli arauga atîrî, “Babuloni îrangîtwe îgekara ta îtîri rîa kûvûrîra ngano, vîndî îrîa rîravarîrîrua. Nwatî vuva wa kavinda kanini, îvinda rîake rîa gûkethwa nîrîgakinya.”

³⁴ Nebukadinezarû mûthamaki wa Babuloni nîacûkangîtie Jerusalemu na agakwananga. Agûtigîte gwîkariî ta nyûngû îtarî na kîndû, akûmeretie ta njûnamatu. Eyocerete kîrîa kîonthe akwenda, agacoka agata indo icio ciîngî.

³⁵ Andû a Jerusalemu nîmauge atîrî, “Babuloni îrocokererwa nî maûndû monthe macûku marîa twîkîtwe! Atûûri a Jerusalemu nîmauge atîrî, “Nthakame yakwa îrocokerera atûûri a Babuloni.”

Ngai-Mûnene nîagûtethia andû a Isiraeli

³⁶ Kwoguo Ngai-Mûnene arauga atîrî, “Nîngûmwarîrîria na nîmûrîvîrîrie kûrî nthû cienyu; nî ngûmia varîa manjî ma Babuloni maumaga, na ndûme ithima ciake ivwe.

³⁷ Vûrûri wa Babuloni nîûtuîka maganjo; ûgaatuîka kûndû gwa gûtûûrwa nî mbwe, nîgûtuîka kîmako na kûndû gwa kûnyararûa, kûndû gûtatûûragwa nî andû.

³⁸ Andû a Babuloni makararamaga ta mînyambû; makagambaga ta twana twa mûnyambû.

³⁹ Wana marakarîte ûguo, nîngûmarûthîra kîrugo, nînîmava ndivei nginya marîwe na mamame, macoke mamame toro matagaûkîra rî kana rî.” Nînie Ngai-Mûnene nauga ûguo.

⁴⁰ “Nîngamavira kîthînjîro ta ng'ondu kana nthenge. Nînie Ngai-Mûnene nauga ûguo.”

Mûthiia wa Îtûûra rîa Babuloni

⁴¹ “Taroria îtûûra rîrîa rîatûûraga rîkumagua nî nthî yonthe nîrînyite! Rîtuîkîte kîmako gatagatî ka mavûrûri!

⁴² Îtûûra rîa Babuloni nîrîkunîkanie nî îria, nîrîkunîkanie nî makûmbî ma manjî maunjugûku.

⁴³ Matûûra ma Babuloni matuîkîte kîmako, vûrûri mûmagaru na werû, kûndû gûtatûûragwa nî andû, na kûndû gûtavîtûkagîrîrwa nî andû.

⁴⁴ Nîngaverithia Beli ngai ya Babuloni, na ndûme îrute kîrîa îmeretie; mavûrûri matikaathiî kûrî ke rîngî. Rûthingo rwa Babuloni nîrwomomoku.

⁴⁵ “Andû akwa umani vakuvî nake! Wa mûndû athare mwoyo wake kuuma kûrî marakara manene ma Ngai-Mûnene.

⁴⁶ Mûtigakue ngoro kana mwîgue guoya, nîûndû wa ndeto îtarî na mûkinyo irîa mûregua gûkû vûrûrirî. Wa mwaka ûrî na ndeto itarî mûkinyo; ndeto cia mbaara vûrûrirî, mûthamaki ûmwe akîrûa na ûrîa wîngî.

⁴⁷ Kwoguo îvinda nîrîgûkinya, rîrîa ngananga mîvuanano ya Babuloni, vûrûri wa Babuloni wonthe ûconorithue, nao andû onthe a Babuloni maûragîrwe vûrûrirî wao.

⁴⁸ Narîo îgûrû na nthî na indo cionthe irîa irî kuo, nîikaaina icanjamûkîte nîûndû wa Babuloni; nîûndû andû a gûûcûkangia nîmagaûka maumîte mwena wa rûgûrû. Ûguo nîguo nie Ngai-Mûnene nîrauga.

⁴⁹ Vûrûri wa Babuloni nwa nginya ûgwe, nîûndû wa kûraga andû a Isiraeli eengî mûno, na gûtirî vandû ûtaûraganîte nthî yonthe.”

Ndûmîrîri ya Ngai kûrî Aisiraeli arîa marî Babuloni

⁵⁰ Ngai-Mûnene arera andû ake arîa marî Babuloni atîrî, “Mue arîa mûtigarîte mûtarî aûrage thiîni, mûtigekare ava! Ririkanani Ngai-Mûnene wana ethîrwa mûrî vûrûrirî wa kûraca, na mûririkane îtûûra rîa Jerusalemu.

⁵¹ Mugaga atî: ‘Nîtûconorithîtue na tûkamenererua; twîcûrîtwe nî gîconoko, nîûndû ageni nîmatonyete kûndû kûrîa kûtheru nyombarî ya Ngai-Mûnene.’ ”

⁵² Kwoguo nie Ngai-Mûnene nîrauga atîrî, “Kavinda nîgagûkinya rîrîa ngacûkangia mîvuanano ya Babuloni, naguo vûrûri wonthe wîcûre mûcao wa andû arîa mativangîtue.

⁵³ Wana ethîrwa Babuloni nîîkunûkia na îgûrû, na îtume nyomba cia kwîgitîra ndaca na îgûrû; nîngaatûma andû a kûrîcûkangia. Nie Ngai-Mûnene nînie nauga ûguo.”

Babuloni nîyathiîre na mbere gûcûkangua

⁵⁴ Ngai-Mûnene arauga atîrî, “Tathikîrîriani kîrîro kuuma Babuloni, kuuma vûrûrirî wa Akalidei!

⁵⁵ Nîûndû nîracûkangia îtûûra rîa Babuloni viû, na nthirie mûgambo wake mûnene. Athigari a mbaara mararuruma ta makûmbî ma manjî meengî, na înegene rîa mûgambo wao nîrîrongerereka.

⁵⁶ Nthû nîciûkîte gûcûkangia Babuloni; athigari a kuo nîanyite; moota mao nîmaunange, nîûndû nie Ngai-Mûnene nî Ngai ûverithanagia, nwa nginya nîîrîvîrîrie.

⁵⁷ Nîngûtûma anene na andû arîa aûgî akuo marîwe nî njovi; wa vamwe na athani athigari a mbaara na atongoria ao, onthe makamama toro matagaûkîra tene na tene. Ûguo nîguo nie Mûthamaki ûrîa wîtagwa Ngai-Mûnene mwene vinya wonthe nauga.”

⁵⁸ Nie Ngai-Mûnene mwene vinya wonthe nîrauga atîrî, “Rûthingo rwariî rwa Babuloni nîrûkomomorwa rûvaraganue viû, na mîrango yakuo mîraca nîîkavîvua na mwaki. Andû marutaga wîra wa mana, mavûrûri marenogia mana na mûthiiarî makavîvua na mwaki!”

Ndûmîrîri ya Jeremia nîyavirirwe Babuloni.

⁵⁹ Mwaka wa kana wa wathani wake, Zedekia mûthamaki wa Juda nîwathiîre Babuloni vamwe na mûnene wa athigari ake wîtagwa Seraia mûvîcî wa Neria. Neria aarî mûvîcî wa Mahaseia. Nie Jeremia nînagîre na kanya ga kwîra Seraia ndûmîrîri îno.

⁶⁰ Nînandîkire îvukuurî maûndû macûku marîa mavatiî gûkinyîra Babuloni na maûndû mengî megiî Babuloni.

⁶¹ Nie Jeremia nînerire Seraia atîrî, “Rîrîa ûkaathiî Babuloni, ûkaathomera andû ndûmîrîri îno,

⁶² na uge atî, ‘Ngai-Mûnene, we mwene nîwe uugîte nîûgûcûkangia kûndû gûkû, nîguo gûtikanacoke gûtûrwa nî andû rîngî wana kana nyamû, nwatî gûgatuîka werû tene na tene.’

⁶³ Warîkia kûthoma îvuku rîîrî, rîoverere îthiga na ûrikie rûnjîrî rwa Farati gatagatî,

⁶⁴ na uge atîrî, ‘Ûguo nîguo vûrûri wa Babuloni ûkaavorokera na ndûgaacoka kuumîra rîngî nîûndû wa mûthiro ûrîa nie Ngai-Mûnene ngûûretera.’ ” Ûyû nîguo mûthiia wa ciugo cia Jeremia.