Jeremia 49 - ÎVUKU RÎA ÛVORO MWARO

Ndûmîrîri îgiî vûrûri wa Aamoni

¹ Ûvororî wîgiî andû a Amori, Ngai-Mûnene araûria atîrî, “Nîkwa Isiraeli gûtarî arûme? Gûtirî mûndû ûngîgaa vûrûri ûcio? Nîndûî gîtûmîte andû arîa magocaga ngai îrîa îtagwa Milikomu, megwatîre vûrûri wa Gadi makînatûûra kuo?

² Nwatî rîu kavinda nîgagûkinya, rîrîa ngaanîrîra mûgambo wa mbaara, îgûrû rîgiî Raba îtûûra rîa Aamoni. Rîgatuîka ta maganjo, na icagi cia rîo ivîvue na mwaki. Isiraeli nîagaacoka atave arîa maamûtavîte. Ûguo nîguo Ngai-Mûnene Mwene vinya wonthe arauga.

³ Mue andû a Heshiboni rîrani nîûndû îtûûra rîa Raba nîrîcûkangie! Mue andû a Raba cakayani! Îkîrani nguo cia macakaya, cakayani mûkîvinyûraga ava na varîa! Nîûndû ngai yenyu Milikomu nîîkûvirwa îthamîriorî, vamwe na athînjîri-Ngai ake na ndungata ciake.

⁴ Mûretîîa na cianda cienyu nîkî mue andû arîa mûtetîkîtie? Mwevokete ûtonga wenyu mûkiugaga, ‘Nîûrîkû ûngîcûyia kûrûa natue?’

⁵ Taroria, nîngûmûretera maûndû ma kûmwîguithia guoya, kuuma kûrî andû onthe arîa mamûrigicîrîtie, namue nîmûkavinyûrua wa mûndû aûre njîra yake, na gûtikaagîa mûndû wa gûcokanîrîria arîa maaûrire. Ûguo nîguo nie Ngai-Mûnene nîrauga.

⁶ Vuva wa ûguo nîngatûma andû a Aamoni magacîre. Nie Ngai-Mûnene nînie nauga ûguo.”

Ndûmîrîri îgiî vûrûri wa Edomu

⁷ Ûvororî wîgiî Edom Ngai-Mûnene mwene vinya wonthe arauga atîrî, “Nîkwa andû a Edomu mathirîtwe nî ûûgî? Nîkwa arîa mamataaraga matigîte kûmataara? Nîkwa ûûgî wao wonthe ûrî mûthiru viû?

⁸ Andû a Dedani garûrûkani mûre! Îthitheni! Nîngwananga njiarwa cia Esaû, nîûndû îvinda rîa kûiverithia nîrîkinyu.

⁹ Rîrîa andû maketha thavibu, kinthî matitigaragia imwe mîthaviburî? Rîrîa aîi maûka ûtukû kwîa, kinthî matiîaga kîrîa mavatarîte?

¹⁰ Nwatî nie ndigîte njiarwa cia Esaû itarî kîndû, na nîngunûrîte kûrîa methithîte, ndangîvota kwîthitha rîngî. Andû onthe a Esaû nîmacûkangîtue; gûtirî wanarî ûmwe wao mûtigaru.

¹¹ Ndigîrani ciana cienyu cia ngoriai na ngaimenyagîrîra; tigani aka enyu a ndigwa maige mwîvoko wao kûrî nie.”

¹² Ngai-Mûnene arauga atîrî, “Ethîrwa arîa matavatiî kûnyuîra gîkomberî Kîam mathîna nî anyuîru, nwa mue mûtakûverithua? Naarî, nwa nginya wanamue mûnyuîre gîkomberî kîu!

¹³ Nie mwene nînîvîtîte nama atî, îtûûra rîa Bozira nîrîtuîka kûndû gwa kwîguithia andû guoya, na gwa kûnyararwa, werû na kûrume; na matûûra ma kuo monthe nîmatûûra marî macûkangie viû. Nie Ngai-Mûnene nînie nauga ûguo.”

¹⁴ Nînyitîte ndûmîrîri kuuma kûrî Ngai-Mûnene. Mûnjaama nîmûtûme anîrîre kûrî mavûrûri atîrî, “Gomanani vamwe na mûregane na Edomu, thiîni mûkaûtharîkîre.

¹⁵ Nie Ngai-Mûnene nîngûgûtua we Edomu, vûrûri mûnini gûkîra mavûrûri marîa mengî, na ûnyararagwe nî andû onthe.

¹⁶ Guoya îrîa wîkîrîte andû na mwîtîîo waku nîikûveenetie, we wîkaraga ngurungarî cia mathiga na ûtûûraga kîrîmarî îgûrû! Nwatî wana gwatuîka ûtûûraga îgûrû ta nderi, nîngakûnyûrûrûkia kuuma kûu ûtûûraga. Ûguo nîguo nie Ngai-Mûnene nauga.”

¹⁷ “Edomu îkeguithagia andû guoya, na mûndû ûrîa ûkavîtûkagîrîra vakuvî naguo akaauga ûûi, nîkûmaka ona ûrîa kwanangîtwe.

¹⁸ Wata ûrîa Sodomu na Gomora na matûûra marîa mariganîtie nakuo maacûkangirue, gûtirî mûndû ûgatûûra Edomu kana avîtûkîrîra kuo. Ûguo nîguo Ngai-Mûnene arauga.

¹⁹ Taroria, wata ûrîa mûnyambû umagîra mûtitûrî wa rûnjî rwa Njorodani, na ûgatonya ndîthiarî mbaro ya ng'ondu, nwataguo ngengata andû a Edomu wa rîmwe kuuma vûrûrirî wao. Nîngaiga mûtongoria wa ûrîa ngathuura kuo. Nîûndû, nû ûngîringithanua nanie? Nû ûngînjirithia? Nî mûrîthi ûrîkû ûngîregana nanie?

²⁰ Kwoguo ta thikîrîria mûvango ûrîa Ngai-Mûnene arî naguo îgûrû rîa Edom, na maûndû macûku marîa avangîte gwîka kûrî atûûri a Temani: wana nginya twana tûrîa tûnini mûno nîtûkathiîwa natuo, nao andû onthe nîmakaamakua mûno nî ûvoro ûcio.

²¹ Rîrîa vûrûri wa Edomu ûkaang'aûranua, nthî nîkainaina; na mûgambo wa kîrîro Kîamo nîûkeguîka nginya îria îtune.

²² Taroria, nthû îkaagûrûka na îgûrû na îvenya ta nderi na îtharîkîre Bozira. Mûthenya ûcio, andû a Edomu nîmakaagîa na guoya ta wa mûndûmûka arî na ûrûrû wa gûciara.”

Ngai-Mûnene nîwatuîrîre Damesiki

²³ Ûvoro wîgiî Damesiki Ngai-Mûnene arauga atîrî, “Andû a matûûra ma Hamathi na Aripadi nîmamakîte, nîûndû nîmeguîte maûndû macûku. Marainaina nî guoya, ta îria rîkinaiana, na rîtingîvorera.

²⁴ Andû a Damesiki nîaûre nî vinya, maagarûrûkire maûre makînyitwa nî guoya; nîmagîte na ruuo na kîeva kînene, ta mûndûmûka arî na ûrûrû wa gûciara.

²⁵ Îtûûra rîrîa rîrî ngumo nîrîtiganîrie; îtûûra rîecûrîtwe nî gîkeno!

²⁶ Kwoguo anake ake nîmakaagwa ivaarorî ciarîo, na athigari a îtûûra rîu rîonthe makaûragwa mûthenya ûcio. Ûguo nîguo Ngai-Mûnene mwene vinya wonthe arauga.

²⁷ Nîngagwatia nthingo cia Damesiki mwaki, na nîûkavîvia nthigo cia kwîgitîra Benihadadi.”

Îtuîro rîa mûvîrîga wa Kedari na îtûûra rîa Hazoru

²⁸ Ûvoro wîgiî Kendari na kûrîa kwathagwa nî Hazoru na kwatharîkîrwe nî Nebukadinezarû mûthamaki wa Babuloni, Ngai-Mûnene arauga atîrî, “Ûkîra ûkatharîkîre andû a Kedari! Cûkangiani andû acio maumîte mwena wa îrathîro!

²⁹ Ocani magema mao na ndîthia ciao, wana mbathia na indo ciao cionthe; macuneni ngamîîra ciao na mûmeere atîrî, ‘Guoya wîcûrîte kûndû kuonthe!’

³⁰ “Ngai-Mûnene arera andû a Hazoru atîrî, Ûrani mûthiî kûraca mûkethithe! Nîûndû Nebukadinezarû mûthamaki wa Babuloni, nîavangîte mûvango mûcûku îgûrû rîenyu, na nîakûmwîka maûndû macûku.”

³¹ ‘Ngai-Mûnene arauga atîrî, Ûkîrani mûkatharîkîre vûrûri ûrîa wîkaraga na thayû na ûrî mûgitîre! Vûrûri ûtarî mîrango kana mîkîgo, na ûtûûraga ûrî guonga.’

³² “Tavani ngamîîra na ndîthia ciao! Nîngaamanyagarûkia kûndû kuonthe, andû arîa menjaga njuîrî ciao igakuvîva mîena, njoke nîmaretithîrie mûthiro na mîena yonthe. Ûguo nîguo nie Ngai-Mûnene nauga.

³³ Îtûûra rîa Hazoru nîrîtûûra rîrî werû tene na tene, mbwe nîcio îgatûûraga kuo. Gûtirî mûndû ûgacoka gûtûûra kuo, kana ararîrîra kuo. Ûguo nîguo nie Ngai-Mûnene nauga.”

Ndûmîrîri îgiî Elamu

³⁴ Îno nîyo ndûmîrîri îrîa yakinyîre Mûrathi Jeremia yumîte kûrî Ngai-Mûnene mwene vinya wonthe îgiî îtûûra rîa Elamu, rîrîa mûthamaki Zedekia ambîrîrie kwathana vûrûrirî wa Juda.

³⁵ Augire atîrî, “Taroria, nîngunanga mota ma andû a vûrûri wa Elamu arîa maicî kûratha na mîguî, acio matûmîte vûrûri ûcio ûgîe na vinya mûno.

³⁶ Nîngarekereria rûkûngi kuuma mîena îna ya nthî rûthiî vûrûrirî wa Elamu, na nyaganie andû a kuo mathiî mîena yonthe na nîmagecûra mavûrûrirî monthe.

³⁷ Nîngaatûma andû a Elamu metigîre nthû ciao, irîa ciendaga kûmaûraga. Nîngaûraga andû a Elamu nîrî na marakara meengî. Ngaamatûmîra athigari a mbaara mamaûrage mathire viû.

³⁸ Nîngaiga gîtî gîakwa Kîam ûthamaki kûu vûrûrirî wa Elamu na njûkangie athamaki na anene akuo.

³⁹ Nwatî mavindarî ma mûthiia, nîngaatûma îtûûra rîa Elamu rîgacîre rîngî. Ûguo nîguo nie Ngai-Mûnene nîrauga.”