Jeremia 47 - ÎVUKU RÎA ÛVORO MWARO

Ndûmîrîri ya Ngai-Mûnene îgiî vûrûri wa Filisiti

¹ Ndûmîrîri ya Ngai-Mûnene îgiî Afilisiti nîyakinyîre mûrathi Jeremia, mbere ya mûthamaki wa Misiri atharîkîra îtûûra rîa Gaza.

² Ngai-Mûnene arauga atîrî: “Taroria manjî nîmarauma mwena wa rûgûrû, namo nîmatuîka ta rûnjî rwîcûrîte rûkauna; nîmagaakunîkîra nthî na indo cionthe irîa irî kuo, makunîkîre îtûûra vamwe na atûûri a rîo. Andû nîmakaaugîrîria; andû onthe a nthî nîmakaarîra marî na ûrûrû mwîngî,

³ rîrîa makegua înegene rîa mavûngû ma mbarathi, înegene rîa ikaari cia mbaara, na mûrurumo wa magûrû ma cio. Methe nîmakaariganîrwa nî ciana ciao, njara ciao ikethîrwa iregerete mûno.

⁴ Mûthenya nî mûkinyu wa kûûraga Afilisiti onthe, kûthiria ûtethio wonthe ûrîa watigarîte kuuma Turo na Sidoni. Nîûndû Ngai-Mûnene nîaracûkangia Afilisiti, andû onthe arîa matigarire gîcîgîrîrarî gîa Kirete.

⁵ Andû a Gaza nî menjetwe irîya magîcakaya, îtûûra rîa Ashikeloni nîrîcûkangie viû. Mue matigari ma Anaki nîmûcakaya nginya rî?

⁶ We rûviû rwa Ngai-Mûnene! Ûgakirîrîria rî? Coka njûrarî yaku, vurûka na ûkirîrîrie.

⁷ Rûviû rûngîkira atîa rîrîa Ngai-Mûnene arûvete kanya? Arwathîte rûcûkangie îtûûra rîa Ashikeloni, na andû arîa matûûraga rûtere rwa îria.”