Jeremia 5 - ÎVUKU RÎA ÛVORO MWARO

Wîvia wa Jerusalemu

¹ Vinyûrani kûndû na kûndû varavararî cia Jerusalemu, mûrorie na mwîyonere! Mûtuîrie na kûu thokorî, mwone kana kûrî wanarî ûmwe, ûrûmagîrîra kîvooto na ûcaragia ûma. Mwamwona, nie Ngai-Mûnene nîngûrekera Jerusalemu.

² Wana ethîrwa nîmaugaga: “Wata ûrîa Ngai-Mûnene atûûraga mwoyo,” kwîvîta kwao nî kwa maveeni.

³ We Ngai-Mûnene na kinthî we ndûcaragia kîvooto? We nîûmarivîte nwatî matiîgucaga ûrûrû, we nîûmavîvîtie na mwaki makathira, nwatî nîaregu kûrûngwa. Maûmîtie ngoro gûkîra îthiga; nîmaregete kûvera mevia mao.

⁴ Nanie nînacokire ngiuga atîrî, “Aya nî andû athîni na matirî ûûgî! Nîûndû matiîcî maûndû marîa Ngai-Mûnene endaga, na matiîcî watho wa Ngai wao.

⁵ Nîngûthiî kûrî anene na mbarie nao, nîûndû nîmaicî ûrîa Ngai-Mûnene endaga, nîmaicî watho wa Ngai wao.” Nwatî onthe nîmareganîte na Ngai-Mûnene; na makarega kûmwathîkîra.

⁶ Kwoguo mûnyambû kuuma werûrî nîûkamaûraga; Kîamthi kuuma werûrî nîgîkamacûkangia. Ngarî nîîtegete îtharîkîre matûûra mao, mûndû wonthe ûkauma kûu matûûrarî agaatarûrangwa icunjî, nîûndû mevia mao nî meengî, na mekaraga magîtiganagîria Ngai.

⁷ Ngai-Mûnene araûria atîrî, “Nîngîkûrekera atîa? Ciana ciaku nîindiganîrîtie, na nîmevîtîte na ngai cia maveeni. Rîrîa namaveere irio cia kwîgana, nîmekire ciîko cia ûtharia, na makîthiî nyombarî cia maraa.

⁸ Mekariî ta mbarathi cia njamba îvetwe irio ikanora, wa mûndû akeriragîria mûka wa mûndû ûrîa wîngî.

⁹ Nîngîrega atîa kûmaverithia nîûndû wa maûndû mau, nwa ndege kwîrîvîrîria kûrî vûrûri ta ûyû?

¹⁰ Unûkiani mûvîtûkîrîrîte mîtîrî yake ya mîthavibu na mûmîcûkangie, nwatî mûtikamîcûkangie viû. Thîgani mvûa ciayo, nîûndû tî cia Ngai-Mûnene.

¹¹ Nîûndû andû a Isiraeli na andû a Juda, methîrîtwe matarî evokeku kûrî nie wanarî vanini. Ûguo nîguo Ngai-Mûnene arauga.”

Ngai-Mûnene nîwaregire Isiraeli

¹² Andû a Isiraeli na Juda nîmaregete Ngai-Mûnene, na makauga atî: “Gûtirî ûndû angîka; tûtingîgwatwa nî ûndû mûcûku, na tûtikethîrwa na yûra kana mbaara.

¹³ Arathi matirî na ûûma mekariî ta rûkûngi, matirî na ndûmîrîri kuuma kûrî Ngai-Mûnene, Ûguo makuga nîguo mageekwa!”

¹⁴ Ngai-Mûnene mwene vinya wonthe arauga atîrî, “Nîûndû nîmarîtie maûndû mau, rîu nîngûtûma ciugo ciakwa ciîkare ta mwaki kanyuarî gaku, na andû matuîke ta ngû, naguo mwaki ûmavîvie.”

¹⁵ Ngai-Mûnene arera andû a Isiraeli atîrî, “Nîngûmûretere rûrîrî kuuma kûndû kûraca rûmûtharîkîre. Rûrîrî rûkûrû rûtangîvooteka, rûrîrî mûtangîmenya rûthiomi rwaruo, wana mûtangîtaûkîrwa nî ûrîa marauga.

¹⁶ Athigari ao njamba maûraganaga matarî na ntha.

¹⁷ Nao nîmakaarîa maketha na irio cienyu, nîmakaaûraga anake na erîtu enyu, nîmakaaûraga mbûri na ng'ombe cienyu; nîmagaacûkangia mîthavibu na mîkûyû yenyu. Matûûra menyu marîa mairigîre na mwîvokete, nîmakaamacûkangia na rûviû.

¹⁸ “Nwatî wana mîthenyarî îo, nie Ngai-Mûnene ndikamûcûkangia mûthire.

¹⁹ Nao andû enyu mangîkaûria gîtûmi Kîam mbîke maûndû mama monthe, we Jeremia ûkaamera atî, ‘wata ûrîa mwareganire nanie na mûkîgooca ngai ng'eni irîa ciarî vûrûrirî wenyu, nwata guo mûgatungatîra ageni mûrî vûrûrirî ûrîa ûtarî wenyu.’ ”

Ngai nîwakaanirie andû ake

²⁰ Ngai-Mûnene arauga atîrî, “Îra njiarwa cia Jakovu, na wanîrîre kûrî andû a Juda ûmeere atî:

²¹ Thikîrîriani mue irimû na andû aritu, mûrî na metho, nwatî mûtionaga, mûrî na matû, nwatî mûtiîgucaga.

²² Ngai-Mûnene araûria atîrî, Nîndûî kîgiragia mûnîîtigîra? Nîndûî kîgiragia mwinaine mûrî mbere yakwa? Nînaigîre mûthanga ûtuîke mûvaka wa îria, mûvaka wa gûtûûra ûrîa rîtangîkîra. Wana ethîrwa makûmbî nîmaikanagia ava na vaarîa mwatî matingîûvîtûka, wana ethîrwa nîmarurumaga, matingîûkîra.

²³ Nwatî andû aya nî aremi na marî ngoro nyûmû, nîmagarûrûkîte na makandiganîria.

²⁴ Matiîciragia mandîîe nie Ngai-Mûnene Ngai wao, na nînîmaurithagîria mbura vîndî yayo yakinya. Mbura nene na mbura nini, na ngamûva mavinda magîrîru ma gûketha.

²⁵ Mevia menyu nîmatûmîte mûrege kûgwata irathimo icio, mevia magatûma mûrega kûgwata maûndû maro.

²⁶ Andû arîa aganu monekaga gatagatîrî ka andû akwa, mekaraga metererete ta ategi a iconi mategere mîtego. Mategaga mîtego yao makagwatithie andû.

²⁷ Ta ûrîa mûtegi ecûragia iconi irîa agwatithîtie gîkavurî, nwa ta guo nyomba ciao ciîcûrîte indo cia ungumania. Kîu nîkîo gîtûmaga methîrwe marî anene na itonga,

²⁸ nîanoru na nîarûngarû. Ciîko ciao njûku nîikîrîte njano, matitucagîra ciana cia ndigwa na kîvooto, na mationanagia waragania kûrî andû arîa avinyîrîrie.”

²⁹ Ngai-Mûnene arauga atîrî, “Nwa ndege kûverithia andû nîûndû wa maûndû mama? Nwa ndege kwîrîvîrîria kûrî vûrûri ta ûyû?

³⁰ Ûndû mûcûku na wa kûmakania nîwîkîkîte vûrûrirî ûyû:

³¹ arathi methîrîtwe makîruta ûrathi wa maveeni, na athînjîri-Ngai makathana wa ûrîa makwenda. Andû akwa makona ûndû ûcio ûrî mwagîrîru. Nwatî maûndû mama makinya mûthiia mûgeka atîa?”