Jeremia 50 - ÎVUKU RÎA ÛVORO MWARO

Îtûûra rîa Babuloni nîrîanyitirwe

¹ Ûvoro wîgiî Babuloni na vûrûri wa Akalidei, Ngai-Mûnene nîwaririe na mûrathi Jeremia akiuga atîrî,

² “Anîrîrani mavûrûrirî, îkîrani imenyithia na mwanîrîre, mûtikathithe wanarî ûndû; ugani atî: ‘Îtûûra rîa Babuloni nîrînyite! Beli ngai yarîo nînjonorithie, Merodaki ngai yarîo nîmbagagu; Mîvuanano ya ngai cia Babuloni nîmîconorithie.’

³ “Nîûndû vûrûri kuuma mwena wa rûgûrû nîûkîte kûtharîkîra vûrûri wa Babuloni, na ûûtue maganjo. Gûtirî mûndû ûgaûtûûra, andû nîmakaaûra wana nyamû ciume kuo.”

Gûcoka kwa andû a Isiraeli

⁴ Ngai-Mûnene arauga atîrî, “Îvinda rîu rîakinya, andû a Isiraeli na Juda nîmakaagomana vamwe makîrîraga, makînjaragia nie Ngai-Mûnene, Ngai wao.

⁵ Nîmakaûrîrîria njîra ya kûthiî Zayuni, merekerete kuo makiugaga, ‘Ûkani tûrûthe kîrîkanîro na Ngai-Mûnene kîrîa gîtakaariganîra.’

⁶ “Andû akwa mekariî ta ng'ondu ciûrîte, ivîtithîtue njîra nî arîthi ikerekera irîmarî. Maraûrûra kuuma kîrîma kîmwe nginya kîrîa kîngî, nginya makariganîrwa nî kûrîa maumîte.

⁷ Arîa onthe macemanagia nao, nî mamatharîkagîra. Nthû ciao ciugaga atî, ‘Tûtirî na mavîtia. O nîkwa mevîrîtie Ngai-Mûnene, ûrîa arî ke ûtûûro wao na methe mao maatwîre mevokete.’

⁸ “Andû a Isiraeli, îthareni mume Babuloni! Umani vûrûrirî ûcio wa Akalidei, na mwîkare ta nthenge irî mbere ya mbûri.

⁹ Nîngûthagathaga mavûrûri manene kuuma mwena wa rûgûrû nîguo matharîkîre Babuloni. Nîmaûka mavange ûrîa makûtharîkîra Babuloni na mamîtave. Mîguî yao nî ta ya athigari njamba arîa matavîtagia.

¹⁰ Vûrûri wa Akalidei nîûgatavwa na arîa magaûtava nîmagooca wa kîrîa kîonthe makenda. Nie Ngai-Mûnene nînie nauga ûguo.”

Kûgwa kwa Babuloni

¹¹ “Mue arîa mwatavire vûrûri wakwa! Wana ethîrwa nîmûrakena na mûgacanjamûka; mûrarûgarûga ta ng'ombe îkîvûûra ngano, na mûkaania ta mbarathi cia njamba.

¹² Îtûûra rîenyu rîrîa rînene nîrîgaconorithua na rîagithue gîtîîo. Vûrûri wa Babuloni ûgatuîka wa mûthiia gatagatî ka mavûrûri; ûgaatuîka werû kûndû kûmû na gûtarî andû.

¹³ Nîûndû wa ûrîa nie Ngai-Mûnene ndakarîte, gûtirî mûndû wanarî ûmwe ûgatûûraga Babuloni; îtûûra rîu nîrîcûkangua viû. Arîa onthe makavîtûkagîra vakuvî narîo nîmakaamaka, makamaka makiugaga, we! we! we! Nî ûrîa rîcûngangîtue.

¹⁴ “Mue arîa mûrûaga na mîguî, rigicîriani îtûûra rîa Babuloni mûrûe narîo; rîratheni na mûtigatigarie mûguî wanarî ûmwe nîûndû nîrîvîtîtie mbere ya Ngai-Mûnene.

¹⁵ Riugîrîrieni na mîena yonthe, îtûûra rîa Babuloni nîrîvecanîte; nthingo ciarîo nînyomomore. Nîûndû nie Ngai-Mûnene nîkwa nîrerîvîrîria, wana mue îrîvîrîrieni; mekeni wata ûrîa wanao meekire mavûrûri marîa mengî.

¹⁶ Mûtikareke andû mavande mbegû vûrûri ûcio wa Babuloni, wana kana makethe vîndî ya maketha. Mûgeni wa wonthe ûrî îtûûrarî rîu nîmûgwate nî guoya; na mûndû nîagaacoka vûrûrirî wake.”

Andû a Isiraeli nîmaacokire

¹⁷ Ngai-Mûnene arauga atîrî, “Andû a Isiraeli mekariî ta ng'ondu ivinyûrîtue na ikanyaganua nî mûnyambû. Maambire kûtharîkîrwa nî mûthamaki wa Asîria, magîcoka makîtharîkîrwa nî Nebukadinezarû mûthamaki wa Babuloni.

¹⁸ Nîûndû wa ûguo nie Ngai-Mûnene mwene vinya wonthe Ngai wa Isiraeli, nîngûverithia mûthamaki Nebukadinezarû na vûrûri wake, wata ûrîa naaverithirie mûthamaki wa Asîria.

¹⁹ Nîngatûma andû a Isiraeli vûrûrirî wao. Makarîcaga irio irîa ikûraga kîrîmarî gîa Karimeli na Bashani. Nao nîmakaarîa nginya meganie kîrîa kîonthe gîkûragua mwena wa Efiraimu na Gileadi.

²⁰ Rîrîa îvinda rîu rîgakinya, gûtirî wîvia kana waganu ûgekwa Isiraeli na Judea kuonthe, nîûndû nîngoovera andû arîa onthe maatigarire. Ûguo nîguo nie Ngai-Mûnene nauga.”

Ngai nîwatuîrîre Babuloni

²¹ Ngai-Mûnene arauga atîrî, “Unûkiani mûkatharîkîre andû a Merathaimu na Pekodi; maûrageni na mûcûkangie kîndû kîonthe marî nakîo. Îkani maûndû monthe marîa ngûmwatha.”

²² Mbu ya mbaara nîîreguua vûrûrirî, nî gûcûkangie mûno!

²³ Babuloni yekariî ta njokoma ya kûriva mavûrûri monthe ma nthî, nwatî rîu ndîrî na vinya nîûndû nîmunange! Mavûrûri monthe nîmamaku, nî ûrîa vûrûri ûcio wîkîtwe.

²⁴ We Babuloni, nagûtegire na ngîkûgwatia, na ndwamenya ûndû ûcio, nîwonekire na ûkîgwatwa, nîûndû nîwang'ang'anire na Ngai-Mûnene.

²⁵ Nîmvingûrîte kûrîa mbigaga indo cia mbaara, na nîirutîte kuo nîrî na marakara, nîûndû nie Ngai-Mûnene Mwene vinya wonthe, nîrî na wîra wa kûruta vûrûrirî wa Akalidei.

²⁶ Ûkani mûûtharîkîre na mîena yonthe; vingûrani makûmbî maguo; mwiganîrîreni vamwe ta irûndo cia ngano na ûmûcûkangie viû; mûtigatigarie wanarî kûndû.

²⁷ Ûragani athigari onthe arîa njamba; tigani manyûrûrûke mathiî kîthînjîro! Kaî andû a Babuloni marî thînarî-î, kavinda kao ga kûverithua nîgakinyu.

²⁸ Andû marethara makauma vûrûri wa Babuloni na makaûra makathiî Jerusalemu kûmenyithania ûrîa Ngai-Mûnene Ngai wetû erîvîrîrîtie nîûndû wa hekarû yake.

²⁹ Îrani andû arîa marûaga na mîguî makatharîkîre Babuloni. Rigicîriani îtûûra rîu na mûtikareke mûndû wana ûmwe ethare. Rîverithieni kûringana na ciîko ciarîo, mûrîke wata ûrîa rîkîte mavûrûri marîa mengî, nîûndû rîthîrîtwe rîkînyarararithie Ngai-Mûnene Ûrîa Mûtheru wa Isiraeli na mwîtîîo warîo.

³⁰ Kwoguo anake a îtûûra rîu makaûragîrwa ivaarorî ciarîo na athigari onthe a rîo nîmagacûkangua mûthenya ûcio. Ûguo nîguo nie Ngai-Mûnene nauga.

³¹ “Nie Ngai-Mûnene mwene vinya monthe nîrauga atîrî, “We Babuloni wîcûrîtwe nî mwîtîîo! Kwoguo nîngûregana nawe, kavinda gagûkûverithia nîgakinyu.

³² Ûrîa mwîtîi nîakaavîngwa na agwe nthî, gûtirî mûndû ûkamûtethia kûrûngama, na nîngaakia mwaki matûûrarî ma Babuloni, naguo nîûkavîvia kîndû kîonthe kîrî vakuvî naguo.”

³³ Ngai-Mûnene mwene vinya wonthe arauga atîrî, “Andû a Isiraeli wana andû a Juda nîmaranyarirwa. Arîa maamatavire mamanyinyîtie na nîmaregete kûmarekereria mathiî.

³⁴ Ûrîa mûkûri wao arî vinya. Rîîtwa rîake nî Ngai-Mûnene mwene vinya wonthe. Nama nîngamacirîrîra nîguo ndûme nthî îgîe na thayû, nwatî vûrûri wa Babuloni nîmakaagîa na thîna.”

³⁵ Ngai-Mûnene arauga atîrî, “Ûragani Akalidei, mûrage andû a Babuloni, na mûrage anene na andû a kuo arîa aûgî!

³⁶ Ûragani arathi a maveeni, maanagîrîra ûrimû mûtheri! Ûragani athigari ake a mbaara, nîguo mathirue onthe!

³⁷ Ûragani mbarathi ciaguo na mûcûkangie ikaari cia mbarathi, ûragani athigari onthe a gûkomborwa, nîguo magîe guoya ta aka! Cûkangiani mîthithû yake, nîguo indo itavwe.

³⁸ Vûrûri wa Babuloni nîûture mbura, na nyûnjî cia kuo ivwe. Babuloni nî vûrûri wa ngai cia mîvuanano, na itûmîte andû akuo mauma ngoma.

³⁹ “Kwoguo nyamû cia kîthaka: mviti na nyaga igaatûûraga Babuloni. Gûtirî andû magaatûûra kuo tene na tene.

⁴⁰ Ta ûrîa Ngai aacûkangirie Sodomu na Gomora vamwe na matûûra marîa mariganîtie na kuo, gûtirî mûndû ûgaatûûra kana ararîrîra kuo.

⁴¹ “Taroria andû maraûka maumîte mwena wa rûgûrû, rûrîrî rûrî na vinya na athamaki eengî, nîmarevarîria marî wa kûraca.

⁴² Manyitîte mîguî na matumû; nî aganu mûno na matirî ntha. Mûgambo wao nîta wa mûrurumo wa manjî îriarî, mathiîcaga mekarîrîte mbarathi, mekaraga mevarîrîtie kûrûa mbaara nawe we Babuloni.

⁴³ Mûthamaki wa Babuloni nîeguîte ûvoro wao, njara ciake ikathira vinya; nîagîte na kîeva, na ûrûrû ta wa mûndûmûka agîciara.

⁴⁴ “Taroria, nîngaûka wa rîmwe ndûme andû a Babuloni maume îtûûrarî rîao wa rîmwe ta mûnyambû umîrîte kîthakarî Kîam Jorodani na ûkathiî ndîthiarî ya ng'ondu. Na nîngathuura mûtongoria wakuo wa ûrîa ngenda. Nû ûngîgananua na nie? Nû wî na ûndû angînjukîra? Nî mûtongoria ûrîkû ûngîregana nanie?

⁴⁵ Kwoguo tathikîrîriani mûvango ûrîa nie Ngai-Mûnene nîrî naguo îgûrû rîgiî Babuloni, na maûndû marîa mvangîte gwîka andû a kuo. Nama ciana ciao nîigaakururua ithiîwe nacio, na andû onthe nîmakaamaka.

⁴⁶ Rîrîa Babuloni îgatavwa, nthî yonthe nîîkathingitha na kîrîro gîake nîgîkeguwa nî mavûrûri marîa mengî.”