Jeremia 48 - ÎVUKU RÎA ÛVORO MWARO

Gûcûkangua kwa Moabu

¹ Ngai-Mûnene mwene vinya wonthe Ngai wa Isiraeli arauga atîrî, “Kaî andû a Nebo marî na thîna-î, nîûndû îtûûra rîao nîrîcûkangie! Îtûûra rîa Kiriathaimu nîrîconorithie na gûgatavwa, nthingo ciakuo cia vinya nî nyomomore.

² Ngumo ya vûrûri wa Moabu nî nthiru, mîvango mîcûku îgiî Moabu yavangîrwe Heshiboni: ‘Ûkani tûûcûkangie ûtige gûtuîka vûrûri rîngî!’ Wanawe îtûûra rîa Madimeni nîûkûthira viû, ndûkaûrîra mbaara îrîa yûkîte.

³ Tathikîrîria! Andû a Horonaimu nîmaraugîrîria atîrî, ‘Nîtwathira na tûrîacûkangie viû!’

⁴ Vûrûri wa Moabu nîmûcûkangie; kîrîro gîake nîkîreguîka nginya Zoari.

⁵ Maunûkîtie Luhithi makîrîraga, manyûrûrûkîte maumîte Horonaimu, nîmaregua kîrîro gîa kûndû gûgîcûkangua.

⁶ Vinyûra! Ûvonokie mwoyo waku! Vinyûrani ta nyûmbû ya werûrî!

⁷ We Moabu nîwevokire ûvoti waku na ûtonga waku, nwatî rîu wanawe nîûgatavwa; ngai yaku Kemoshi nîîkavirwa îthamîriorî, vamwe na athînjîri-Ngai na ndungata ciake.

⁸ Mûcûkangia akaathiî matûûrarî monthe, gûtirî îtûûra rîkaavonoka; indo cionthe ciandarî nîikaathira, kûndû kûrîa gûtûgîru nîgûkoomomorwa, wata ûrîa Ngai-Mûnene augîte.

⁹ “Va vûrûri wa Moabu mathagu, nîguo ûgûrûke ûûre; matûûra maguo magatuîka maganjo, gûtikethîrwa na andû a gûtûûra kuo.

¹⁰ Kûgwatwa nî kîrumi nî mûndû ûrîa ûrutaga wîra wa Ngai-Mûnene na mûvûthia; na kûgwatwa nî kîrumi nî mûndû ûrîa ûgiragia rûviû rwake rwîtûrûra nthakame!

Matûûra ma Moabu nîmaacûkangirue

¹¹ “Moabu atûûraga na thayû kuuma arî mûnini, akirîrîtie ta ndivei îtarî ngerûre, ndivei îtanonoranua kuuma mûtûngirî ûmwe kûthiî wîngî. Moabu ndanavirwa îthamîriorî, kwoguo ndanathira mûcamo wake, na atûûraga anungaga waro.

¹² “Kwoguo îvinda nîrîgûkinya, nîguo Ngai-Mûnene arauga rîrîa ngatûma andû mamwînamie, na metûrûre ndivei, na maûrage nyûngû ciake cia gwîkîra ndivei.

¹³ Nao andû a Moabu nîmagaaconoka nîûndû wa ngai yao Kemoshi, wata ûrîa andû a Isiraeli maaconokire nîûndû wa Betheli, ngai îrîa mevokete.

¹⁴ “Andû a Moabu, mugaga mûrî njamba, na athigari a mbaara marî vinya atîa?

¹⁵ Mûcûkangia wa Moabu na matûûra make nîwakinya, anake ake arîa aro nîmaûragwa. Nîguo nauga nie mûthamaki ûrîa wîtagwa Ngai-Mûnene mwene vinya wonthe.

¹⁶ Mûthiro wa Moabu ûrî vakuvî, na gûcûkangua gwake gûkîte na îvenya.

¹⁷ Mue muonthe mûriganîtie na Moabu rîcakaîreni, namue muonthe mwîcî rîîtwa rîake waro. Ugani atî: ‘Wathani wake wa vinya nîmûthirie vinya, riiri na vinya waguo nîciathira.’

¹⁸ Mue atûûri a Diboni, umani itîîrî cienyu cia gîtîîo, mwîkare nthî rûkûngûrî. Nîûndû mûcûkangia wa Moabu nîwakinya, nîacûkangîtie kûrîa kûgitîre.

¹⁹ Mue arîa mûtûûraga Aroeri, rûngamani mûkîra wa njîra mwîrorerie! Ûriani arîa mavinyûrîte maûrîte atîrî: ‘Nîkwa gwekara atîa?’

²⁰ Moabu îrî na gîconoko, nîûndû nîmvoote viû, rîrani na mûcakae! Anîrîrani mûrî rûtere rwa rûnjî rwa Arinoni, atî Moabu nînjûkangie viû.

²¹ “Ngai-Mûnene nîatuîrîte matûûra marîa marî kûndû kûrîa kwaraganu, na nîmo: Holoni, Jahiza, Mefathi,

²² Diboni, Nebo, Bethi-dibulathaimu,

²³ Kiriathaimu, Bethi-gamuli, Bethi-meoni,

²⁴ Keriothi na Bozira. Ngai-Mûnene nîatuîrîrîte matûûra monthe ma Moabu, marîa marî kûraca na marî gûkuvî.

²⁵ Vinya wa Moabu nîmûthirie viû, na ûvoti wake ûgacûkangua. Ûguo nîguo nie Ngai-Mûnene mbugîte.”

Vûrûri wa Moabu nîûgaconorithua

²⁶ “Vani Moabu ndivei nîguo arîwe viû, nîûndû nîwenenevirie gûkîra Ngai-Mûnene. Moabu nîakagaraga matavîkarî make na nîakaathekererwa nî andû.

²⁷ Moabu, taririkana ûrîa wathekerere andû a Isiraeli. Nîkwa wanyitanîrue na aîi, atî vîndî cionthe waria ûvoro wake ûkainainia kîongo?

²⁸ “Mue atûûri a Moabu, umani matûûrarî menyu, mûthiî mûgatûûre ngurungarî cia mathiga! Tutiani ndutuura îrîa îtumaga kîomba Kîamyo mûromorî wa nguva.

²⁹ Nîtwîguîte ûrîa andû a Moabu marî etîi. Nîtwîguîte ûrîa marî ecaari, eyongi na ethûnûri, na ûrîa metucaga na ngoro atî nî aro.

³⁰ Nie Ngai-Mûnene nîmbicî ûrîa marî ang'athia; mwîtîîo wao nî wa mana, na ciîko ciao nî cia mana.

³¹ Kwoguo nînîracakaya nîûndû wa Moabu, ngarîrîra andû onthe a Moabu, na ngacakaîra andû a Kiri-heresi.

³² Ndîraga nîûndû wa andû a Sibuma, gûkîra ûrîa ndîragîra Jazeri. We îtûûra rîa Sibuma, mvûa ciake iringîte nginya mûringo wa îria rîa Cumbî, ikathiî nginya Jazeri. Nwatî mûcûkangia nîmûthithûkîru matunda menyu ma vîndî ya riûa, na thavibu cienyu.

³³ Vûrûri mûnoru wa Moabu nîmûcune gîkeno na ûcanjamûku, nîndûmîte ndivei ndîkaume ivivîrorî cia thavibu, gûtirî mûndû ûvivaga ndivei arî na gîkeno, înegene rîu mûregua tî rîa gîkeno.

³⁴ “Kîrîro Kîam andû a Heshiboni na Eleale nîkîreguîka Jahazi; nîkîreguîka kuuma Zoari, nginya Horonaimu wana nginya Egilathi-shelishiya. Wana nginya karûnjî ka Nimurimu nîkavwîu.

³⁵ Nîngaatûma andû a Moabu matige kûgooca na kûruta magongoona marî kûndû kûrîa gûtûgîru, na matige kûvîvîria ngai yao ûbani. Ûguo nîguo nie Ngai-Mûnene nauga.

³⁶ “Kwoguo nînîracakaya nîûndû wa andû a Moabu na andû a Kiri-heresi, ta mûndû ûravuva mûtûrirû mathikorî; nîûndû ûtonga wonthe ûrîa methîrîtwe naguo nî mûthiru viû.

³⁷ Andû onthe nîenju ciongo na nderu ciao. Onthe nîmetemangîte njara, na makeyova nguo cia macakaya ciûnorî.

³⁸ Îgûrû rîa nyomba cionthe cia Moabu na ivaarorî cia gûcemanîrua gwîcûrîte macakaya matheri. Nîûndû nîmbûragîte Moabu ta nyûngû îrîa gûtarî mûndû ûngîmîtûmîra. Ûguo nîguo nie Ngai-Mûnene nîrauga.

³⁹ Taroria ûrîa maunîkangîte! Ûrîa mararîra! Ûrîa magîte na gîconoko. Vûrûri wa Moabu ûtuîkîte kîndû gîa kûthekererwa na kîmako kûrî mavûrûri monthe marîa ûriganîtie namo.”

Vûrûri wa Moabu ndûgatigara

⁴⁰ Ngai-Mûnene arauga atîrî, “Taroria kûrî vûrûri ûgaûka na îvenya ûtharîkîre Moabu, ûgaûka wambîte mathagu ta nderi.

⁴¹ Matûûra na kûndû kûrîa kûgitîre nîgûgaatavwa. Mûthenya ûcio athigari a mbaara a Moabu, nîmakegua guoya ta mûndûmûka akîgîa na mwana.

⁴² Andû a Moabu nîmagacûkangua matige gûtuîka rûrîrî, nîûndû nîmenenevirie gûkîra Ngai-Mûnene.

⁴³ Kîmako, marima na mîtego nîimweterere mue andû a Moabu. Ûguo nîguo Ngai-Mûnene arauga.

⁴⁴ Mûndû ûrîa ûkaûra nî kîmako, nî akagwa îrimarî, na mûndû ûrîa ûkauma îrimarî, nîakaanyitwa nî mûtego. Nîûndû Ngai-Mûnene areterete Moabu maûndû mama, nîûndû mwaka wao wa kûmaverithia nîmûkinyu. Ûguo nîguo Ngai-Mûnene arauga.

⁴⁵ “Andû arîa maûraga mathiîcaga Heshiboni gûcaria ûgitîri, îtûûra rîrîa vîndî îmwe rîathagwa nî mûthamaki Sihoni, nîûndû mwaki ûmîte Heshiboni, rûrîrîmbî rwa mwaki rumîte nyomba ya Sihoni, ûkavîvia mîvaka yonthe ya Moabu, na ûkavîvia irîma cia andû aya aremi.

⁴⁶ Mue andû a Moabu kaî mûrî na thîna-î! Andû arîa magoocaga Kemoshi onthe nîacûkangie! Ciana cienyu cionthe nîndave ikavirwa îthamîriorî.

⁴⁷ Nwatî vuvarî nîngacokeria Moabu mûnyaka wake. Ûguo nîguo Ngai-Mûnene arauga.” Rîu nîrîo îtuîro rîa vûrûri wa Moabu.